PANGARATAION 1 - BIBEL JAMITA NA DENGGAN

Patujolo

¹ Di buku on tarsurat do angka hata na nipasahat ni si Musa tu bangso Israel dompak di halongonan na di Habincaran ni Batang aek Jordan halahi. Di Rura Jordan na di lambung ni kota Sup do halahi topet, di holang-kolang ni kota Paran di sada ipar dohot kota Tafel, Laban, Haserot dohot Di-Zahab sabariba nari. (

² Sian Dolok Sinai lalu tu Kades-Barnea mamolus sian Luat Edom na mardolok-dolok i, adong dalanan sabolas ari daona.)

³ Di tanggal sada bulan sabolas di taon paopat puluhon dung ditandingkon halahi Mesir, dipabolkas si Musa ma tu bangso i sandok na nisuruhon ni Tuhan sidokkononnia tu halahi.

⁴ Tulus ma i dung ditaluhon si Musa si Sihon raja ni halak Amori na mamarenta di kota Hesbon, dohot si Og raja ni Basan na mamarenta di kota Astarot dohot kota Edrei.

⁵ Jadi dompak di Habincaran ni Jordan na di Luat Moab bangso i, dipungka si Musa ma patorangkon angka aturan dohot parenta ni Tuhan. Didok si Musa ma,

⁶ “Taran di Dolok Sinai hita, didok Tuhan Debatanta do, ‘Tuk ma lolotna hamu di dolok on.

⁷ Antong rorak hamu ma bandarmunu i jana kehe ma hamu tu tano ni halak Amori na mardolok-dolok i dohot tu sude luat na humaliangna i – tu Rura Jordan, tu tano na martor dohot tu tano napa na toruk, tu Luat Selatan dohot tu topi ni Laut Tonga. Kehe ma hamu tu tano Kanaan, manyalpui partoran Libanon lopus tu aek na godang Efrat.

⁸ Ingot ma; Au do Tuhan na dung manjanjihon sude tano i tu ompumunu si Abraham, si Ishak dohot si Jakob maradu tu pomparan ni halahi. Antong, kehe ma hamu, jana ingani hamu ma luat i.’ ”

Diangkat si Musa angka Hakim

⁹ Didok si Musa ma tu bangso i, “Dompak di Dolok Sinai hita, hudok do tu hamu, ‘Maborattu do muda hum au sajo manogu-nogu hamu. Nada lobas au i sasada au, dibaen

¹⁰ madung martamba bahatmunu dibaen Tuhan Debatamunu sabahat ni bintang na di langit.

¹¹ Sai mur ditambai Tuhan Debata ni ompumunu ma nian bahatmunu lalu tu saribu lompit jana dipasupasu ma hamu songon na nijanjihonNa i!

¹² Tapi bia ma he parjadina anggo sasada au do mamorsan tanggung jawab na borat on laho paturehon sude parkaromunu?

¹³ Jadi hara ni i, pili hamu ma sian ganop marga sanga na piga halaklahi na marbisuk, gok pangartian jana na marpangalaman anso huangkat halahi laho mamimpin hamu.

¹⁴ Madung denggan dijagit hamu usul i.

¹⁵ Jadi gabe hubuat ma angka pamimpin na marbisuk jana na marpangalaman na nipilimunu i sian tonga-tonga ni margamunu, jana huangkat halahi laho mamimpin hamu. Deba ma i dibaen gabe pamimpin ni saribu halak, na asing dibaen pamimpin ni saratus halak, adong ma na nibaen gabe pamimpin ni lima pulu jana adong dibaen gabe pamimpin ni sampulu halak. Huangkat muse dope angka pamimpin na asing na gabe kapala ni angka marga-margamunu.’

¹⁶ Hubaen do di hatiha i karejo ni halahi songon on, ‘Parrohahon hamu ma angka salisi na masa di tonga-tonga ni bangsomunu. Baen hamu ma haputusan na tigor, sanga na mardomu tu bangsomunu sajo parkaro i bope na mardais tu halak na asing na tinggal rap dohot hamu.

¹⁷ Ulang teleng baen hamu haputusan; angkon dos do baenonmunu tu ganop halak panimbangna, ulang pola mangaligi sanga ise halakna i. Ulang habiari hamu sanga na ise pe, angke sian Debata do haroroan ni haputusan na nibaenmunu. Muda adong sada parkaro na mamaoltu di hamu, oban hamu ma i tu au. Anso au mamutuskonsa.’

¹⁸ Laing hulehen dope di hatiha i angka sitiopon ni rohamunu taringot tu sasude pangalaho na asing na angkon sipatupaonmunu.”

Barita ni mata-mata na ditongos sian Kades Barnea

¹⁹ “Dung i tapatulus muse ma sanga aha na niparentahon ni Tuhan tu hita. Tatadingkon ma Dolok Sinai, lalu mardalan hita mamolus parhorsihan na bidang jana na jorbut i laho tu luat partoran ni halak Amori. Di na lalu hita di Kades-Barnea,

²⁰ hudok do, ‘Saonnari madung lalu hamu di luat partoran ni halak Amori, tano silehenon ni Tuhan Debatanta tu hita.

