1 SAMUEL 14 - KITTA KAREBA MADECENG

Yonatan selaku pahlawang

¹ Riséuwaé wettu makkedai Yonatan lao ri kallolo pattiwi senjatana, “Ayo, talao ri pos Filistin ri liweng kuwaro!” Iyakiya dé' naéllau paramisi ri ambo'na.

² Iyaro wettué engkai Saul ri yawana pong dalimaé ri Migron, dé' namabéla polé ri Gibéa. Ra'ya' iya maccowériyéngngi kira-kira 600 tau égana.

³ (Imang iya tiwiéngngi éfod-é iyanaritu Ahiya ana' Ahitub, iyanaritu silessurenna Ikabod ana' Pinéhas, na Pinéhas ana'na Eli, imanna Puwangnge ri Silo.) Dé'to naissengngi ra'ya'é makkedaé laoni Yonatan polé kuwaro.

⁴ Untu' rapii iyaro pos Filistingngé, harusu'i naola séddié balorang iya naseppié duwa batu karang iya maggarigié, iya tungke'-tungke'é riyaseng Bozes sibawa Séné.

⁵ Batu karang iya seddé manorangngé mangoloi ri Mikhmas, na iya seddé yattangngé mangoloi ri Géba.

⁶ Namakkedana Yonatan lao ri kalloloéro, “Laono mai talao ri posna tau Filistin kapéré'éro. Ajakké maéloi Puwangnge tulukki. Saba' naullé Puwangnge mabbéré apakalang, muwi sibawa maéga tau iyaré'ga céddé tau.”

⁷ Nappébali iyaro kalloloé, “Agi-agi iya maélo napogau' Puwang, nasitujui atatta.”

⁸ Nakkeda Yonatan, “Makessinni. Ri wettunna mallétto, tappaitangngi matu aléta risining tau Filistingngéro.

⁹ Rékko nasuroki mappésau sibawa tajengngi narapi mennang lao ri idi, tette'ki matu monro kuwaro bawang sibawa aja'na tallétto.

¹⁰ Iyakiya rékko nasuroki lao ri mennang, laoki matu kuwaro, nasaba iyanaro tanranna purani riyabbéréyang mennang ri Puwangnge lao ri idi.”

¹¹ Wettunna mennang nappaitang aléna ri tau Filistingngé ri pos jagangngéro, makkedani sining tau Filistingngéro, “Itani, engka tau Ibrani iya massué polé ri sebbo-sebbo onronna mennang massubbu!”

¹² Nainappa mennang gora lao ri Yonatan sibawa atanna, “Enré'no mai kuwammengngi naripaitakko séuwaé ri iko!” Namakkedana Yonatan lao ri kalloloéro, “Accowérina, nasaba pura riyabbéréyanni mennang ri Puwangnge lao ri Israélié.”

¹³ Namakkalolo'na Yonatan ménré riyaccowéri ri kalloloéro. Wettunna cumpa Yonatan, makkalénnekenni tau Filistingngé riyunru ri aléna, na ri munrinna, iyaro kalloloé mpunoi mennang.

¹⁴ Ri laleng serangang mammulangngéro, Yonatan sibawa kalloloéro mpunoi kira-kira duwappulo tau ri daéra sillowang siparape hétto.

¹⁵ Iyaro kajajiyangngé pawéwangngi tau Filistingngé ri akkémangngé sibawa risining padangngé. Sininna ra'ya' Filistingngé sibawa pos-pos jagangngé enrengngé rombongang-rombongang parampo'é métauni; mala mpéwang tanaé, sibawa kajajiyanni arukkang iya maseroé.

Ricauna tau Filistingngé

¹⁶ Na wettuéro tentarana Saul iya manganrowangngé ri Gibéa ri daérana Bényamin, naitani tau Filistingngé lari riyanrini sibawa temmaka lippunna.

¹⁷ Namakkedana Saul lao ri ana' buwana, “Bilangngi sininna prajuri'é sibawa paréssai niga iya dé'é gaga.” Napogau'ni mennang iyaro paréntaé nakaissengenna makkedaé Yonatan sibawa kallolo pattiwi senjatana dé'gaga.

¹⁸ Nakkeda Saul lao ri Imang Ahia, “Tiwii mai iyaro éfod-é.” (Iyaro essoé natiwii Ahia éfod-é ri yolona tau Israélié.)

