1 SAMUEL 19 - KITTA KAREBA MADECENG

Rilellunna Daud ri Saul

¹ Makkedani Saul lao ri Yonatan ana' worowanéna, sibawa lao ri sininna pegawénna makkedaé maéloi mpunoi Daud. Iyakiya Yonatan napoji senna'i Daud,

² rimakkuwannanaro makkedani lao ri Daud, “Makkuragai ambo'ku mpunoko; jaji atutuko! Assubbuko baja éléé riséuwaé onrong rahasiya, sibawa onrono kuwaro.

³ Maéloka lao ri padangngé silaong ambo'ku sibawa tettong ri seddéna onrong muwassubbuiyéro. Nainappaka mabbicara matu sibawa ambo'ku passalenna akkattana lao ri iko, na wassélé'na iyaro assipabbicarangngé upaissengipo matu.”

⁴ Nainappa napau madécénni Yonatan passalenna Daud lao ri Saul, adanna, “Ambo', aja' Ambo' tacilakaiwi atammu Daud. Saba' dé' aga-aga asalang napogau' lao ri Ambo'; mala sibalé'na, masero appalanna lao ri Ambo'.

⁵ Purani nappésonang nyawana wettunna nauno Goliat, sibawa Puwangnge pura mpéréngngi apakalang battowa lao ri Israélié naolai aléna. Aléna Ambo' pura mitai kajajiyangngéro, sibawa marennu Ambo' wettuéro. Jaji magi makkekkuwangngé namaélo Ambo' callai tau iya dé'é napasala sibawa maélo mpunoi Daud temmakkéalasang?”

⁶ Mainge'ni Saul polé ri ada-adanna Yonatan, namattanrona ri laleng asenna Puwangnge makkedaé dé' namaélo mpunoi Daud.

⁷ Purairo riyobbini Daud ri Yonatan, sibawa curitangngi sininna assipabbicarangngé onna. Nainappa natiwi Daud lao ri Saul, na Daud natumaningini pada-pada riyolo.

⁸ Nainappa kajajiyassi musué sibawa tau Filistingngé. Nagasani Daud sibawa nacau sisengngi mennang, angkanna lari mennang.

⁹ Riséuwaé esso tudat-tudangngi Saul ri bolana sibawa bessi ri limanna natappa napoléisi Saul roh maja iya nasuroé Puwangnge. Iyaro wettué mattengngangngi Daud macculéyangngi kacapinna.

¹⁰ Namakkuragana Saul paddince'i bessinna ri Daud iya engkaé ri seddéna renringngé. Iyakiya lésséi Daud, angkanna iyaro bessié maddince ri renringngé. Larini Daud untu' passalama'i aléna.

¹¹ Iyatoro wennié nakiring Saul siyagangngaré taunna lao ri bolana Daud untu' mata-mataiwi Daud sibawa mpunoi ri éléna. Iyakiya Mikhal bainéna makkedai lao ri Daud, “Rékko dé' mulari iyaé wennié, baja éléé pasti riyunoko.”

¹² Nainappa Mikhal panonnoi Daud polé ri tellongengngé, nanalarina Daud angkanna leppe.

¹³ Purairo nalani Mikhal dato'-dato' ruma tanggana nanapalénne'i ri onrong atinronna Daud. Nainappa ri bagiyang ulunna nataroi angkalungung polé ri bulu bémbé'é, nainappa naparampaki iyaro dato'-dato'é sibawa parampa.

¹⁴ Wettunna polé sining surona Saul untu' tikkengngi Daud, makkedani Mikhal, “Malasai Daud.”

¹⁵ Iyakiya risuroi paimeng ri Saul lao kuwaro untu' mitai Daud sibawa mata ri aléna mennang. Paréntana, “Tiwii lao mai sibawa onrong atinronna, kuwammengngi uwunoi.”

¹⁶ Nauttama'na iyaro suroé ri laleng bili'é na annessana dato'-dato' ritu lénne ri onrong atinrongngé sibawa angkalungung bulu bémbé ri bagiyang ulunna.

¹⁷ Makkedani Saul lao ri Mikhal, “Melle nyawamu belléka makkuwaé! Mutulungngi balikku lari!” Nappébali Mikhal, “Naancakka maélo mpunoka rékko dé' umaélo bantui lari.”

¹⁸ Leppe'nana Daud, laoni ri bolana Samuél ri Rama, nanapaissengi manengngi sininna iya napogau'é Saul lao ri aléna. Nainappa silaonni Daud sibawa Samuél lao ri Nayot nanaonro kuwaro.

¹⁹ Iyakiya ripaissengiwi Saul makkedaé engkai Daud ri Nayot seddéna Rama.

²⁰ Rimakkuwannanaro kirinni Saul siyagangngaré suro untu' tikkengngi Daud. Iyakiya napoléiwi mennang sikonrong nabi iya mattengngangngé séré-séré sibawa gora-gora massama-samang, ripimping ri Samuél. Nainappa iyaro sining surona Saul rikuwasai ri Rohna Allataala angkanna mammula toni mennang séré-séré sibawa gora-gora.

²¹ Wettunna lettu iyaro karébaé ri Saul, kirinni sining suro laingngé nammula tona mennang séré-séré sibawa gora-gora. Untu' mabbékkatellunna Saul kiring sining suro nakajajiyang tona makkuwaéro ri mennang.

²² Rimakkuwannanaro joppani Saul lao ri Rama. Lettu'nana ri bujung lompoé ri Sékhu, makkutanani kégawi Samuél sibawa Daud, naripaissengina ri tauwé kuwaro makkedaé engkai ri Nayot.

²³ Jaji matteruni lao kuwaro, iyakiya rikuwasai towi ri Rohna Allataala, angkanna séré-séré sibawa gora-gora puppu laleng laowé ri Nayot.

²⁴ Lettu'nana kuwaro, naludunni pakéyanna naséré-séré sibawa gora-gora ri yolona Samuél, nainappa léwu ri tanaé mallusu-lusu puppu esso sibawa puppu benni. (Iyanaé assalenna warékkada makkedaé, “Mancaji nabi towiga Saul?”)