1 SAMUEL 31 - KITTA KAREBA MADECENG

Maténa Saul sibawa ana'-ana' worowanéna

¹ Na wettuéro mammusuni tau Filistingngé méwai tau Israélié ri Bulu Gilboa. Maéga tau Israél maté kuwaro, na iya laingngé, muttama'ni Saul sibawa ana'-ana' worowanéna larini.

² Iyakiya riyolaiwi ri tau Filistingngé na tellu tau polé ri ana'-ana' worowanéna Saulro maténi riyuno; iyanaritu Yonatan, Abinadab, sibawa Malkisua.

³ Masero senna'ni ammusurengngé ri seddéna Saul, na aléna paimeng nakennani pana-panana balié angkanna masero lona.

⁴ Namakkeda Saul lao ri kallolo iya tiwiéngngi senjatana, “Rampui peddammu namugajakka, kuwammengngi aja' nariyacculé-culéika sibawa riyunu risining tau iya temmissengngéngngi Puwang-ngéro.” Iyakiya iyaro kalloloé dé' namaélo gajangngi, nasaba napakalebbi senna'i. Rimakkuwannanaro nalani Saul peddanna nanaparebbai aléna ri yasé'na mata peddannaro.

⁵ Wettunna naita iyaro kalloloé makkedaé maténi Saul, naparebba toni aléna ri yasé'na mata peddanna namaté ri benrénna Saul.

⁶ Makkuwaniro Saul silaong iya tellu ana' worowanéna, sibawa sininna ana' buwana enrengngé kalloloéro maté riséddié essoro.

⁷ Wettunna sining tau Israél iya monroé ri liwenna Lompo Yizreel sibawa seddé alauna Salo Yordan naéngkalinga makkedaé larini tentara Israélié, sibawa Saul enrengngé ana'-ana' worowanéna maténi, larini mennang salaiwi kota-kotana. Nainappa tau Filistingngé tudangiwi kota-kotaéro.

⁸ Bajana wettunna polé tau Filistingngé untu' rampo'i sining ujué, naruntu'ni mennang Saul sibawa iya tellu ana' worowanéna maténi ri Bulu Gilboa.

⁹ Narette'ni mennang ulunna Saul sibawa nalai waju musuna, nainappa kiring suro tau Filistingngé lao ri sininna wanuwa Filistingngé untu' palettu'i karéba madécéngngéro ri ra'ya'na sibawa déwatana.

¹⁰ Nainappa iyaro waju musuna Saul nataroi ri laleng bola déwi Asytorét, na watakkaléna nappakuwangngi ri témbo'na kota Bét-Séan.

¹¹ Iyakiya pabbanuwana Yabésh ri Giléad naéngkalingai aga iya puraé napogau' tau Filistingngé lao ri Saul,

¹² nainappa sining tau iya kaminang baranié joppani polé kuwaro namallaleng puppu benni lao ri Bét-Séan. Napanonnoni mennang ujuna Saul sibawa ujuna ana'-ana' worowanéna polé ri témbo kotaéro nainappa natiwi ri Yabésh, nanatampungngi.

¹³ Sininna buku-bukunna napaddeppungengngi sibawa natampungngi ri yawana aju tamariskaé ri kotaéro, nainappa mappuwasani mennang pitungngesso ittana.