1 SAMUEL 2 - KITTA KAREBA MADECENG

Sempajanna Hana

¹ Namassempajanna Hana, adanna, “Napérennuiwi atikku Puwangnge; pangkaukenna Napésennangiwi nyawaku. Nasibawang ariyo-riyong uwéllékéllé'i balikku, saba' tonget-tongengngi Allataala pura tulukka.

² Dé' gaga iya mapaccingngé pada-pada Puwangnge! Banna aléna iya mullé mabbéré allinrungeng.

³ Pappésauni abborommu iya kosongngé! Pappésauni bicara matempoé! Saba' iyaro Puwangnge Allataala Iya Pommajeppué; iya madélékiyéngngi sinininna pangkaukenna tauwé.

⁴ Poloni panana pahlawangngé, iyakiya pédé mawatangngi tau malemmaé.

⁵ Tau iya messoé riyolo nasaba maonai anré, mancaji pajjama ripéssaroiyé banna untu' lolongeng inanré. Tau iya alupurengngé riyolo, makkekkuwangngé messoni, genne inaré. Bainé manangngé, matemponi makkekkuwangngé, pituni ana' najajiyang! Iyakiya indo' iya maégaé ana'na, risalai, rileppessang maddokoroko.

⁶ Mappamaté Puwangnge, mappatuwo towi. Napanonnoi tolinoé ri linona tau maté. Na Alénato makkai polé kuwaro.

⁷ Engka tau iya Naébbué kasiyasi, engkato Naébbu sugi. Engka tau Napakariyawa, engkato Napakatanré.

⁸ Polé ri apeddirengngé Naakkai tau dé'é angke'na, polé ri anrasa-rasangngé Napaleppe'i tau iya matunaé. Ripancajiwi mennang sellaona sining arungngé, sibawa riwéréng jabatang malebbi. Pallanggana linoé nappunnaiwi Puwangnge, ri yasé'na Napatettongngi linoé.

⁹ Tau matinulué tuli amangngi ri laleng allinrungenna Puwangnge. Iyakiya iya majaé ancuru'i binasa ri laleng kalemmengngé sibawa pettak-kape'é. Awatangeng ri alé dé' nawedding riyattuwang, awatangenna tolinoé dé' nabbéré apakalang.

¹⁰ Sining balinna Puwangnge ancuru'i maccabbu, métaui mennang; polé ri langié Aléna magguttu. Puwangnge maélo madéléki sininna linoéwé, sibawa mabbéré akuwasang iya malebbié lao ri arung iya Napilé.”

¹¹ Nanalisuna Elkana sibawa kaluwargana ri Rama, iyakiya Samuél, ana'éro, monroi ri Silo sibawa tumaningiwi Puwangnge ri yawa pajjagana Imang Eli.

Ana'-ana'na Eli

¹² Maja senna ana'-ana'na Eli. Dé' mennang nabati-batiwi Puwangnge

¹³ sibawa selaku imang maggau' siélo-élonai mennang lao ri bangsa Israélié. Rékko ébara'na engka tau makkasuwiyangeng akkarobangeng, poléi pabbantu imangngé tiwi sondo tellué isinna. Ri wettu rinasunna mupa iyaro jukué,

¹⁴ iyaro sondo'é nattoddokengngi ri laleng panci onronna jukuéro rinasu, nainappa agi-agi nagetteng massu sibawa sondo'éro mancajiwi appunnangenna imangngé. Sininna tau Israél iya laowé ri Silo untu' makkasuwiyangeng akkarobangeng nagaukengngi pada-padaro.

¹⁵ Mala biyasai iyaro pabbantué poléi ri wettu dé'napa naripallaing lunra'na untu' ritunu, nainappa makkeda lao ri tau iya makkasuwiyangengngéngngi iyaro akkarobangengngé, “Wéréngngi imangngé juku iya mamataé muparo kuwammengngi napanggangngi; dé' namaélo tarima juku rinasu.”

¹⁶ Rékko mappébaliwi iyaro tauwé, “Madécéngengngi taturusi peraturangngé, sibawa tunui iyaro lunra'é riyolo; purairo weddinni muwala siélo-élomu,” namakkeda iyaro pabbantué, “Dé', makkekkuwangngétto harusu'i muwabbéréyang, rékko dé', uwalai matu sibawa passa.”

¹⁷ Makkuwaniro iya duwa ana'na Eliro madosa battowa ri pakkitanna Puwangnge, nasaba napakatunai pakkasuwiyang akkarobangeng untu' Puwangnge.

Samuél ri Silo

¹⁸ Na wettuéro, Samuél iya anana'é muparo matterui tumaningiwi Puwangnge. Pakéi waju ripallaing polé ri kaing lénangngé, pada-pada waju assompanna sining imangngé.

¹⁹ Tungke' taung indo'na mébbu jumba baiccu nanawéréngngi Samuél rékko iyaro makkunraié silaongngi lakkainna poléi makkasuwiyangeng akkarobangeng pattaungeng.

