1 SAMUEL 7 - KITTA KAREBA MADECENG

¹ Nanalani pabbanuwana Kiryat-Yéarim iyaro Petti Assijancinna Puwangnge nanatiwii ri lalempolana tau iya riyasengngé Abinadab; iyaro bolaé engkai ri tompo'na bulu-bulué. Nainappa mennang nalanti Eléazar ana' Abinadab, untu' monrowangngi iyaro Petti Assijancingngé.

Naparéntana Samuél Israélié

² Maittato iyaro Petti Assijancinna Puwangnge monro ri Kiryat-Yéarim, kira-kira duwappulo taung. Ri lalenna wettuéro sininna umma Israélié mangobbii lao ri Puwangnge méllau tulung.

³ Namakkedana Samuél lao ri umma Israélié, “Rékko maéloko lisu ri Puwangnge nenniya sompai Aléna sibawa sukku atimmu, harusu'ko mabbéyangngi sininna déwata laingngé sibawa dato'-dato'na Déwi Asytorét. Abbéréyang sisengngi alému lao ri Puwangnge sibawa massompa ri Aléna bawang, nanapaleppe'ko matu polé ri tau Filistingngé.”

⁴ Jaji nabbéyanni tau Israélié dato'-dato'na Déwa Baal sibawa dato'-dato'na Déwi Asytorét, namattumani banna ri Puwangnge bawang.

⁵ Purairo makkedani Samuél, “Paddeppungenni sininna bangsa Israélié ri Mizpa, namaéloka massempajangekko lao ri Puwangnge.”

⁶ Namaddeppungeng manenna mennang ri Mizpa. Séro'ni mennang uwai nainappa natiri selaku pakkasuwiyang lao ri Puwangnge, nainappa mennang mappuwasa puppu essoéro. Nakkedana mennang, “Madosani lao ri Puwangnge.” (Ri Mizpa ritu Samuél mappammula pettuiwi parakara-parakara assisalanna tau Israélié.)

⁷ Wettunna naéngkalinga tau Filistingngé makkedaé maddeppungenni tau Israélié ri Mizpa, joppani iya lima arung Filistingngé lao kuwaro silaong tentarana mennang untu' gasai tau Israélié. Naéngkalingani tau Israélié gau'éro namancaji métauna.

⁸ Nakkeda mennang lao ri Samuél, “Aja' muwappésau massempajang lao ri Puwang Allataalata kuwammengngi Napassalama'ki polé ri tau Filistingngé.”

⁹ Rimakkuwannanaro géréni Samuél sikaju ana' bimbala lolo, nanakkasuwiyangengngi selaku akkarobangeng ritunu lao ri Puwangnge. Purairo massempajanni kuwammengngi Puwangnge tulungngi tau Israélié, naritarima iyaro sempajanna.

¹⁰ Wettunna Samuél mattengngang makkasuwiyang akkarobangeng ritunuéro, mammulani maggasa tau Filistingngé; iyakiya nasitujuwangngi iyaro wettué magguttui Puwangnge polé ri langié ri yasé'na mennang. Nakacauna mennang angkanna lari alippuwang.

¹¹ Massuni tentara Israélié polé ri Mizpa nanalellungngi iyaro tau Filistingngé nawéki sibbéla Bét-Kar, sibawa mancuru'i mennang.

¹² Purairo patettonni Samuél séddi batu, ri pakkasésénna Mizpa sibawa Sén. Makkedai, “Sukku Puwangnge pura tulukki.” – nainappa naseng iyaro batué “Batu Pattulung”.

¹³ Makkuwaniro tau Filistingngé ricau. Dé' naripalalo mennang ri Puwangnge muttamakiwi daérana Israélié paimeng, gangka tuwona mupa Samuél.

¹⁴ Sininna kota Israél iya puraé nacau tau Filistingngé, mappammulai ri Ekron lettu ri Gat, napalisuni lao ri Israélié. Jaji nalolongenni paimeng Israélié sininna daérana. Tau Israélié sibawa tau Kanaangngé tuwoni sibawa damé.

¹⁵ Naparéntani Samuél Israélié gangka maténa.

¹⁶ Tungke' taung joppai mattulili lao ri Bétel, Gilgal, sibawa Mizpa. Na ri onrong-ngonrongngéro napettuiwi parakara-parakara assisalangngé.

¹⁷ Purairo lisuni ri bolana ri Rama. Kuwaniro mancaji hakinna tau Israélié sibawa patettong towi séddi mézba untu' Puwangnge.