1 SAMUEL 5 - KITTA KAREBA MADECENG

Petti Assijancingngé ri tengnga-tengngana tau Filistingngé

¹ Nasittainnana tau Filistingngé Petti Assijancinna Allataala, natiwini mennang polé ri Eben-Haézer lao ri kotana mennang, Asdod.

² Kuwaniro natiwi iyaro Pettié muttama ri bola déwatana mennang, Dagon, sibawa napalénne ri seddéna dato'-dato' déwataéro.

³ Wettunna pabbanuwana Asdod pappa bajana éléé lao ri bola déwataéro, naitani mennang makkedaé dato'-dato' Dagon mabuwang moppanni ri tanaé, ri yolona Petti Assijancinna Puwangnge! Nakkani mennang iyaro dato'-dato'é nanapalisui ri onronna.

⁴ Iyakiya pappa bajana éléé, naitani mennang makkedaé iyaro dato'-dato'é sempé'si ri yolona Petti Assijancingngéro. Iyaé sisengngé ulunna iyaro dato'-dato'é sibawa iya duwa taiyyana malétta'i sibawa lénne ri sumpangngé; banna watakkaléna iyaro dato'-dato'é iya makkalépué mupa. (

⁵ Iyanaro saba'na, lettu essoéwé sining imanna déwata Dagon sibawa sininna tau sompaéngngi ri Asdod majjalékkaiwi sumpanna iyaro bolana Dagon sibawa dé' nalléjja'i.)

⁶ Nainappa nahukkung Puwangnge pabbanuwana Asdod nenniya daéra seddéna sibawa boro-boro ri tubunna mennang.

⁷ Wettunna mennang naita aga iya mattengngangngé kajajiyang ri mennanro, makkedani mennang, “Allataalana Israélié hukkukki silaong déwatata Dagon. Dé' nawedding rileppessang Petti Assijancingngé monro kuwaé lebbi maittapa.”

⁸ Rimakkuwannanaro naobbini iya lima arung Filistingngé kuwammengngi naddeppungeng, nainappa makkutana, “Iyaro Petti Assijancinna Puwang Allataalana Israélié harusu'i riyaga?” Nappébali iyaro sining arungngé, “Palétté'i ri kota Gat.” Jaji, napalétté'ni iyaro pettié lao ri kota Gat, séddi kota Filistin iya laingngé.

⁹ Iyakiya lettu'nana iyaro Pettié kuwaro, Puwangnge hukkung towi iyaro kotaé sibawa paompo alippuwang iya battowa senna'é. Iyaro pabbanuwana kotaé, muwi maloloé iyaré'ga macowaé rihukkungngi sibawa sining lettang iya tuwoé ri tubunna mennang.

¹⁰ Nainappa iyaro Petti Assijancingngé ritiwi ri Ekron, kota Filistin iya laingngéssi. Lettu'na iyaro Pettié kuwaro, gorani pabbanuwana, makkeda, “Iyaro Petti Assijancinna Allataalana Israélié ritiwii kumaiyé untu' mpuno manekki.”

¹¹ Rimakkuwannanaro naobbini mennang sininna arung Filistingngé kuwammengngi naddeppungeng, nainappa makkeda, “Palisuni iyaro Petti Assijancinna Allataalana Israélié ri onronna mammulangngé kuwammengngi aja' naunoki sibawa kaluwargata.” Ri sininna kotaé kajajiyanni alippuwangngé nasaba Allataala hukkungngi pabbanuwana sibawa matane senna.

¹² Sining tau iya dé'é namaté, nakennai lasa lettal-lettangngé, angkanna pabbanuwana iyaro kotaé gorani lao ri déwata-déwatana mennang, méllau tulung.