1 SAMUEL 10 - KITTA KAREBA MADECENG

¹ Nainappa nala Samuél kendi mallise'é minnya zaitun, nanatiri'i iyaro minnya'é ri tompo ulunna Saul, sibawa bauwi Saul nakkedato, “Puwangnge pura lanti'ko mancaji arunna Israélié umma'-Na. Muparéntai matu umma'-Na sibawa linrungiwi mennang polé risining balinna. Iyanaé tanranna lao ri iko makkedaé Puwangnge pura piléko mancaji arunna umma'-Na:

² Musalaikku essoéwé, siruntu'ko matu sibawa duwa tau worowané ri seddéna kuburu'na Rahél ri Zélzah ri daérana Bényamin. Makkedai matu mennang ri iko, makkuwaé, Riruntu'ni sining kaleddé iya musappaéro. Makkekkuwangngé dé'na namanenneng ambo'mu passalenna iyaro olokoloé, iyakiya matteru-terui makkutana aga harusu napogau' untu' lolongekko.”

³ Makkedasi Samuél, “Polé kuwaro joppako matteru lettu ri aju onrong assompangngé ri Tabor. Kuwaro siruntu'ko matu tellu tau worowané iya mattengngangngé mattuju ri Bétel untu' makkasuwiyangeng akkarobangeng ri Allataala. Séddi tau rénréng tellu kajunna ana' bémbé, séddiéssi tiwii tellubbatu roti, na séddiéssi tiwii popang bingkulang mallise anggoro.

⁴ Mabbéré sellengngi matu ri iko sibawa nawérékko matu duwabbatu roti iya harusu'é mutarima.

⁵ Purairo harusu'ko lao ri bulu-buluna Allataala ri Gibéa, onrong akkémanna tau Filistingngé. Ri sumpang muttama'é ri kotaé, siduppako matu sibawa sirombongang nabi iya nonnoé polé ri bulu-bulu akkarobangengngé. Séré-séréi mennang sibawa gora-gora, maggambusu, marrebana, massuling sibawa makkacapi.

⁶ Iyatoro wettué nakuwasaiko matu Rohna Puwangnge namuwaccowériwi matu séré-séréna sibawa gora-gorana mennanro, nainappa riwéréng sipa baru angkanna mancaji tau laing.

⁷ Rékko kajajiyang manenniro, pogau'ni agi-agi iya mupérasaé makessing, nasaba Allataala sibawakko.

⁸ Purairo harusu'ko lao ri Gilgal sibawa mattajeng kuwaro pitungngesso. Polépa matti untu' makkasuwiyangeng akkarobangeng ritunu sibawa akkarobangeng pappasidamé, enrengngé powadakko aga harusu mupogau'.”

⁹ Nasalainna muwa Saul Samuél, tarimani Saul sipa baru polé ri Allataala. Sibawa sininna passalengngé iya ripaissengengngéngngi ri Samuél kajajiyanni iyatoro essoé.

¹⁰ Wettunna Saul sibawa pattumaninna lettu ri Gibéa, siruntu'ni sibawa sirombongang nabi. Iyatoro wettué narikuwasai Saul ri Rohna Allataala, nanaccowériwi séré-séréna sibawa gora-gorana nabi-nabiéro.

¹¹ Sining tau iya missengngéngngi riyolopa, mitai kédo-kédonaro, namakkutana séddié lao ri laingngé, “Agana pura kennai ana'na Kishro? Mancaji nabi towiga Saul?”

¹² Nanakkutana séddi tau iya monroé kuwaro, “Pékkugi sibawa nabi-nabi iya laingngéro – manuru iko niga ambo'na mennang?” Iyanaro assalenna warékkadaéwé, “Aga Saul mancaji nabi towi?”

¹³ Puranana Saul séré-séré sibawa gora-gora, laoni ri mézbaé ri tompo'na bulu-bulué.

¹⁴ Riitani Saul sibawa pattumaninna ri amuréna, namakkutana ri mennang, “Polé kégiko?” namappébali Saul, “Sappai kaleddé iya teddéngngéro, na wettunna dé' taruntu'i, laoki méwai sita Samuél.”

¹⁵ Nakkutana amuréna, “Na aga napowadakko?”

¹⁶ Nappébali Saul, “Napaissengiki makkedaé riruntu'ni iyaro olokolo'é.” Iyakiya dé' nacuritai Saul lao ri amuréna makkedaé purani rilanti mancaji arung ri Samuél.

Ripiléna Saul mancaji arung

¹⁷ Nanaobbini Samuél ra'ya' Israélié kuwammengngi naddeppungeng ri Mizpa,

¹⁸ namakkeda lao ri mennang, “Iyanaé napowada Puwangnge, Allataalana Israélié, ‘Purano utiwi massu polé ri Maséré sibawa paleppe'ko polé ri akuwasanna tau Maséré'é sibawa sininna bangsa laing iya tenre'ékko.

¹⁹ Purano upaleppe polé ri sininna anrasa-rasangngé sibawa peddié, iyakiya makkekkuwangngé musampéyak-Ka, Allataalamu, nasaba muwéllauwi kuwammengngi Ujellokekko séddi tau arung. Nah, makessinni, addeppungenno ri yolo-Ku, Puwam-mu, situru suku sibawa appammu.’ ”

²⁰ Nanasuroni Samuél sininna sukué malluru liyolo na suku Bényamin nakenna appiléng.

²¹ Wettunna kaluwarga-kaluwargaé ri laleng suku Bényaminro risuro malluru liyolo, na kaluwargana Matri nakenna appiléng. Paccappurenna malluruni sining worowané ri laleng kaluwargana Matri, na Saul ana' Kish nakenna appiléng. Nanasappani mennang Saul, iyakiya dé'i gaga.

²² Rimakkuwannanaro makkutanani sining tauwé ri Puwangnge, “Oh Puwang, engkaniga iyaro tauwé kuwaé?” Nappébali Puwangnge, “Massubbui Saul ri munrinna barab-barang perlengkapangngé.”

²³ Namasitta'na mennang lao duppaiwi Saul polé kuwaro, nanatiwié ri tengnga-tengngana ra'ya'é. Natettonna Saul ri yelle'na mennang na aléna ritu kaminang matanré; tau laingngé banna gangka ri salangkanna.

²⁴ Nainappa makkeda Samuél lao ri ra'ya'é, “Iyanaé tau iya napilé Puwangnge, dé' gaga pada-padanna ri yelle'ta maneng.” Gorani sininna bangsaéro, “Tuwoni arungngé!”

²⁵ Nainappa napakatajang Samuél lao ri bangsaéro passalenna ha'na sibawa kewajibanna arungngé, nainappa naoki ri laleng kitta iya nataroé ri onrong iya mapaccingngé. Purairo nasuroni Samuél sininna bangsaéro lisu ri bolana tungke'-tungke'.

²⁶ Lisu toni Saul ri bolana ri Gibéa, risilaongeng risiyagangngaré tau iya baranié sibawa iya ripakédoé atinna ri Puwangnge.

²⁷ Iyakiya siyagangngaré tomaja makkeda, “Pékkugi wedding iyaé tauwé makkéguna matu ri idi?” Napakariyawai Saul sibawa dé' nawéréngngi hadiya. Iyakiya najjaiwi temmissengngi.