²⁰ Nanabarakkakini Eli Elkana sibawa bainéna, sibawa makkedai lao ri Elkana, “Tennapodo Puwangnge mpéréssiko ana'-ana' polé ri bainémué, untu' sulléiwi ana' iya puraé muwabbéréng lao ri Puwangnge.” Purairo lisuni mennang ri Rama.

²¹ Ribarakkakini Hana ri Allataala, angkanna jajiyassi tellu ana' worowané sibawa duwa ana' makkunrai. Napédé battowa tona Samuél ri laleng natumaninginna Allataala.

Eli sibawa ana'-ana'na

²² Macowa senna'ni Eli. Naéngkalingai matteru-teru appissengengngé passalenna kédo-kédona ana'-ana'na lao ri tau Israélié. Naisseng towi Eli makkedaé iyaro ana'-ana'na matinroi silaong sining makkunrai iya mangonrowangngé ri yolona sumpang Kéma Ahadérékenna Puwangnge.

²³ Rimakkuwannanaro makkedani lao ri ana'-ana'na, “Purana tarima laporang polé risininna umma'e passalenna kédo-kédomu iya majaé. Magi mupogau'i iyaro?

²⁴ Aja'na mupogau'i makkuwaéro paimeng, ana'ku. Maja senna aga nacurita umma'na Puwangnge passalemmu!

²⁵ Rékko pasalai tauwé lao ri tolinoé, naulléi Allataala méwaiwi; iyakiya rékko madosai tauwé lao ri Puwangnge, nigana mulléi tulungngi?” Iyakiya dé' mennang nabati-batiwi pangajana Eli ambo'na, saba' purani napettui Puwangnge untu' mpunoi mennang.

²⁶ Sibalé'na Samuél, ana'éro, pédé battowai sibawa pédé ripoji, muwi Puwangnge, iyaré'ga sininna tauwé.

Botona passalenna kaluwargana Eli

²⁷ Riséuwaé esso poléni séddi nabi ri Eli sibawa palettu'i paseng polé ri Puwangnge ri aléna, adan-Na, “Wettunna toriyolomu Harun sibawa kaluwargana mancaji atanna arung Maséré, purani Uwappaddisengeng alé-Ku lao ri Harun.

²⁸ Polé risininna suku Israélié purani Upilé kaluwargana mancaji imak-Ku, untu' mattumani ri mézbaé, mattunu dupa, sibawa pakéi waju éfod rékko mabbicarai sibawa Iyya. Sibawa lao ri mennang sibawa wija-wijanna purani Uwéréng ha' untu' malai sibagiyang polé ri akkarobangeng pakkasuwiyang iya ritunué ri mézbaé.

²⁹ Jaji, magi mumangowa mupa mitai sining akkarobangeng iya siturué sibawa parénta-Ku, nakkasuwiyangeng bangsa-Ku lao ri Iyya? Magi iko Eli, lebbi mupakalebbii ana'-ana'mu naiya pakalebbi-Ka, sibawa leppessangngi mennang pakacommokiwi aléna sibawa bagiyang iya kaminang makessingngé polé ri tungke' pakkasuwiyanna bangsa-Ku lao ri Iyya?

³⁰ Iyya, Puwang Allataalana Israélié, pura majjanci riyolo, makkedaé kaluwargamu sibawa appammu tumaningika matu selaku imang untu' mannennungeng. Iyakiya makkekkuwangngé dé' Upuwéloi gau'éro! Saba' iya pakalebbiék-Ka, Upakalebbii matu iyakiya iya pakatunaék-Ka, Upakatunai matu.

³¹ Engkalingai, poléi matu wettunna Uwunoi sininna kalloloé ri laleng kaluwargamu sibawa appammu, angkanna dé' muwi séddi worowané ri laleng kaluwargamu rapii matu umuru macowa.

³² Messéko matu sibawa mangémpuru mitai sininna barakka iya uwabbéréyangngé matu lao risining tau laingngé ri Israélié, na ri laleng kaluwargamu maté malolo manengngi matu.

³³ Iyakiya, séddi tau polé ri wija-wijammu, Uleppessang matu tuwo sibawa tumaningi-Ka selaku imang. Iyakiya aléna mancaji butai matu nenniya tuwo sibawa pettu paddennuwang. Sininna wija-wijammu iya laingngé matéi matu.

³⁴ Selaku butti makkedaé sininna iya Upowadaéro tongengngi kajajiyang matu, Hofni sibawa Pinéhas matéi matu ri laleng siessoé.

³⁵ Nainappa piléka matu imang iya matinulué ri Iyya sibawa iya pogau'éngngi aga iya Uparéntangngéngngi. Uwéréngngi matu wija-wijanna iya tuli majjamaé matu selaku imang ri yolona arung-ngarung iya Upilé.

³⁶ Tungke' wijammu iya tuwoé mupa, laowi matu ri imangngéro untu' méllau dowi sibawa inanré. Naéllauwi matu, Palaloka bantui sining imangngé, kuwammengngi weddikka manré namuni banna sitémpu bawang.”