²¹ Ligi ma, indu ma di adu tano na nilehen ni Tuhan Debatamu tu ho. Kehe ma hamu mangingani tano i songon na niparentahon ni Tuhan, i ma Debata na nisomba ni ompumu. Ulang mabiar rohamunu sanga mandele.’

²² Hape ro ma hamu tu au mandok, ‘Dumenggan ma tasuru jolo sanga na piga-piga halak laho mamata-matai luat i anso malo halahi paboahon tu hita sanga dalan dia na dumenggan sibolusonta jana sanga angka kota dia na adong disi.’

²³ Hujagit do usul i, gabe hupili ma dua bolas halak, sahalak sian ganop marga.

²⁴ Dimasuhi halahi ma antong luat na martor i lopus tu Rura Eskol lalu ditangkasi halahi ma luat i.

²⁵ Dung i mulak ma halahi mandapotkon hita maroban batu ni hayu na dapot ni halahi sian i jana dipabotohon halahi ma na napu situtu do tano na giot silehenon ni Tuhan Debatanta i.

²⁶ Hape dialo hamu do parenta ni Tuhan Debatamunu i jana nada ra hamu mamasuhi luat i.

²⁷ Mungut-ungut do hamu sama hamu songon on, ‘Goyak do roha ni Tuhan tu hita. Dioban Ia pe hita ruar sian Mesir anso hum pasahatkon hita do tu bagasan tangan ni halak Amori i anso dibunu halahi hita.

²⁸ Jadi, aha ma he gunanta tusi? Mabiar hita. Sian angka halak na tasuru tusi paboahon tu hita, gumogo jana tumogos-togos do bangso i ulang hita, jana sasalangit gincat ni tembok ni kota na niinganan ni halahi. Madung diida halahi raksasa disi!’

²⁹ Tapi hudok do, ‘Ulang mabiar hamu tu angka jolma i.

³⁰ Tuhan Debatamunu do mamimpin hamu dohot marporang humopkop hamu songon na dung niidamunu sandiri di Mesir

³¹ dohot di parhorsihan. Diida hamu do sanga songon dia parobanNia di hamu lopus horas hamu di dalan i lalu tu inganan on nada adong imbarna songon sada ama na marompa anakna.’

³² Tapi haru pe na dung hudok songon i, laing na so ra do hamu porsaya tu Tuhan Debatamunu,

³³ haru pe sai tongtong dijoloani Ia hamu laho manjalahi inganan parbandaran di hamu. Dijoloani Ia do hamu laho patuduhon dalan, di bagasan tiang api taran borngin dohot tiang ombun muda di arian.”

Tuhan manguhumi bangso Israel

³⁴ “Ditangihon Tuhan holosmunu i, gabe muruk Ia. Marsumpa do Ia,

³⁵ ‘Sahalak pe sian na sasundut na jahat on nada tola masuk tu luat na dung Hujanjihon i tu ompumunu.

³⁶ Hum si Kaleb anak ni si Jefunne ma na masuk tusi, hara ni na tong-tong setia ia tu Au. Tu si Kaleb dohot tu pomparannia noma lehenonKu luat na dung diliatinia i.’

³⁷ Patunda ni hamu muse, gabe muruk ma Tuhan tu au, didok do, ‘Ho pe Musa, nada masuhanmu luat i.

³⁸ Tapi patogu ma roha ni pangurupimu si Josua anak ni si Nun i. Harana ia noma na sahat tusi jana na giot mamimpin Israel mambuat tano i.’

³⁹ Angka dakdanakmunu na mamenek tu dope laho paasingkon na denggan sian na jat, i ma angka dakdanak na nidokmunu na giot rampason ni angka musumunu, tu halahi noma lehenonKu tano i, jana inganan ni halahi ma i.

⁴⁰ Tapi anggo hamu, mulak ma hamu mangulahi tu parhorsihan mamolus sian dalan tu Solok Akaba.

⁴¹ Dialusi hamu ma, ‘O Musa, madung mardosa hami maradopkon Tuhan. Tapi saonnari na giot maju ma hami marporang songon na niparentahon ni Tuhan Debatanta.’ Gabe marhobas be ma hamu laho marporang dohot paretongan na mandok, na mura do mangaroro luat partoran i.

⁴² Hape didok Tuhan ma tu au, ‘Ulang padiar halahi marporang, angke nada giot Au mandongani halahi, talu do halahi naron baenon ni musu ni halahi.’

⁴³ Hupalalu do tu hamu sanga aha na nidok ni Tuhan i, hape nada parduli hamu. Mangalo do hamu tu Tuhan, jana pateal-tealkon ma hamu marbaris laho kehe tu luat partoran i.

⁴⁴ Gabe ruar ma halak Amori na mangingani luat na martor i mangalo hamu. Sun do bahat ni halahi, songon dia loba na sarsar. Dikojar halahi ma hamu lopus tu Horma, disi ma hamu talu dibaen halahi di tano partoran Edom.

⁴⁵ Dung i pio-pio ma hamu tu Tuhan mangido tolong, hape nada ra be Ia manangihon sanga mamparrohahon hamu.

⁴⁶ Dung salpu i, lolot sajo ma hita maringanan di Kades.”