PANGARATAION 21 - BIBEL JAMITA NA DENGGAN

Parkaro na mamunu na so tarputuskon

¹ “Umpamana rupani adong ma sada halak na mate hona bunu di ladang, di tano na giot silehenon ni Tuhan Debatamunu i di hamu, jana nada habotoan sanga ise na mamunu i.

² Di bagasan pangalaho na songon i angkon ukuron ni hatobangon ni kota dohot panguhummunu do dao ni inganan ni bangke i dapot tu ganup kota na dumonok.

³ Jadi angkon pilion ni hatobangon ni kota na dumonok i ma sada lombu jara-jara na so unjung dipake dope markarejo.

⁴ Angkon obanon ni halahi ma lombu i tu sada inganan di lambung ni batang aek na so jungada mahiang jana na so jungada dope tanona i diombak sanga disuani. Angkon ponggolkonon ni halahi ma disi rungkung ni lombu i.

⁵ Angkon kehe muse do tu inganan i angka Malim Levi, angke halahi do antong na angkon mangalehen haputusan di bagasan sasude parkaro ni na pajolo gogo. Na dung dipili ni Tuhan Debatamunu do halahi laho mangoloi tuSia dohot mandok hata pasupasu mangasahon goarNia.

⁶ Jadi sude hatobangon ni kota na dumonok nangkin, angkon marbasu tangan halahi di ginjang ni lombu i,

⁷ jana mandok, ‘Nada hami na mamunu jolma i, jana nada hami boto sanga ise na mamunu i.

⁸ Tuhan, ampuni ma bangsoMu Israel na nipaluaMi sian Mesir. Ampuni ma hami, jana ulang etong hami na martanggung jawab di pamunuon ni halak na so marsala i.’

⁹ Jadi songon i ma i, muda dipatulus hamu sanga aha na nipangido ni Tuhan i, nada etongon be hamu martanggung jawab di pamunuon i.”

Aturan taringot tu dadaboru na dibaen taban ni porang

¹⁰ “Muda dilehen Tuhan di hamu hamonangan di bagasan parporangan, jana dibuat hamu taban di porang i,

¹¹ ra do adong sian tonga-tonga ni halahi sada dadaboru na jeges por ni rohamu jana na giot baenonmu gabe dadaborumu.

¹² Oban ma anakboru i tu bagasmu. Angkon guntingonnia ma obuknia i disi, gotaponnia sisilonna,

¹³ jana margonti pakean. Angkon tinggal di bagasmu do ia, jana marsiluluton hara ni parmate ni simatobangnia sabulan honokna. Dung salpu i, tola ma ia baenonmu gabe ripemu.

¹⁴ Muda dipudian ni ari nada por be rohamu disia, tola do suruonmu ia kehe roha-rohania. Nada tola baenonmu sanga gadisonmu ia songon hatoban hara ni na dung dipatoruk ho ia.”

Aturan taringot tu siteanon ni Anak Siangkaan

¹⁵ “Umpamana adong ma na mardadaboru dua halak, jana na dua i rap manubuhon anak halaklahi, tapi anak na parjolo sorang nada sian dadaboru hasudungan ni roha ni bayo i.

¹⁶ Muda giot putuskonon ni bayo i ma giot mambagi sinadongannia di angka dakdanaknia i, na so tola do ia mamihak tu anak na sian ripe hasudungan ni rohania i, marhite na mangalehen tu dakdanak i bagian na patut gabe hak ni anak na parjolo sorang.

¹⁷ Angkon lehenonnia do dua bagian sian sude artana di anakna na parjolo sorang i, haru pe nada anak na nitubuhon ni dadaboru hasudungan ni rohana. Angkon okuon ni amana do hak ni anak na parjolo sorang, jana angkon lehenon do di anak i teanon na patut disia mangihutkon aturan.”

Aturan taringot tu Anak Na Durako

¹⁸ “Adong ma umpamana anak halaklahi na jogal roha, sai mangalo jana nada ra mangihutkon na nidok ni simatobangna haru pe nian na dung dipincang halahi ia.

¹⁹ Jadi angkon paadopon ni simatobangna i do anakna i tu jolo ni angka hatobangon ni kota inganan ni halahi i, jana pangidoonna ma anso diadili dakdanakna i di harbangan ni kota i.

²⁰ Angkon dokkonon ni halahi ma tu hatobangon ni kota i, ‘Na jogalan roha ni dakdanaknami on, sai mangalo jana nada ra mangihutkon hata na hami dok; pangabis-ngabis hepeng jana sai ra mabuk.’

²¹ Jadi angkon dangguran ni halaklahi na sakota i ma dakdanak i dohot batu lopus mate. Jadi songon i ma dalanna baenonmunu mangagohon hajahatan i. Begeon ni sandok jolma na di Israel ma na masa i, jana gabe mabiar be ma.”

Angka aturan na marragam

²² “Muda adong sada halak na mate hona uhum hara ni hajahatanna, jana digantung bangkena i di tiang panggantunganna,

²³ nada tola padiaron bangke i disi saborngin i, tapi angkon di na sadari i do i kuburkonon, angke mangalap uhum ni Debata do bangke na gantung di tiang i. Dikuburkon ma bangke i anso ulang dipahodar hamu tano na giot silehenon ni Tuhan Debatamunu i di hamu.