1 SAMUEL 20 - KITTA KAREBA MADECENG

Ritulunna Daud ri Yonatan

¹ Nalarina Daud polé ri Nayot seddéna Rama nalao méwai sita Yonatan, namakkutana, “Aga asalakku? Ja aga pura upogau' sibawa aga dosaku lao ri ambo'mu angkanna maéloi mpunoka?”

² Nappébali Yonatan, “Aja' muwakkeda makkuwaro! Nasabbing Puwangnge, dé' nariyunoko matu. Tuli napowadakka ambo'ku sininna rancanana, muwi iya pentingngé, iyare'ga dé'é. Jaji dé' nakkullé narahasiyakang iyaro akkattana lao ri iyya. Rimakkuwannanaro, aga iya mupowadaéro dé' natongeng!”

³ Nappébali Daud, “Naisseng madécéng ambo'mu makkedaé mupojika. Jaji pasti dé' namaélo paissengiko gau'éro kuwammengngi dé' mumessé. Muwi pékkugi, nasabbing Puwang iya tuwoé, sitongenna atuwokku pada-padai ittelloé ri cappa tanru'é!”

⁴ Namakkedana Yonatan, “Agi-agi muwéllau maéloka pogau'i.”

⁵ Nappébali Daud, “Makkuwaiyé, baja iyanaritu Pésta Uleng Baru, na harusu'ka manré sisama datu. Iyakiya rékko musitujuiwi, maéloka lao sibawa massubbu ri padangngé narapi sangadi ri wennié.

⁶ Rékko nakkutangngi ambo'mu magi udé', powdangngi makkedaé puraka méllau paramisi ri iko untu' lisu masitta ri Bétléhém, nasaba ripakangkai kuwaro upacara akkarobangeng pattaungeng untu' sininna kaluwargaku.

⁷ Rékko makkedai arungngé, ‘Madécénni,’ amanna matu, iyakiya rékko macayii, issenni makkedaé purani mala apettung untu' cilakaika.

⁸ Uwéllauwi pattulummu, nasaba puraki siyo assijancing ri yolona Puwangnge. Iyakiya rékko pasalaka, unoka, iyakiya aja' muwabbéréyakka lao ri ambo'mu.”

⁹ Nappébali Yonatan, “Aja' mubata-bata! Rékko uwissengngi sibawa pasti makkedaé mattedde'ni ambo'ku untu' cilakaiko, mattentuni upaissengiko matu.”

¹⁰ Nainappa makkutana Daud, “Nigana maélo paissengika akkalarapanna nabaliko ambo'mu sibawa macai?”

¹¹ Nakkeda Yonatan, “Laono mai talao ri padangngé.” Nasilaonna mennang lao ri padangngé.

¹² Nanakkeda Yonatan lao ri Daud, “Tennapodo Puwangnge, Allataalana Israélié mancaji sabbitta! Baja éléé iyaré'ga sangadi kira-kira ri wettu pada-padaé makkekkuwangngéwé, maéloka makkuraga missengngi lise atinna ambo'ku. Rékko kédo makessing muwi lao ri iko, kirikka matu karéba lao ri iko.

¹³ Rékko manniya'i cilakaiko, pasti upaissengi tokkko matu kuwammengngi mulléi passalama'i alému. Tennapodo naunoka Puwangnge rékko dé' upogau'i gau'éro. Tennapodo Puwangnge tulukko pada-pada purana ritulutto!

¹⁴ Narékko tuwo mupa, éngngerangngi assijancitta ri yolona Puwangnge sibawa atinuluno ri iyya; iyakiya rékko dé'na gaga,

¹⁵ appaitanni atinuluremmu lao ri wija-wijakku untu' mannennungeng. Sibawa rékko napaccappui Puwangnge sininna balikku,

¹⁶ aja' napettu assijancitta sipadduwa. Rékko pettui, Puwangnge ritu hukkukko.”

¹⁷ Jaji untu' mabbékkaduwanna Yonatan suroi Daud majjanci maélo mamaséiwi, saba' namaséiwi Daud pada-pada aléna muto.

¹⁸ Nainappa makkeda Yonatan lao ri aléna, “Baja Pésta Uleng Baru. Pasti kaissengeng matu makkedaé dé'ko gaga, saba' lobbangngi onrommu ri méjang anréngngé;

¹⁹ apalagi sangadi! Rimakkuwannanaro, laono ri onrong allekkekemmu riyoloro, nomuwattajeng ri munrinna goppo batué kuwaro.

²⁰ Maéloka leppessang tellu ana' pana sangadi mattuju ri batuéro, samanna mannémba séuwaé akkatta.