¹⁹ Wettunna Saul mabbicara sibawa iyaro imangngé, awéwangengngé ri laleng akkémanna tau Filistingngé pédé tattambai, angkanna makkeda Saul lao ri imangngéro, “Dé'na wettutta untu' méllau panunju polé ri Puwangnge!”

²⁰ Nainappa Saul sibawa sining taunna massamang malluru ri onrong ammusurengngé. Naitani mennang kuwaro engka akacaungeng ri yelle'na tau Filistingngé; sigasai mennang sibawa siyuno.

²¹ Sining tau Ibrani iya monroé ri daérana tau Filistingngé, sibawa iya maccowéénna ri tentarana mennang, balé'i gilinni namasséddi sibawa Saul nenniya Yonatan.

²² Makkuwatoro sining tau Israél iya massubbué ri bulu-buluna Efraim, iya méngkalingaéngngi makkedaé larini tau Filistingngé, maccowéni masséddi sibawa gasai iyaro tau Filistingngé.

²³ Mammusui mennang puppu laleng lettu ri Bét-Awen. Puwangnge passalama'i Israélié iyaro essoé.

Kajajiyang-kajajiyang purana ammusurengngé

²⁴ Iyaro essoé malemmani sining tau Israélié nasaba malupui, saba' purai Saul mattanro makkuwaé, “Tattanroi tau iya manré muwi aga iya essoé ri wettu dé'napa uwakkabale lao ri balikku.” Rimakkuwannanaro dé' muwi séddi iya manré puppu essoéro.

²⁵ Nanalettu manenna mennang riséddié ale sibawa runtu maéga senna cani,

²⁶ iyakiya dé' muwi séddi iya manré séuwa polé ri cani'éro, nasaba métaui nakenna tanro iya napowadaé Saul.

²⁷ Iyakiya Yonatan dé' naissengngi makkedaé purai ambo'na mancangngi ra'ya'é sibawa tanroéro; rimakkuwannanaro naloro'ni tekkeng natiwié, nanattodokengngi ri laleng sarang cani'é, nainappa nala iyaro cani'é nanaanréi. Tappa matakkani sibawa tattamba mawatang.

²⁸ Nainappa séddi polé ri prajuri'éro makkeda ri aléna, “Dé' manenna pakkullétta nasaba alupureng. Iyakiya ambo'na Puwang pura mancakki sibawa tanro, adanna, ‘Tattanroi tau iya manré essoéwé.’ ”

²⁹ Nappébali Yonatan, “Talliwe' senna tindakanna ambo'kuro lao ri bangsata! Itai, keadakku makkekkuwangngé mabéla lebbi makessinna puraku manré céddé cani.

³⁰ Akkalarapanna ra'ya'é iyaé essoé ripalaloi manré inanré iya puraé narampasa wettunna nacau balié, pasti lebbi maégai tau Filistin iya riyullé mpuno!”

³¹ Iyaro essoé ricaui tau Filistingngé ri tau Israélié puranana mammusu puppu laleng polé ri Mikhmas lettu ri Ayalon. Iyakiya purairo makkuwamani posona mennang,

³² angkanna makkabéttang mennang mala barang rirappa iya nalolongengngé polé ri balié; malani mennang bimbala sibawa saping nanagéréi ri onrongngéttoro, namatteru nanré jukuna iya engkaé mupa darana.

³³ Nainappa ripaiisengi ri Saul makkuwaé, “Datu, madosani ra'ya'é lao ri Puwangnge nasaba manréi juku sibawa darana.” Naggera' Saul, “Bali'bellako! Galéttéi séddi batu loppo laono mai.”

³⁴ Nainappa adanna paimeng lao risining tau iya tiwiéngngi iyaro birittaé, “Tassiya-siyano ri yelle'na ra'ya'é sibawa suroi mennang tiwi saping sibawa bimbala'na lao mai, kuwammengngi narigéré ri tompo'na batuéwé sibawa riyanré kuwaé; narimakkuwannanaro dé'na mennang nanréi jukué sibawa darana nadé'na namadosana lao ri Puwangnge.” Iyatoro wennié sininna ra'ya'é tiwii olokolo narampasa'é nanagéréi kuwaro.

³⁵ Napatettonna Saul mézba untu' Puwangnge; iyanaro mézba mammulang iya napatettongngé.

³⁶ Nainappa makkeda Saul lao ri ana' buwana, “Laono mai tagasai tau Filistingngé ri wenniéwé natarampo'i mennang narapi élé sibawa mpuno manengngi mennang.” Nappébali mennang, “Madécéngenni napogau' Datu aga naita makessing Datu.” Iyakiya makkedai imangngé, “Laono mai lebbi riyolo taéllau panunju polé ri Allataala.”

