1 SAMUEL 22 - KITTA KAREBA MADECENG

Riyunona sining imangngé

¹ Nanasalaini Daud kota Gat namassubbu ri gowa seddéna kota Adulam. Wettunna kaka-kakana sibawa sininna kaluwargana naéngkalinga makkedaé engkai kuwaro, laoni mennang ri Daud.

² Makkuwatoro sining tau ritenre'é, iya mappunnaiyé inreng, sibawa iya marasa dé'é namasennang, iya manenna masséddini sibawa Daud, na Daud mancaji pamimpinna mennang. Jumellana tau maccowériyéngngi Daud engka kira-kira 400 tau.

³ Polé ri gowaéro laoni Daud ri Mizpa ri Moab sibawa makkeda lao ri arunna wanuwa Moab, “Palaloni ambo' sibawa indo'na atatta monro ri Puwakku, narapi naisseng atatta aga akkattana Allataala lao ri atatta.”

⁴ Nanatiwini iyaro tomatowanna ri arunna wanuwa Moab, namattette'na mennang kuwaro ri wettu massubbunna Daud ri gowaéro.

⁵ Riséuwaé esso engka séddi nabi riyaseng Gad lao ri Daud sibawa makkeda, “Aja' muwonro ri gowaéwé, laono masitta ri tana Yéhuda.” Nalaona Daud sibawa muttama ri ale' Kérét.

⁶ Riséuwaé esso tudangngi Saul ri yawana aju tamariskaé ri tompo'na bulu-bulué ri Gibéa; nakkatenningngi bessinna nasininna parawirana tettongngi mattulilingiwi. Wettunna naéngkalinga makkedaé onronna Daud sibawa ana' buwana naissenni,

⁷ makkedani lao ri sininna parawiranaro, “Engkalingai, éh sining tau Bényamingngé! Aga iyaro Daud maéloi mpérékko dare sibawa palla anggoro? Aga nakka manekko matu mancaji parawira ri laleng tentarana?

⁸ Iyanaro saba'na namasséddi méwaka nadé' muwi séddi tau paissengika makkedaé ana'ku paimeng maccowé toni ri Daud? Dé' muwi séddi tau polé ri iko pikkiri'i aléna iyaré'ga paissengika makkedaé Daud, ana' buwakuto, makkekkuwangngé mattajengngi kasempatang untu' mpunoka, na ana'ku Yonatan pura mpéréngngi dorongang lao ri aléna!”

⁹ Doég kapala pakkampi olokolo'na Saul, engka towi kuwaro silaong sining parawirana Saul, nanakkeda Doég, “Atatta pura mitai Daud lokkaiwi Ahimélékh ana' Ahitub ri Nob.

¹⁰ Méllauni Ahimélékh panunju ri Puwangnge passalenna aga iya harusu'é napogau' Daud. Rilainnaéro ripabokongi towi Daud inanré enrengngé peddanna Goliat, tau Filistingngéro.”

¹¹ Nanassurowanni arungngé mobbii Imang Ahimélékh sibawa sininna sumpulolona iya mancaji imangngé ri Nob; namangolona mennang ri aléna.

¹² Nakkeda Saul lao ri Ahimélékh, “Engkalingai, éh ana' Ahitub!” Pappébalinna, “Iyyé, Datu.”

¹³ Nakkutana Saul ri aléna, “Magi musipekke Daud méwaka? Magi mupabokongiwi roti sibawa muwéréngngi peddang enrengngé muwéllaungengngi panunju polé ri Allataala? Jaji makkekkuwangngé naéwaka sibawa mattajenni kasempatang untu' mpunoka.”

¹⁴ Nanappébali Ahimélékh, “Tenniyaga Daud parawirana Datu iya kaminang matinulué? Ménéttunna topa Datu, kapala pengawalna Datu, sibawa ripakalebbi senna'i ri sininna tauwé ri laleng saorajana Datu.

¹⁵ Mémeng, purai atatta méllaungengngi panunju polé ri Allataala untu' aléna, iyakiya tenniya untu' mammulanna atatta pogau'i iyaro. Passalenna assipekkekengngé méwai Datu, aja' Datu nateppui atatta iyaré'ga muwi séddi tau ri laleng kaluwargana atatta. Dé' gaga naisseng atatta passalenna gau'éro!”

¹⁶ Iyakiya makkedai arungngé, “Ahimélékh! Iko sibawa sininna kaluwargamu harusu'i maté.”

¹⁷ Nainappa napparéntang lao risining pengawal iya tettongngé ri seddéna, “Ayo, unoi iyaro sining imanna Puwangnge! Sikongkolo'ni mennang sibawa Daud. Naisseng mennang makkedaé lariwi Daud, iyakiya dé' namaélo paissengika.” Iyakiya iyaro sining pengawal-é dé' namaélo mpunoi iyaro imang-ngimanna Puwangnge.

¹⁸ Rimakkuwannanaro makkedani Saul lao ri Doég, “Ayo, asitta'no! Iko bawanna mpunoi mennang!” Nanalluruna Doég nanaunoi iyaro imang-ngimangngé. Iyaro essoé naunoni aruwa pulona lima tau imang iya mappunnaiyé ha' paké waju éfod.

¹⁹ Napparéntang towi Saul mpunoi sininna pabbanuwana Nob, kota imangngéro; worowané, makkunrai, ana'-ana' sibawa ana'lolo, makkuwatoro sapingngé, kaleddé'é sibawa bimbala'é, iya manenna napaccappui nyawana.

²⁰ Banna Abyatar, séddiwi polé ri ana'-ana'na Ahimélékh mulléi leppe. Lariwi lao ri Daud,

²¹ nainappa napowadang makkedaé purani nauno Saul sining imanna Puwangnge.

²² Nakkedana Daud lao ri aléna, “Wettunna uwita Doég kuwaro iyaro essoé, uwissenni sibawa mattentu makkedaé mappissengngi matu ri Saul. Jaji iyya ritu mattanggung jawa' ri amaténna sininna sumpulolomu.

²³ Onrono silaongekka sibawa aja' mumétau. Macinnai Saul mpunoko, iyakiya macinna towi mpunoka. Jaji, amakko matu ri onrokku.”