1 SAMUEL 6 - KITTA KAREBA MADECENG

Ripalisunna Petti Assijancingngé

¹ Monronana Petti Assijancinna Puwangnge ri Filistin pitumpuleng ittana,

² naobbini tau Filistingngé sining imangngé sibawa sining passéhéré'é nainappa makkutana, “Harusu'i riyaga iyaro Petti Assijancinna Puwangnge? Rékko ripalisui ri onronna, pékkugi carana?”

³ Nappébali mennang, “Iyaro Petti Assijancinna Allataalana Israélié aja' mupalisui makkuwaro bawang, iyakiya harusu'i nasibawang hadiya untu' pakkamaja dosamu. Nanallalengiwiro naripajjapako matu, sibawa muwissengngi matu magi iyaro Allataalana Israélié natteru-teru hukkukko.”

⁴ Nakkutana iyaro sining tauwé, “Pakkamaja agana harusu tawéréngngi?” Nappébali iyaro sining imangngé, “Lima boro ulaweng sibawa lima balawo ulaweng, situru jumellana arung Filistingngé. Dé'ga na abalaé iyanaritu boro-boro sibawa balawoto iya puraé kenna manekko, muwi ra'ya'é iyaré'ga arungngé?

⁵ Jaji, harusu'ko mébbu pada-padanna polé ri lettal-lettangngé sibawa balawo iya majjallo'é ri wanuwammu. Nanallalengiwiro mupakallebbii Allataalana Israélié. Naullé mappésauwi matu hukkukko, silaong déwata-déwatamu enrengngé tanamu.

⁶ Aga gunana matedde atiko pada-pada arungngé sibawa tau Maséré'é riyolo? Aja' muwallupai pékkugi Allataala macculé-culéiwi mennang, angkanna mennang toba nanaleppengngi iyaro tau Israélié salaiwi Maséré.

⁷ Rimakkuwannanaro, passadiyano séddi padati iya barué sibawa duwakkaju saping iya mappasusué mupa, sibawa iya dé'éppa naengka naripaké untu' maggetteng padati. Pasangngi iya duwa sapingngéro ri padatié, sibawa rimpai iyaro ana'-ana' sapingngé lisu ri laleng wakké.

⁸ Nainappa alai Petti Assijancinna Puwangnge, paénré'i ri padatié, sibawa palénne'i ri seddéna petti-petti iya mallise'é barab-barang ulaweng iya harusu'é muwakkasuwiyangeng lao ri Aléna selaku pakkamaja dosamu. Leppessangngi iyaro padatié sibawa sapingngé joppa alé-aléna.

⁹ Pénessaiwi lalenna; rékko iyaro Petti Assijancingngé natiwii mattuju ri wanuwanna muto, iyanaritu kota Bét-Sémes, iyaro bettuwanna makkedaé Allataalana tau Israélié ritu pura papolé acilakang iya maseroéro lao ri idi. Iyakiya rékko iyaro padatié dé' nattuju kuwaro, taissenni matu makkedaé tenniya polé ri Allataalana Israélié, sangadinna nasitujuwammi bawang.”

¹⁰ Turuni iyaro sining tauwé; malani mennang duwakkaju saping iya mappasusué mupa, nainappa napasang ri padatié, ana'-ana'na iyaro sapingngé naurungngi ri laleng wakkéé.

¹¹ Nainappa iyaro Petti Assijancingngé napaénré ri padatié, makkuwatoro petti-petti iya mallise'é balawo ulaweng sibawa lettal-lettang rapangngéro.

¹² Iyaro sapingngé joppani matteru mattuju ri Bét-Sémes; iyaro olokolo'é mangnguwa'ni najoppato matteru, telléssé ri abéyo iyaré'ga ri atau polé ri watattanaé. Iya lima arung Filistingngéro matteruni maccowéri lettu ri pakkasésénna Bét-Sémes.

¹³ Iyaro wettué pabbanuwana Bét-Sémes mattengngangngi méngngala gandong ri lompo'é. Wettunna mennang naita iyaro Petti Assijancingngé, marennuni mennang duppaiwi.

¹⁴ Iyaro padatié mappésauwi ri seddéna séddié batu loppo ri daérana Yosua, séddiwi tau pabbanuwana Bét-Sémes. Pabbanuwana iyaro kotaé napuwé-puwé'ni iyaro ajunna padatié nainappa nagéré iya duwa kajunna sapingngéro untu' akkarobangeng ritunu lao ri Puwangnge.

¹⁵ Nainappa sining tau Léwié panonnoi Petti Assijancinna Puwangnge sibawa petti-petti iya mallise'é barab-barang ulawengngéro, nainappa napalénne ri yasé'na batu loppoéro. Purairo makkasuwiyanni pabbanuwana Bét-Sémes akkarobangeng ritunu sibawa akkarobangeng-akkarobangeng laingngé lao ri Puwangnge.

¹⁶ Wettunna iya limaro arung Filistingngé mitai iya manennaro lisuni mennang ri Ekron iyatoro essoé.

^17-18 Nanallalengiro napura tau Filistingngé kiring lao ri Puwangnge pakkasuwiyang pakkamaja dosa untu' pabbanuwana iya lima kota naparéntaé iya lima arung Filistingngé. Iyaro kota-kotaé iyanaritu: Asdod, Gaza, Askélon, Gat sibawa Ekron. Ri yelle'na engka iya mabbénténgngé, engka dé'. Tungke' iyaro kotaé makkiringngi séddi lettang ulaweng sibawa séddi balawo ulaweng. Buttinna polé ri kajajiyangngéro iyanaritu batu loppo onronna mennang paléssoi Petti Assijancinna Puwangnge. Lettu essoéwé iyaro batué engka mupi ri dare'na Yosua, tau Bét-Sémes-éro.

¹⁹ Iyakiya nasaba iyaro sining tau Bét-Sémes-é célléngngi muttama ri laleng Petti Assijancinna Puwangnge, pituppulo tau ri yelle'na mennang riyuno ri Puwangnge. Nanabbarata ra'ya'é nasaba Puwangnge pateppaiwi mennang abala iya makkuwaéro loppona.

Petti Assijancingngé ri Kiryat-Yéarim

²⁰ Namakkeda pabbanuwana Bét-Sémes, “Nigana wedding tahang ri yolona Puwangnge, Allataala Iya Mapaccingngéro? Kégani iyaro Pettié harusu riyantara kuwammengngi namabéla polé ri idi?”

²¹ Nanakiring mennang suro lao ri Kiryat-Yéarim sibawa paseng makkuwaéwé, “Napalisuni tau Filistingngé Petti Assijancinna Puwangnge. Laono mai namutiwii iyaro pettié lao ri onrommu.”