1 SAMUEL 16 - KITTA KAREBA MADECENG

Rilanti'na Daud mancaji arung sibawa upacara amminnyakeng

¹ Siyagangngaré wettu rimunrinna makkedani Puwangnge lao ri Samuél, “Siyagapi ittana messé atiko nasaba Saul? Dé'ga na aléna tenriyangakuini selaku arunna Israélié? Makkekkuwangngé, alano minnya zaitun namulao ri Bétléhém, riséddié tau riyasengngé Isai, nasaba sala séddinna polé ri ana'-ana'na purani Upilé mancaji arung.”

² Iyakiya makkutanai Samuél, “Pékkugika harusu pogau'i? Rékko naéngkalingai Saul gau'éro, pastini naunoka!” Nappébali Puwangnge, “Tiwino sikaju saping lolo, sibawa powadangngi ra'ya'é makkedaé laoko kuwaro untu' makkasuwiyangeng akkarobangeng lao ri Puwangnge.

³ Nainappa muwobbi Isai lao ri upacara akkarobangengngéro. Upowadappo matu aga harusu mupogau'. Tau iya Ujellokengngékko, harusu mulanti mancaji arung.”

⁴ Napogau'ni Samuél pada-pada iya napowadaé Puwangnge. Wettunna lettu ri Bétléhém, sining pamimping kotaé duppaiwi sibawa maséleng nenniya makkutana, “Aga apolénna Bapa' tiwii asalamakeng?”

⁵ Nappébali Samuél, “Ya, tongeng. Poléka untu' makksuwiyangeng akkarobangeng lao ri Puwangnge. Pépaccingini alému kuwammengngi weddingngi muwaccowéri upacara akkarobangengngéro.” Isai sibawa ana'-ana'na nasuro toni pépaccingiwi aléna tungke'-tungke', nanaundangngi lao ri upacaraéro.

⁶ Wettunna maddeppungenni sibawa naitani Samuél Eliab ana'na Isai, pikkiri'na, “Pastini iyaé napilé matu Puwangnge.”

⁷ Iyakiya makkedai Puwangnge lao ri Samuél, “Aja' mutattaré ri tappana iya magelloé sibawa matanré watakkaléna; tenniya aléna Uwélori. Dé' uwangangke pada-pada tolinoé mangangke. Tolinoé mitai tappa, iyakiya Iyya mitaka ati.”

⁸ Nainappa Isai mobbii Abinadab, ana'na, nanasuroi mangolo ri Samuél. Iyakiya makkedai Samuél, “Dé'to naripilé ri Puwangnge.”

⁹ Nainappa Syama risuro malluru ri Isai, iyakiya makkedai Samuél, “Dé'to naripilé ri Puwangnge.”

¹⁰ Makkuwaniro Isai suroi iya pitu ana'na matturu-turuseng mangolo ri Samuél, iyakiya makkedai Samuél ri aléna, “Dé' mennang naripilé ri Puwangnge.”

¹¹ Namakkutanana Samuél ri aléna, “Banna iya manengngéga ana' worowanému?” Nappébali Isai, “Engka mupa séddi taupa, iya maloloé, iyakiya mattengngangngi mampi bimbala.” Nakkeda Samuél, “Suroi mobbii, nasaba dé' tanré matu ri wettu dé'napa napolé.”

¹² Nanassuro mobbini Isai iyaro ana'é. Annessana séddiwi kallolo iya magelloé sibawa madising, sibawa magello matanna. Namakkedana Puwangnge lao ri Samuél, “Iyanaé; lanti'ni!”

¹³ Masitta'ni Samuél malai minnya zaitungngéro nanalanti'i Daud sibawa upacara amminnyakeng ri yolona kaka-kakana. Iyatoro wettué narikuwasai Daud ri Rohna Puwangnge. Mappammulai essoéro sibawa matteru risibawanni ri Rohna Puwangnge. Nainappa lisuni Samuél ri Rama.

Daud ri saorajana Saul

¹⁴ Naiya Saul risalaini ri Rohna Puwangnge, na makkekkuwangngé risissani ri roh maja iya nasuroé Puwangnge.

¹⁵ Rimakkuwannanaro makkedani ata-atanna Saul, “Riisseng makkedaé roh maja iya nasuroé Puwangnge nasissai Datu.

¹⁶ Rékko nasitujuiwi Datu, sadiyaki sappa séddi tau iya maccaé makkacapi. Narékko risissai Datu ri roh majaé, iyaro tauwé weddingngi nacculéyang kacapinna, namanyameng paimeng matu Datu.”

¹⁷ Nanapparéntanni Saul lao ri mennang, “Sappano séddi tau iya maccaé macculé musi', namutiwii lao mai.”

¹⁸ Naéngkalinganaro makkedani séddi atanna, “Isai pabbanuwana Bétléhém mappunnai séddi ana' worowané iya maccaé macculé musi'. Pabbaraniwi sibawa séddiwi prajuri iya makessingngé. Nainappani poréi sibawa macca mabbicara, na Puwangnge tuli tulungngi.”

¹⁹ Nanakirinna suro Saul lao ri Isai tiwii pasengngéwé, “Suroni ana'mu Daud, iya monrowangngéngngi bimbala'-bimbala'muro mangolo ri iyya.”

²⁰ Nanapassadiyana Isai sikaju kaleddé, nanapattékériwi sibawa sikaju ana' bémbé, roti sibawa popang bimkulang mallise penno anggoro. Iya manennaro nawéréngngi Daud untu' riyakkasuwiyangeng lao ri Saul.

²¹ Makkuwaniro Daud lao ri Saul sibawa mancaji pattumaninna. Ripoji senna'i ri Saul sibawa riyakka mancaji pattiwi senjatana.

²² Nainappa kiring paseng Saul lao ri Isai, “Upojiwi Daud. Palaloni tette monro kuwaé sibawa tumaningika.”

²³ Mappammulairo, tungke'-tungke' ripoléi Saul ri roh majaéro, nalani Daud kacapinna nanacculéyangngi. Namarasa tennanna Saul sibawa manyamessi, nasaba risalaiwi ri roh majaéro.