1 SAMUEL 15 - KITTA KAREBA MADECENG

Musu méwaéngngi tau Amalé'é

¹ Riséwaé esso makkedai Samuél lao ri Saul, “Puwangnge ritu suroka lanti'i Datu mancaji arunna Israélié umma'-Na. Rimakkuwannanaro, sitinajai Datu méngkalingai paréntana Puwang Iya Pommakuwasaé.

² Aléna matu hukkungngi tau Amalé'é, nasaba toriyolona mennang naéwai tau Israélié wettunna tau Israélié poléi ri Maséré.

³ Jaji, laono sibawa gasai tau Amalé'é sibawa mancuru'i sininna appunnangenna. Aja' mutaroi muwi séuwa aga; unoi sininna tau worowané, makkunraié, ana'-ana'é sibawa ana'loloé; makkuwatoro sapingngé, bimbala'é, untaé sibawa kaleddé'é.”

⁴ Nanapassadiyani Saul tentarana sibawa bilangngi ri Telaim; engka 200.000 tau prajuri polé ri Israélié sibawa 10.000 tau polé ri Yéhuda.

⁵ Purairo laoni Saul silaong ana' buwana ri kota Amalé'é sibawa madangngi balié ri salo marakkoé.

⁶ Kiring towi paseng papparéngngerang lao ri tau Kénié adanna, “Laono sibawa salaiwi tau Amalé'é, kuwammengngi aja' muwaccowéto upaccappu silaong mennang, saba' riyolo toriyolomu purani nappaitang assisellaongengngé lao ri tau Israélié wettunna tau Israélié poléi ri Maséré.” Nalaona tau Kénié polé kuwaro.

⁷ Purairo mammusuni Saul sibawa tau Amalé'é, sibawa caui mennang puppu laleng polé ri Hawila lettu ri Syur ri seddé alauna Maséré.

^8-9 Sininna ra'ya'é sibawa tentarana Amalé'é naunoni Saul. Iyakiya Agag arunna tau Amalé'é natikkengngi sibawa rileppessangngi tuwo ri Saul sibawa tentarana, makkuwatoro bimbala sibawa saping iya kaminang makessingngé, ana' saping enrengngé ana' bimbala iya kaminang macommo'é, sibawa sininna séuwa-séuwaé iya mangke'é; banna olokolo iya dé'é nakkéguna sibawa dé'é angke'na bawang iya napaccappué.

Dé'nana nariyangakui Saul selaku arung ri Puwangnge

¹⁰ Namakkedana Puwangnge ri Samuél,

¹¹ “Massesse kalé-Ka pura makkai Saul mancaji arung, saba' mabbokoni polé ri Iyya, sibawa dé' napogau'i parénta-Ku.” Messéni Samuél, na puppu benni madaréké lao ri Puwangnge.

¹² Pappa bajanana, maéléni, joppa Samuél maélo sita Saul. Ripaissengiwi makkedaé laoni Saul ri kota Karmél untu' patettong batu papparéngngerang untu' aléna kuwaro, nainappa matteru lao ri Gilgal.

¹³ Wettunna Samuél siruntu Saul, makkedani Saul ri aléna, “Tennapodo Puwangnge barakkakiwi Bapa'! Purani upogau' paréntana Puwangnge.”

¹⁴ Iyakiya makkutanai Samuél, “Rékko makkuwaitu, magi uwéngkalingai sapingngé mangnguwa' sibawa bimbala'é mabbémbé?”

¹⁵ Nappébali Saul, “Iyaro olokolo'é rirampasa'i polé ri tau Amalé'é. Bimbala sibawa saping iya kaminang makessingngé nalai ra'ya'é untu' riyakkasuwiyangeng selaku akkarobangeng lao ri Puwang Allataalamu. Iyakiya lebbinna purani ripaccappu siseng.”

¹⁶ Naéngkalinganaro makkedani Samuél, “Tajengngi riyolo, maéloka paissengiko aga napowadakka Allataala onna wennié.” Nakkeda Saul, “Powadani.”

¹⁷ Nakkeda Samuél, “Dé'ga napura Datu mancaji pamimping ri suku-suku Israélié, namuni Datu naangga'i aléna dé' napenting? Purai Datu ripilé ri Puwangnge mancaji arung ri Israélié,

¹⁸ nainappani risuroi Datu ri Puwangnge paccappui tau Amalé'é iya majaéro. Risuroi Datu mammusu méwai mennang narapi cappu maneng.

