PANGARATAION 11 - BIBEL JAMITA NA DENGGAN

Hagodangan ni Tuhan

¹ “Haholongi hamu ma Tuhan Debatamunu jana setia ma hamu mangoloi sude parentaNia.

² Saonnari ingot hamu ma sanga aha na binotomunu taringot tu Tuhan sian pangalamanmunu. Anggo angka dakdanakmunu nada dialami halahi dope i. Hamu do na dung marnida hagodangan ni Tuhan, hagogoonNia, kuasoNia,

³ dohot angka hahomangan na nibaenNia. Diida hamu sandiri do sanga aha na nibaenNia tu raja ni Mesir dohot tu sude luatnia i.

⁴ Diida hamu do ias dihais Tuhan tentara ni Mesir, rap dohot sude kudo dohot karetana di na dibonomkonNia halahi di Laut Rara di na ro halahi mangkojar hamu.

⁵ Diboto hamu muse do sanga aha na nipatupa ni Tuhan di hamu di parhorsihan i taran so lalu dope hamu tuson.

⁶ Diingot hamu muse dope na nibaenNia maradopkon si Datan dohot si Abiram, anak ni si Eliab na sian Marga Ruben i. Di jolomunu sude, mabola tano i mamondut halahi, rap dohot donganna sabagas, bandar, sude hatoban dohot pahan-pahanan ni halahi.

⁷ Olo tutu, hamu ma na dung marnida dohot matamunu sandiri sude hahomangan i na dung dibaen Tuhan.”

Tarpasupasu tano i muda setia bangso i

⁸ “Oloi hamu ma angka aturan na hulehen tu hamu di ari sadari on, dung i tarbaen hamu ma manaripari batang aek i dohot mamasuhi tano na giot siingananmunu santongkin nari.

⁹ Jana lolot muse ma hamu mangolu di tano na mora boti na napu i na dung dijanjihon Tuhan tu ompumunu dohot tu pomparan ni halahi.

¹⁰ Nada songon tano Mesir ingananmunu najolo i anggo tano na giot siingananmunu i. Anggo disi angkon maradu gogo do hamu karejo laho mangaehi angka ladang, muda laho manyabur same;

¹¹ tapi anggo tano na giot siinganmunu i, angka dolok dohot rura-rura do; tano na nitombur ni udan.

¹² Tuhan Debatamunu do paturehon tano i dohot manjagosa sasataon.

¹³ Antong muda songon i, sai oloi hamu ma angka parenta na hulehen tu hamu di ari sadari on, haholongi hamu ma Tuhan Debatamunu i jana oloi hamu ma Ia sian sandok rohamunu.

¹⁴ Muda dibaen hamu songon i, gabe paroon ni Tuhan ma udan tu tanomunu i di hatihana, dung sidung hamu manyabi dohot di na mamungka hamu manyuan. Gabe tuk ma di hamu gandum, anggur dohot miak zetun,

¹⁵ maradu ruput di pahan-pahananmunu. Sandok sipanganon na porlu di hamu, rade ma i di hamu.

¹⁶ Ulang patola hamu dirimunu dipadao sian Tuhan laho marsomba dohot mangoloi tu angka debata na asing.

¹⁷ Muda dilanggar hamu parenta i, hona muruk ni Tuhan ma hamu. Nada paroonNia udan; mahiang ma tanomunu maradu marigang lopus nada marsuha suan-suanan. Jadi di bagasan hatiha na pendek mate ma hamu disi, haru pe nian tano na napu do na nilehenNa i di hamu.

¹⁸ Sai paingot-ingot hamu ma angka parentaNa i jana haholongi hamu. Tambatkon ma i di tanganmunu jana lilitkon di bohimu baen parningotan.

¹⁹ Ajarkon ma i tu angka dakdanakmu. Sai hobar-hobari hamu ma i dompak di bagas hamu sanga pe di na mardalanan, dompak maradian hamu sanga di hatiha markarejo.

²⁰ Suratkon ma i di tiang ni pintu ni bagasmu dohot di pintu ni horbanganmunu.

²¹ Jadi gabe siginjang umur ma hamu dohot angka dakdanakmunu di tano na dung nijanjihon ni Tuhan Debatamunu tu ompumunu. Salolot adong tano on laing disi ma hamu maringanan.

²² Haburjuhon hamu ma mangoloi angka aturan na Hulehen i tu hamu: Haholongi hamu ma Tuhan Debatamunu i, patulus hamu ma sandok na niparentahonNia tu hamu, sai hot ma hamu setia tuSia.

²³ Gabe paoroton ni Tuhan ma sude bangso i di jolomunu, jana ingananmunu ma tano ni angka bangso na gumodang jana na gumogo i sian hamu.

²⁴ Sude tano na nidege ni patmunu i gabe hamu nampunasa. Manggistang ma tanomunu sian parhorsihan na di Selatan lopus tu Pardolohan Libanon di Utara, dohot sian Batang aek Efrat di Habincaran lopus tu Laut Tonga di Hasundutan.

²⁵ Di sude luat i, baenon ni Tuhan Debatamunu i ma gok biar angka bangso i maradopkon hamu, songon na dung dijanjihonNia, lopus nada adong sahalak pe na mangambati hamu.

²⁶ Sadari on hulehen di hamu sada ombas laho mamili pasupasu sanga bura.

²⁷ Dipasupasu ma hamu muda dioloi hamu angka parenta ni Tuhan Debatamunu na hulehen di hamu di ari sadari on,

²⁸ tapi hona bura ma hamu, muda nada dioloi hamu angka parenta i, jana marbalik hamu marsomba tu angka debata na asing na so nisombamunu di hatiha na salpu.

²⁹ Muda dung dioban Tuhan hamu masuk tu tano na giot siingananmunu i, jadi angkon pajojoronmunu do pasupasu i sian Dolok Gerisim dohot bura sian Dolok Ebal. (

³⁰ Di Hasundutan ni Batang aek Jordan do parpayak ni dolok na dua i di luat ni halak Kanaan na maringanan di Rura Jordan, mangadop tu Hasundutan nada sadia dao sian angka hayu pamelean More na di lambung ni kota Gilgal.)

³¹ Nada sadia honok nari tariparanmunu ma Batang aek Jordan jana ingananmunu ma tano na giot silehenon ni Tuhan Debatamunu i di hamu. Dung dirampas hamu tano i jana maringanan hamu disi,

³² jadi sai oloi hamu ma sude aturan na hulehen tu hamu di ari sadari on.”