1 SAMUEL 3 - KITTA KAREBA MADECENG

Nappaitanna aléna Puwangnge ri Samuél

¹ Wettuéro, Samuél iya ana'-ana'é muparo tumaningiwi Puwangnge ri yawa anganrowangenna Eli. Iyaro wettué majarang senna engka paseng sibawa pakkitang polé ri Puwangnge.

² Riséuwaé wenni, Eli iya macowa senna'énna sibawa mawé'ni butaro, mattengngang matinro ri bili'na,

³ na Samuél matinroi ri seddéna Petti Assijancinna Puwangnge, ri laleng Kéma Mapaccingngé. Wettunna dé'pa naompo essoé sibawa malluwa mupa lampué,

⁴ Puwangnge mobbii Samuél, namappébali Samuél, “Iyyé, Pa'!”

⁵ Nainappa lari lao sita Eli sibawa makkeda, “Engka aga Pa'? Magi nariyobbika?” Iyakiya mappébaliwi Eli, “Dé' uwobbiko, atinrono paimeng.” Nainappa lao matinro paimeng Samuél.

^6-7 Nainappa Puwangnge mobbisi Samuél, iyakiya dé' naissengngi Samuél makkedaé iya mobbiéngngiro Puwangnge, nasaba dé'pa naengka Puwangnge nabbicara sibawa aléna. Rimakkuwannanaro moto'ni, nainappa naéwa sita Eli sibawa makkutana, “Engka aga Pa'? Magi taobbika Bapa'?” Nappébali Eli, “Dé' uwobbiko, ana'ku; atinrono paimeng.”

⁸ Untu' mabbékkatellunna Puwangnge mobbii Samuél; nanaoto'na Samuél nalao sita Eli sibawa makkeda, “Engka aga Pa'? Magi namangobbi Bapa'?” Iyatoro wettué namaingekiwi Eli makkedaé Puwangnge ritu mobbii iyaro ana'é.

⁹ Rimakkuwannanaro makkedani lao ri Samuél, “Atinrono paimeng, narékko riyobbiko paimeng akkedano, ‘Abbicarani, Puwang, maréngkalingai atam-Mu.’ ” Nanalaona Samuél ri onrong atinronna paimeng.

¹⁰ Nanapoléna Puwangnge, sibawa tettong ri onrongngéro namangobbi paimeng, “Samuél, Samuél!” Namappébali Samuél, “Abbicarani, Puwang, maréngkalingai atam-Mu.”

¹¹ Namakkedana Puwangnge lao ri aléna, “Maélo-Ka pogau'i séuwaé iya maseroé lao ri tau Israélié, angkanna tungke' tau iya méngkalingaéngngi malippui matu.

¹² Iyaro essoé maélo-Ka pogau'i sininna iya puraé Uwangancangeng lao ri kaluwargana Eli polé ri pammulanna lettu ri paccappurenna.

¹³ Purani Upaissengi aléna makkedaé Uhukkungngi matu kaluwargana untu' mannennungeng nasaba ana'-ana'na purai napakatuna-Ka. Naisseng Eli dosa-dosana mennanro, iyakiya dé' mennang nacairiwi.

¹⁴ Rimakkuwannanaro mattanroka passalenna kaluwargana Eli, makkedaé dosana mennang iya battowa senna'éro dé' nawedding riledda sibawa muwi akkarobangeng iyaré'ga pakkasuwiyang aga untu' mannennungeng.”

¹⁵ Purairo matinroni paimeng Samuél, na ri élénana moto'ni sibawa timpa'i sining tange'na Bolana Puwangnge. Métauni paissengiwi Eli iyaro pakkitangngé,

¹⁶ iyakiya riyobbii ri Eli, adanna, “Samuél, ana'ku.” Nappébali Samuél, “Iyyé Pa'.”

¹⁷ Nakkutana Eli, “Aga napowadakko Puwangnge? Curitangeng manekka. Rékko engka séuwa iya murahasiyakangngé, pasti nahukkukko Allataala.”

¹⁸ Nainappa Samuél paissengi manengngi iyaro Eli. Dé' gaga muwi séddi iya narahasiyakangngé. Nainappa makkedani Eli, “Aléna Puwang, leppessanni Napogau' aga iya Naangga'é makessing.”

¹⁹ Tattamba battowani Samuél. Puwangnge sibawangngi sibawa mébbui sininna iya napowadaé Samuél kajajiyang tongeng.

^20-21 Iyanaro saba'na sininna umma Israélié polé ri sininna wanuwaéro mangakuiwi makkedaé Samuél iyanaritu nabinna Puwangnge. Sises-siseng mabbicara Samuél, sininna bangsa Israélié méngkalingai. Matteru mupi Puwangnge mappaitangngi Aléna ri Silo, kégi untu' pammulanna mappaitang alé lao ri Samuél Namabbicara sibawa aléna.