1 SAMUEL 1 - KITTA KAREBA MADECENG

Elkana sibawa kaluwargana ri Silo

¹ Engka séddi tau worowané, asenna Elkana, polé ri suku Efraim. Monroi ri kota Rama, ri daéra buluna Efraim. Elkana iyanaritu ana'na Yéroham sibawa eppona Elihu. Muttama'i kaluwargana Tohu, takkéna polé ri appanna Zuf.

² Elkana mappunnai duwa bainé, Hana sibawa Pénina. Pénina mappunnai ana', iyakiya Hana dé'.

³ Tungke' taung laowi Elkana polé ri Rama untu' massompa ri Silo sibawa makkasuwiyangeng akkarobangeng ri Puwang Iya Pommakuwasaé. Iya mancajiyé imanna Puwangnge ri Silo iyanaritu Hofni sibawa Pinéhas, ana'-ana'na Eli.

⁴ Tungke'-tungke' rékko Elkana makkasuwiyang akkarobangeng, Pénina sibawa ana'-ana'na nawéréngngi tungke'-tungke' sibagiyang polé ri juku akkarobangengngéro.

⁵ Iyakiya Hana nawéréngngi sibagiyang bawang saba' Puwangnge dé' nawéréngngi ana'. Namuni makkuwaro Elkana napoji senna'i Hana.

⁶ Tuli ripeddiriwi atinna Hana sibawa ripakatuna ri Pénina, amaurénaro, nasaba Puwangnge dé' nawéréngngi ana'.

⁷ Iyaro gau'é kajajiyangngi polé ri taungngé lao ri taungngé; rékko laowi mennang ri Bolana Puwangnge, tuli ripeddiriwi atinna ri Pénina. Biyasai Hana teri sibawa dé' namaélo manré nasaba ripakatunai.

⁸ Nasisetto Elkana, lakkainna, makkutana, “Magi muteri Hana? Magi nadé' mumaélo manré sibawa matteru masara bawang? Dé'ga ulebbi mangke ri alému naiya seppulo ana' worowané?”

Hana sibawa Eli

^9-10 Riséuwaé esso purana mennang manré ri Bolana Puwangnge ri Silo, tettonni Hana polé ri méjang anréngngé. Iyaro wettué Imang Eli iya engkaétto ri Bolana Puwangnge, mattengngangngi tudang ri kadérana ri seddéna sumpangngé. Namasara senna'na Hana massempajang lao ri Puwangnge nanaterito tassénge-sénge.

¹¹ Nainappa majjanci Hana, adanna, “Puwang Iya Pommakuwasaé, pénessaiwi atam-Muwé! Itai asussanna atam-Muwé. Engngerangngi atatta sibawa aja' tallupaiwi atatta! Rékko tawéréngngi atatta séddi ana' worowané, majjanciwi atatta maélo mabbéréngngi lao ri Iko gangka tuwona. Majjanci towi atatta makkedaé gemme'na dé' naengka narirette matu.”

¹² Maitta senna Hana massempajang, nanapénessaiwi Eli témunna iyaro makkunraié.

¹³ Massempajangngi Hana ri laleng ati, jaji banna témunna kédo-kédo, iyakiya saddanna dé' nariyéngkalinga. Rimakkuwannanaro nasengngi Eli mabo'.

¹⁴ Namakkedana Eli lao ri aléna, “Masa mabo'ko kuwaé! Aja' muwénunna uwai anggoro!”

¹⁵ Iyakiya mappébaliwi Hana, “Dé' umabo', Pa', dé' sises-siseng uwénung uwai anggoro! Pettu paddennuwakka, sibawa mattengngang massempajang curitai sininna apeddirekku lao ri Puwangnge.

¹⁶ Aja' nariyangga'ka makkunrai lampa. Massempajakka pada-pada iyaé nasaba masara senna'ka.”

¹⁷ Nanakkeda Eli, “Rékko makkuwaitu lisuno sibawa salama. Tennapodo Allataalana Israélié tarimai paréllaummu.”

¹⁸ Nappébali Hana, “Tennapodo lolongekka barakka'na Bapa'.” Nainappa lao, nanaanré; sibawa dé'na namasarana.

Jajinna Samuél sibawa riyabbéréyanna lao ri Puwangnge

¹⁹ Pappa bajanana maéléni Elkana sibawa kaluwargana moto, napuranana massompa ri Puwangnge, lisuni mennang ri Rama. Nanasilurenna Elkana sibawa Hana, bainénaro, na Puwangnge tarimai sempajanna Hana.

²⁰ Mattampu'ni iyaro makkunraié sibawa jajiyang ana' worowané. Nasenni Samuél, adanna, “Purani uwéllau polé ri Puwangnge.”

²¹ Narapi wettunna Elkana sibawa kaluwargana laosi ri Silo untu' makkasuwiyang akkarobangeng pattaungeng lao ri Puwangnge. Rilainnaéro purai Elkana majjanci untu' makkasuwiyangeng akkarobangeng iya ripallaingngé.

²² Iyakiya iyaé sisengngé dé' naccowé Hana. Adanna lao ri lakkainna, “Leppe susupi, nauwantara'i matu Samuél lao ri Bolana Puwangnge, nanaonro matu kuwaro gangka tuwona.”

²³ Nappébali Elkana, “Makessinni, pogau'ni aga iya muwitaé makessing; onrono ri bolaé narapi lettu wettunna musalla susu ana'ta. Na tennapodo Puwangnge mébbui jancimmu mancaji maddupa.” Jaji, monroni Hana ri bolaé narapi lettu wettunna nasalla susu ana'na.

²⁴ Risalla'nana susu Samuél, riantara'ni ri indo'na lao ri Bolana Puwangnge ri Silo. Iyaro wettué baiccu senna mupi. Tiwi towi Hana sikaju saping lai iya makkéumuru telluttaungngé, gandong seppulo kilo, sibawa séddi popang bingkulang iya pennoé mallise anggoro.

²⁵ Iyaro sapingngé nagéréi, nainappa naantara Samuél lao ri Eli.

²⁶ Nakkeda Hana lao ri Eli, “Taddampengekka, Pa'. Naéngngerang mupa'ga Bapa'? Iyya'é makkunrai iya puraé naita Bapa' tettong kuwaé, massempajang lao ri Puwangnge.

²⁷ Ana'énnaé uwéllau polé ri Puwangnge. Natarimani sempajakku,

²⁸ narimakkuwannanaro uwabbéréyangngi iyaé ana'é untu' mancaji appunnangenna Puwangnge gangka tuwona.” Purairo mennang massompani ri Puwangnge.