ZAKARIA 2 - BIBEL JAMITA NA DENGGAN

Parnidaan taringot tu tali suhat-suhat

¹ Dung i manatap ma au mangulahi adop gincat, huida ma sada halaklahi na maniop tali panyuhat.

² “Giot tu dia dehe i?” ningku manyapai. “Laho manyuhat Jerusalem do,” ning ia mangalusi, “Giot botoonku sanga na sadia ginjang ni kota i dohot bidangna.”

³ Dung i huida ma surusuruan na mangkobari i dohot au, ro tu jolo, dohot sahalak nari surusuruan na asing mandapotkon ia.

⁴ Didok surusuruan na parjolo i ma tu na paduahon i, “Ompoti ma kehe tu halaklahi na maroban tali suhat-suhat i jana dokkon ma tusia paboa na giot gok sajo ma jolma dohot pahan-pahanan di Jerusalem gabe nada tarbangun be tembok humaliang kota i.

⁵ Madung dijanjihon Tuhan bahaso na giot Ia sandiri do gabe tembok api humaliang kota i laho mangondingisa jana na giot disi noma Ia di bagasan sude kuaso dohot hagodanganNia.”

Dipio anso mulak angka halak na tarbuang

⁶ Aha dope, marlojong ma hamu sian tano na di Utara, ninna Tuhan, harana madung Hupaserak hamu adop opat haroro ni alogo, ninna Tuhan.

⁷ Kehe ma hamu tu Sion palua ma dirimu, ale pangisi ni Babel.

⁸ Harana songon on do hata ni Tuhan Na Markuaso, na dung marsuru au di bagasan hamuliaonNa, taringot tu angka bangso na dung manaban hamu na jolo. Angke sanga ise na manjama hamu, na manjama anak ni matana sandiri do ia disi.

⁹ “Satutuna giot laluhononKu ma tanganKu tu halahi, jana halahi gabe ditaban angka halak na di toru ni kuasona hian. Jadi botoonmunu ma bahaso Tuhan Na Markuaso i do na marsuru au.”

¹⁰ Didok Tuhan ma, “Marende ma hamu marjop ni roha ale halak na maringanan di Jerusalem! Maringanan noma Au di tonga-tongamunu!”

¹¹ Marroan ma di hatiha i bahat angka bangso tu Tuhan anso gabe bangsoNia. Maringanan ma Ia di tonga-tongamunu, jana gabe botoonmunu ma na dung disuru Tuhan au tu hamu.

¹² Sanoli nari gabe nampuna hapunjungan ni Tuhan ma Juda di tanoNia na badia i, jana Jerusalem gabe kota na sumurung dihaholongi Ia.

¹³ Maringanan ma hamu sudena di jolo ni Tuhan! Angke madung ro Ia antong sian inganan parmiananNia na badia i.