¹⁹ Magi Datu dé' naturusiwi paréntana Puwangnge? Magi Datu naramé-ramé mala barang rampo'é, nanallalengiro naébbui Datu massesse ati Puwangnge?”

²⁰ Nappébali Saul, “Purani uturusi paréntana Puwangnge, sibawa lao mammusu situru sibawa Nassurowangngé ri iyya; utawanni Agag arunna Amalé'é sibawa sininna tau Amalé'é purani uwuno.

²¹ Iyakiya ana' buwaku dé' nauno manengngi sininna olokolo'é; purai napilé bimbala sibawa saping iya kaminang makessingngé polé ri wassélé rappanaro untu' makkasuwiyangengngi ri Gilgal selaku akkarobangeng ri Puwang Allataalamu.”

²² Iyakiya makkedai Samuél, “Kéga lebbi napoji Puwangnge, apatongngé iyaré'ga akkarobangeng pakkasuwiyang? Apatongngé lao ri Puwangnge lebbi kessingngi naiya makkasuwiyangengngé akkarobangeng. Lebbi kessingngi apatongngé naiya lunra bimbala'é.

²³ Saba' ateddereng atié lao ri Puwangnge padai jana pogau'é séhéré, sibawa ati matempoé padai jana massompa déwata. Nasaba purai Datu naéwa paréntana Puwangnge, nadé' tona nangakui Puwangnge Datu selaku arung.”

²⁴ Naéngkalinganaro mangakuni Saul lao ri Samuél, adanna, “Mémeng madosaka. Uwajjalékkaiwi paréntana Puwangnge sibawa mallupaiwi panunju'na Bapa'. Métauka ri ana' buwaku nautarimai paréllaunna mennang.

²⁵ Iyakiya makkekkuwangngé, uwéllauwi ri Bapa', addampengenni dosaku namulisu sibawakka lao ri Gilgal, kuwammengngi weddikka massompa ri Puwangnge.”

²⁶ Iyakiya mappébaliwi Samuél, “Dé' umaélo lisu silaong Datu. Purani Datu naéwa paréntana Puwangnge, na makkekkuwangngé dé' nangakui Datu selaku arunna Israélié.”

²⁷ Nainappa mabboko Samuél maélo lao, iyakiya ritahangngi ri Saul sibawa makkatenningngi jumbana, angkanna sapé iyaro jumbaé.

²⁸ Namakkedana Samuél lao ri aléna, “Iyaé essoé purani nasapé Puwangnge akkarungenna Israélié polé ri Datu, sibawa mabbéréyangngi lao ri tau laing iya lebbi makessingngé naiya Datu.

²⁹ Iya Malebbié Allataalana Israélié dé' nabbellé sibawa dé'to napinrai attangen-Na, nasaba Aléna tenniyai tolino.”

³⁰ Nappébali Saul, “Madosana. Iyakiya tulungnga Pa', lisuno sibawakka kuwammengngi weddikka massompa lao ri Puwang Allataalana Bapa'. Nanallalengiwi napakalebbika Bapa' ri yolona sining pamimpinna bangsaku sibawa ri yolona sininna Israélié.”

³¹ Nanalisuna Samuél silaong aléna ri Gilgal, sibawa massompani Saul lao ri Puwangnge.

³² Nainappa napparéntang Samuél, “Tiwii mai Arung Agag,” poléni Agag sibawa penno paddennuwang nasaba mappikkiri'i, “Labe'ni bahaya amaténgngé.”

³³ Namakkedana Samuél, “Pada-pada peddammu mébbui maéga indo' ateddéngeng ana'na, makkuwatoniro indo'mu ateddéngeng matu ana'na.” Nainappa Samuél natetta Agag ri yolona mézbaé ri Gilgal.

³⁴ Purairo laoni Samuél ri Rama, na Arung Saul lisuni ri bolana ri Gibéa.

³⁵ Narapi paccappureng atuwonna, dé'na Samuél nasiruntu Saul. Iyakiya messéi Samuél nasaba massesse kaléi Puwangnge pura makkai Saul mancaji arunna Israélié.