PANGARATAION 15 - BIBEL JAMITA NA DENGGAN

Taon hasesaan ni utang

¹ “Ganop di ujung ni taon papituhon, angkon sesaonmunu do angka utang.

² Songon on ma pambaenna. Ganop halak Israel na painjamkon hepeng tu dongan sabangsona, angkon sesaonna ma utang i. Tuhan sandiri do na manyesa utang i, jadi nada tola tungguonmunu be i.

³ Sian halak na asing tola do tungguonmunu, tapi anggo na nipainjamkonmu tu donganmu sabangso angkon sesaonmu do.

⁴ Pasupasuon ni Tuhan Debatamunu ma hamu di tano na giot silehenonNia di hamu. Di tonga-tonga ni bangsomunu nada adong dapot be halak na pogos

⁵ asalkon ma ra hamu mangoloi Tuhan jana jamot patuluskon sandok na huparentahon tu hamu di ari sadari on.

⁶ Pasupasuon ni Tuhan ma hamu songon na nijanjihonNa i. Painjamkon hepeng ma hamu tu bahat bangso, tapi anggo hamu nada pola porlu manginjam sanga na sian ise pe; kuasoanmunu ma bahat bangso, tapi sada bangso pe nada adong na markuaso di ginjangmunu.

⁷ Muda dung maringanan hamu sanoli on di tano na giot silehenon ni Tuhan Debatamunu di hamu, hape adong sian dongan sabangsomunu na marpogos di sada sian hutamunu i, ulang hamu hum na manyarihon tu dirina be jana manjua hamu mangurupisa.

⁸ Tapi angkon basa do hamu laho painjamkon halahi sabahat ni haporluanna.

⁹ Ulang jua hamu laho mangalehen injamon tusia, marhite alasan na dung donok taon hasesaan ni utang. Ulang paloas hamu pikiran na jahat sisongon i masuk tu bagasan rohamunu. Muda nada ra hamu mangalehen siinjamon i, pio-pio ma halakna i tu Tuhan laho mangaduhon hamu, jadi gabe dosa ma i di hamu.

¹⁰ Lehen hamu ma tu halak i sian na nionjar ni roha dohot sian basa ni roha, jadi gabe pasupasuon ni Tuhan ma sude karejomunu.

¹¹ Sai adong do dapot piga-piga halak na pogos dohot na hurangan di tonga-tonga ni halak Israel. Jadi hara ni i, Huparentahon tu hamu anso basa rohamunu tu halahi.”

Sibaenon tu angka hatoban

¹² “Muda adong donganmunu halak Ibrani, halaklahi sanga dadaboru na targadis sanga na pagadiskon dirina songon hatoban tu hamu, tola ma oloannia hamu onom taon lolotna, jana dung salpu i di taon na papituhon angkon padiaronmunu do ia kehe.

¹³ Ulang padiar hamu kehe boti rumar tangan ni hatoban na nipaluamunu.

¹⁴ Sian basa ni roha, lehen hamu ma tusia sanga aha na nibasa-basahon ni Tuhan tu hamu – biri-biri, gandum dohot anggur.

¹⁵ Ingot hamu ma, hatoban do hamu najolo di Mesir jana na dung dipalua ni Tuhan Debatamunu do hamu, hara ni i ma umbaen na hulehen parenta on tu hamu.

¹⁶ Tapi muda nada ra hatobanmi kehe, hara ni na holong rohania di hamu sabagas jana sonang rohania rap dohot hamu,

¹⁷ jadi angkon obanonmunu do halakna i tu pintu ni bagasmunu. Di inganan i ma, angkon lubangonmu pinggolna i, jadi gabe hatobanmu ma ia salolot di ngoluna. Angkon laing sarupa do baenonmunu tu hatobanmunu dadaboru.

¹⁸ Muda dipalua hamu sada hatoban, ulang baen hamu i sian dokdok ni rohamunu, angke madung dioloi ia hamu onom taon marhite satonga arga ni pangoloi na somal. Patulus hamu ma parenta on, jadi gabe pasupasuon ni Tuhan ma sude karejomunu.

Anak ni pahan-pahanan na parjolo sorang

¹⁹ Lombu jantan, hambeng jantan, dohot biri-biri jantan na parjolo sorang, haulkon hamu ma i tu Tuhan. Nada tola pakeon lombu i manarik bajak, jana biri-biri i nada tola cukuron.

²⁰ Ganop taon angkon panganonmunu do i rap dohot isi ni bagasmunu di adopan ni Tuhan, di inganan paribadatan na dung ditontuhon Tuhan.

²¹ Muda martihas do binatang i, tengka umpamana sanga mapitung sanga martihas na borat na asing, nada tola haulkononkon binatang i tu Tuhan Debatamunu.

²² Tola do panganonmunu i di bagas, jana hamu sude bope na ias dohot na so ias mangihutkon aturan ni ugamo tola do mangankonsa songon papanganmunu di ursa sanga hije.

²³ Tapi anggo mudarna i ulang pangan hamu, tapi angkon duruskononmunu do i tu tano songon aek.”