²¹ Nausuroi matu atakku mittéi iyaro pana-panaé, narékko makkedaka lao ri aléna, ‘Ai, lebbi macawé'mi iyaro panaé kumaiyé; alani,’ iyaro bettuwanna makkedaé amakko sibawa weddikko massu. Mattanroka nasabbing Puwangnge iya tuwoé makkedaé dé'ko ri laleng bahayaé.

²² Iyakiya rékko makkedaka lao ri atakku, ‘Ai, iyaro panaé lebbi mabélapi lao kuwaro,’ iyaro bettuwanna Puwangnge suroko lao; jaji laono.

²³ Tennapodo Puwangnge jagaiki kuwammengngi natuli takkatenningngi assijancitta sipadduwa.”

²⁴ Namallekke'na Daud ri padangngé. Ri Pésta Uleng Baru, laoni Arung Saul ri anréngngé.

²⁵ Pada-pada biyasanna tudangngi ri seddéna renringngé; Yonatan mala onrong ri yolona, Abnér ri seddéna Saul, iyakiya kadérana Daud tette'i lobbang.

²⁶ Iyakiya dé' nasinggungngi Saul iyaro keadaangngé ri essoéro, saba' pikkiri'na, “Naullé kapang engka kennai, angkanna dé' namapaccing situru agamaé.”

²⁷ Ri esso rappina, iyanaritu esso maduwaé Uleng Barué, kadérana Daud lobbang mupi, namakkutana Saul ri Yonatan, “Magi wenni sibawa essoéwé dé'i gaga Daud ri anréngngé?”

²⁸ Nappébali Yonatan, “Purai méllau paramisi ri iyya untu' lao ri Bétléhém.

²⁹ Adanna, ‘Palaloka lao, nasaba kaluwargaku naramé-raméiwi pésta akkarobangengngé ri Bétléhém, nanasuroka kakaku polé. Rimakkuwannanaro, rékko mupalaloka, leppessanna lao untu' sita sibawa sumpuloloku.’ Iyanaro saba'na nadé'i gaga ri anréngngéwé, Ambo'.”

³⁰ Naéngkalinganaro macai senna'ni Saul lao ri Yonatan sibawa makkeda ri aléna, “Ana' harang! Uwissenni makkekkuwangngé makkedaé maccowéko ri Daud sibawa pakasirii alému sibawa indo'mu!

³¹ Dé'ga mumainge makkedaé sipongenna tuwo mupi Daud dé' namakkulléko matu mancaji arung ri wanuwaéwé? Suroni makkekkuwangngé tauwé sappai sibawa tiwii lao mai, saba' harusu'i maté!”

³² Namappébali Yonatan, “Magi naharusu maté? Aga dosana?”

³³ Naéngkalinganaro naddawukenni bessinna Saul lao ri Yonatan maélo mpunoi. Nanaissenni Yonatan makkedaé mémeng ambo'na tonget-tongengngi manniya maélo mpunoi Daud.

³⁴ Namacai senna'na Yonatan salaiwi méjang anréngngé sibawa dé' aga-aga nanré ri esso maduwanna Pésta Uleng Baruéro. Messé senna'ni pikkiri'i Daud iya puraé ripakatuna ri Saul ambo'na.

³⁵ Pappa bajanana laoni Yonatan ri padangngé untu' siruntu Daud pada-pada iya puraé mennang narancana massibawa. Tiwii séddi ana' worowané, atanna,

³⁶ namakkeda ri aléna, “Ayo, ittéi pana-pana iya uwappanangngé matu.” Wettunna lari iyaro ana'é, nappanangenni Yonatan séddi ana' pana liwengngi iyaro ana'é.

³⁷ Wettunna iyaro ana'é lettu ri onrong nateppaiyé iyaro panaé, gorani Yonatan lao ri aléna, “Ai, iyaro panaé lebbi mabéla mupi lao kuwaro!

³⁸ Agattiko céddé, aja' mujampaléllé!” Iyaro ana'é naitténi iyaro panaé nanalisu ri puwanna.

³⁹ Dé' sises-siseng napahangngi akkattana ada-adanna Yonatanro, banna Yonatan sibawa Daud ritu pahangngi.

⁴⁰ Nainappa nabbéréyang Yonatan pakkakkasa appananna lao ri ana'éro nanasuroi lisu ri kotaé.

⁴¹ Laonana iyaro ana'é, massuni Daud polé ri munrinna goppo batuéro, nanasuju' wékkatellu. Muwi aléna iyaré'ga Yonatan, teri duwani wettunna sibau mennang. Amessénna Daud lebbi battowai naiya amessénna Yonatan.

⁴² Nainappa makkeda Yonatan lao ri Daud, “Tennapodo Allataala tulukko. Puwangnge tanggungngi matu makkedaé idi sibawa wija-wijatta tuli makkatenningngi assijancitta sipadduwa ri yolona Allataala.” Purairo laoni Daud, nalisu tona Yonatan ri kotaé.