³⁷ Namakkutanana Saul ri Allataala, “Weddikka'ga gasai tau Filistingngé? Muwabbéréyagga matu lao ri limanna Israélié?” Iyakiya iyaro essoé dé' naribali ri Allataala.

³⁸ Rimakkuwannanaro makkedani Saul lao risining pamimpinna ra'ya'é, “Lao manenno mai sibawa paréssai dosa agana pura ripogau' essoéwé.

³⁹ Majjancika nasabbing Puwang iya tuwoé, iya puraé mpéréngngi apakalang Israélié, makkedaé tau iya pasalaé rihukkung matéi matu, namuni iyanaritu Yonatan ana'ku.” Iyakiya dé' muwi séddi tau barani baliwi.

⁴⁰ Namakkedana Saul lao ri sininna ra'ya' Israélié, “Iko maneng tettokko kuwaé.” Nappébali mennang, “Sitinajai napogau' Datu aga iya naitaé Datu makessing.”

⁴¹ Nainappa massempajang Saul, “Puwang, Allataalana Israélié, magi nadé' Mubalika essoéwé? Puwang, balika naolai batu-batu mapaccingngéwé. Rékko iyaro asalangngé engkai ri aléku iyaré'ga Yonatan, balini sibawa batu Urim, iyakiya rékko iyaro asalangngé engkai ri umma'-Mu Israélié, baliwi sibawa batu Tumim.” Na pappébalinna Puwangnge majjello'i lao ri Yonatan sibawa Saul; namakkuwannanaro ra'ya'é ripannessai dé' napasala.

⁴² Namakkedana Saul, “Oh Puwang, pattentuni ri yelle'ku sibawa Yonatan.” Na Yonatan ritu iya ripannessaé pasala.

⁴³ Namakkeda Saul lao ri Yonatan, “Aga pura mupogau'?” Nappébali Yonatan, “Purai uwanré céddé cani iya uwalaé sibawa cappa tekkekku; sadiyaka untu' maté.”

⁴⁴ Nakkeda Saul lao ri aléna, “Tennapodo nahukkukka Allataala rékko dé' narihukkung matéko, Yonatan!”

⁴⁵ Iyakiya makkedai ra'ya'é lao ri Saul, “Harusu'iga Yonatan rihukkung maté? Padahal aléna ritu tiwii apakalang battowaéwé? Dé'! Majjanciki nasabbing Puwang iya tuwoé, makkedaé dé' nawedding Yonatan ateddéngeng muwi silampa gemme'na polé ri ulunna. Nasaba pattulunna Puwangnge ritu, nalolongeng apakalang essoéwé.” Makkuwaniro Yonatan ripassalama polé ri pahukkungeng maté ri ra'ya'é.

⁴⁶ Purairo lisuni tau Filistingngé ri daérana nasaba Saul dé' nalellungngi mennang.

Apparéntanna sibawa kaluwargana Saul

⁴⁷ Mancajinnana Saul arunna Israélié, mammusuni kégi-kégi méwai sining balinna Israélié, iyanaritu tau Moab, tau Amon, sibawa tau Edom, arunna tau Amongngé, sibawa tau Edongngé, arung-ngarunna wanuwa Zoba, sibawa tau Filistingngé. Kégi-kégi mammusu, tuli pakalai.

⁴⁸ Mammusui sibawa barani namasegge nanacaui tau Amalé'é, enrengngé napaleppe'i Israélié polé ri akuwasanna parampo'é.

⁴⁹ Ana'-ana' worowanéna Saul iyanaritu Yonatan, Yiswi, sibawa Malkisua. Ana' makkunrainna macowaé riyaseng Mérab, namaduwaé riyaseng Mikhal.

⁵⁰ Bainéna riyaseng Ahinoam, ana'na Ahimaas; pallima tentarana iyanaritu Abnér ana' Nér, iyanaritu amuréna Saul.

⁵¹ Kish ambo'na Saul, sibawa Nér ambo'na Abnér, iyanaritu ana'-ana'na Abiél.

⁵² Gangka tuwona tuli mammusui Saul sibawa masero méwai tau Filistingngé. Rimakkuwannanaro, rékko mitai Saul tau mawatang iyaré'ga barani, masitta'i napancaji anggota tentarana.