1 SAMUEL 28 - KITTA KAREBA MADECENG

¹ Siyagangngaré wettu rimunrinna napangarani tau Filistingngé tentarana untu' gasai Israélié, namakkeda Akhis lao ri Daud, “Tentu mupahang makkedaé iko sibawa ana' buwamu harusu mammusu sibawakka.”

² Nappébali Daud, “Tentuni, naitapi matti Datu aga wedding napogau' atanna Daturo.” Nanakkeda Akhis, “Makessinni! Uwakkako mancaji pengawalku iya tette'é.”

Méllaunna pappakatajang Saul polé ri sanro pangobbi waliyalaé

³ Maténi Samuél sibawa riwatingi ri sininna Israélié enrengngé ritampung ri Rama, kotana muto. Siyagangngaré wettu iya labe'é purani ripaddésu ri Saul polé ri Israélié sininna pappalakiyaé sibawa pangobbi waliyalaé.

⁴ Na wettunna maddeppungeng tentara Filistingngé sibawa makkéma ri seddéna kota Sunem, napaddeppungeng toni Saul tau Israélié, sibawa makkéma mennang ri Bulu Gilboa.

⁵ Wettunna naita Saul tentara Filistingngéro, métau senna'ni.

⁶ Nainappa méllau panunju ri Puwangnge, iyakiya dé' naribali ri Puwangnge, muwi sibawa nippi iyaré'ga sibawa makkégunang Urim sibawa Tumim iyaré'ga naolai sining nabié.

⁷ Rimakkuwannanaro makkedani Saul lao ri sining pegawénna, “Sappano séddi sanro makkunrai pangobbi waliyala, maéloka lao ri aléna untu' méllau panunju.” Mappébalini mennang, “Ri En-Dor engka sanro pada-padaéro.”

⁸ Nanallarikkodona Saul kuwammengngi dé' nariisseng ri tauwé. Ritinrosi duwa tau worowané, joppani nanalettu ri bolana sanroéro ri wennié. Nanakkeda Saul, “Obbini waliyalana tau iya maéloé uteppu asenna, sibawa éllauni kuwammengngi nabotoi aga iya kajajiyangngé matu.”

⁹ Nappébali iyaro makkunraié, “Tentu naisseng toni Puwang makkedaé Arung Saul pura paddésu' manengngi polé ri Israélié pangobbi waliyalaé sininna pappalakiyaé sibawa sanro pangobbi waliyalaé. Magi Puwang nacobai cilakaika angkakku riyuno?”

¹⁰ Namattanro Saul, adanna, “Nasabbing Puwang iya tuwoé, majjancika makkedaé dé' narihukkukko matu nasaba mupogau'i gauéwé.”

¹¹ Nakkutana iyaro makkunraié, “Waliyalana niga harusu uwobbi untu' Puwang?” Nappébali Saul, “Waliyalana Samuél.”

¹² Wettunna iyaro makkunraié naita Samuél, gorani sibawa makkeda lao ri Saul, “Magi Puwang nabelléi atatta? Puwakku ritu palé Arung Saul!”

¹³ Nappébali arungngé, “Aja' mumétau! Powada bawanni aga muwita!” Nappébali iyaro makkunraié, “Naitai atatta engka roh mompo polé ri tanaé.”

¹⁴ Nakkutana Saul, “Pékkugi tappana?” Nappébali, “Séddi tau worowané iya macowaé. Mompoi mappaké jumba.” Nanaissenni Saul makkedaé iyanaro Samuél, nanasuju' pakalebbii.

¹⁵ Purairo makkedani Samuél lao ri Saul, “Magi mugangguka? Magi muwobbika lisu?” Nappébali Saul, “Malippu senna'ka nasaba rigasaka ri tau Filistingngé, nanasalaina Allataala. Dé'na nabalika, muwi naolai sining nabié, iyaré'ga nasibawang nippi. Rimakkuwannanaro uwéllauwi ri Bapa', kuwammengngi nappaissengengngi Bapa' aga iya harusu'é upogau'.”

¹⁶ Nanakkeda Samuél, “Aga akkégunana muwobbika nanasalaino Puwangnge sibawa mancajini balimmu?

¹⁷ Napogau'ni Puwangnge lao ri iko pada-pada iya puraé Napowada naolai iyya. Nalani Puwangnge akkarungeng Israélié polé ri iko nanawéréngngi Daud.

¹⁸ Purai muéwa paréntana Puwangnge sibawa dé' mumaélo paccappui tau Amalé'é enrengngé sininna appunnangenna mennang. Iyanaro saba'na makkekkuwangngé narigaukeng makkuwaéko ri Puwangnge.

¹⁹ Iko sibawa sining tau Israélié riyabbéréyakko matu ri tau Filistingngé. Baja iko sibawa ana'-ana' worowanému maddeddungenno sibawa iyya; mala sininna tentara Israélié nabbéréyang towi matu Puwangnge lao ri tau Filistingngé.”

²⁰ Iyatoro wettué, narebba lénne Saul ri tanaé pada-pada nakennaé letté, saba' tasséleng senna'i méngkalingai ada-adanna Samuélro. Nainappani malemma senna'i, saba' siessoni siwenni dé' aga-aga nanré.

²¹ Naddeppérini Saul iyaro sanroé sibawa naitani makkumani tauna; rimakkuwannanaro makkedani iyaro makkunraié lao ri aléna, “Puwakku, purani atatta mappésona untu' pogau'i aga naéllauwé Puwang.

²² Jaji, sitinajai Puwakku naéngkalinga towi paréllaunna atatta; anréni céddé inanré iya maéloé napatala atatta kuwammengngi naulléi Puwang patterui joppana Puwang.”

²³ Massampéyangngi Saul sibawa makkeda makkedaé dé' namaélo manré. Iyakiya wettunna pegawé-pegawénnato dessa'i, turuni. Tettonni polé ri tanaé nanatudang ri panrung-panrungngé.

²⁴ Masitta'ni iyaro makkunraié géréi ana' sapinna iya macommo'é nanala labbu nanalamai, nainappa naébbu mancaji roti iya dé'é narragi.

²⁵ Purairo napatalani iyaro inanré lao ri Saul sibawa pegawé-pegawénna, nainappa mennang manré. Purairo laoni mennang iyatoro wennié.