1 SAMUEL 21 - KITTA KAREBA MADECENG

Larinna Daud polé ri Saul

¹ Nalaona Daud ri Imang Ahimélékh ri Nob. Namasélenna Ahimélékh massu méwai sita Daud sibawa makkutana ri aléna, “Magi mulao mai alé-alému bawang?”

² Nappébali Daud, “Riwérékka séuwa jamang ri datu nanattéyangngi riyappaissengeng lao ri muwi séddi tau passalenna jamangngéro. Rimakkuwannanaro ana' buwaku usuroi mattajeng riséuwaé onrong.

³ Taddampengekka, makkekkuwangngé macinnaka makkutana, inanré aga iya engkaé ri Bapa'? Wérékka limabbatu roti iyaré'ga agi-agi iya engkaé kuwaé.”

⁴ Namakkeda iyaro imangngé, “Dé' uwappunnai roti biyasa, banna roti pakkasuwiyang iya engkaé; weddikko malai, assaleng ana' buwamu dé' nalluséreng nappa-nappaéwé.”

⁵ Nappébali Daud, “Tentu mennang dé' napogau'i. Rékko tuli tugaski, najagai ana' buwaku kuwammengngi namapaccing mennang situru agamaé, padahal abiyasanna iyaro banna untu' tugas-tugas biyasaé; apalagi tugas iya dé'é pada-padanna makkekkuwangngéwé!”

⁶ Nanabbéréyanni iyaro imangngé lao ri Daud roti pakkasuwiyangngéro, saba' iya engkaé ri aléna banna roti iya riyakkasuwiyangengngé lao ri Allataala, sibawa purani riyakka polé ri mézbaé untu' risulléi sibawa roti baru. (

⁷ Nasitujuwangngi, Doég tau Edongngé, kapala pakkampi olokolo'na Saul engkai kuwaro ri essoéro untu' rupaiwi séuwa kewajibang agama.)

⁸ Nanakkutanana Daud lao ri Ahimélékh, “Aga Bapa' taro bessi iyaré'ga peddang iya weddingngé upaké? Iyaro paréntana datu masitta senna angkanna joppaka mapperi-peri senna nadé'na urapini mala peddang iyaré'ga sanjata iya laingngé.”

⁹ Nappébali Ahimélékh, “Iyya taroi peddanna Goliat, tau Filistin iya muwunoé ri Lompo Elaro; iyaro peddangngé engkai ri munrinna éfod-é, ridoko ri laleng kaingngé. Rékko maéloko, ala bawanni, saba' banna iyaro sanjata iya engkaé kuwaé.” Nakkeda Daud, “Iyaro peddangngé, peddang kaminang makessing ri sininna wanuwaé, wérékka iyaro!”

¹⁰ Iyatoro essoé nalari Daud polé ri Saul, nanalettu'na ri Akhis, arunna kota Gat.

¹¹ Ripaissengini Akhis risining pegawénna makkuwaé, “Tenniyaga iyaé Daud, arung ri wanuwanna? Sibawa tenniyaga untu' aléna sining makkunraié wettuéro séré-séré sibawa makkélong towi makkuwaé, ‘Saul mpunoi massebbu-sebbu bali, iyakiya Daud mappulo-pulo sebbu?’ ”

¹² Iyaro ada-adaé naganggui pikkiranna Daud, namétau senna'na lao ri Arung Akhis.

¹³ Rimakkuwannanaro, najjaini Daud jangeng ri yolona tau maégaé. Wettunna mennang nacoba tahangngi, samannai tau maoja-oja'; nakarebbéi pintu gerbanna kotaé sibawa naleppessangngi bébbé élona ri janggo'na.

¹⁴ Nanakkeda Akhis lao risining pegawénna, “Dé'ga muwitai makkedaé iyaro tauwé jangengngi? Magi mutiwii kumaiyé?

¹⁵ Makurang mupaga tau maoja-oja' ri seddéku, angkanna mutiwirekka séddi tau jangessi ri bolakué?”