ZAKARIA 4 - BIBEL JAMITA NA DENGGAN

Parnidaan taringot tu lampu

¹ Ro ma mangulahi surusuruan na mangkuling i tu au jana disungguli ia ma au songon panyungguli ni halak na modom.

² “Aha dehe na niidamu?” ning ia manyapai. “Sada pat ni parlampuan sere do,” ningku mangalusi. “Di ujungna i di ginjang adong mangkuk inganan ni miak. Di pat ni parlampuan i, humaliang mangkuk inganan ni miak i adong pitu lampu, jana ganop lampu adong pitu be parsumbuanna.

³ Di siamun siambirang ni pat ni parlampuan i adong do dua bona ni zetun.”

⁴ Dung i husapai ma tu surusuruan i, “Aha dehe na nigambarkon ni angka barang-barang i tuan?”

⁵ “Nada he diboto ho i?” ning ia manyapai au. “Nada huboto i da tuan,” ningku mangalusi.

^10b Didok surusuruan i ma tu au, “Lampu na pitu i, i ma pitu mata ni Tuhan na mamareso sude sisik ni tano on.”

¹¹ Dung i marsapa muse ma au tusia, “Aha do astuan ni bona ni zetun na dua i na di siamun siambirang ni pat ni parlampuan i?

¹² Aha muse do astuan ni dangka ni zetun na dua i na di lambung ni pipa sere dalan ni miak zetun i?”

¹³ “Nada he diboto ho i?” ning ia mangalusi. “Inda, tuan,” ningku mangalusi.

¹⁴ Jadi didok ia ma, “I ma dua halak na nipili, na jongjong di adopan ni Tuhan ni sandok tano on.”

Janji ni Tuhan tu si Zerubabel

⁶ Disuru surusuruan i ma au palaluhon tu si Zerubabel tona ni Tuhan songon on, “Nada markite-hite gogo ni parangan jana nada muse marhite hagogoonmu sandiri gabe manjadi karejomu, tapi marhite tondingKu do ninna Tuhan Na Markuaso.

⁷ Ise do ho, ale dolok na godang? Angkon gabe tano napa ho anggo maradopkon si Zerubabel. Payakkononmu ma batu parsuhi mardongan surak-surak mandok, ‘Jeges! Jegesna i antong batu i!’ ”

⁸ Jadi ro muse ma tona sian Tuhan tu au.

⁹ Ninna ma, “Madung dipayakkon si Zerubabel ojahan ni BagasKu, jana pasidungonnia ma sude bangunan i. Muda tulus tarjadi i, botoon ni bangsongKu ma, bahaso Au do na marsuru ho ale Zakaria tu halahi.

^10a Angke barang ise na palayaskon ari hamenehon on, giot marjop ni roha ma halahi marnida batu na dipili na adong di tangan ni si Zerubabel on.”