PAMUNGKAAN 2 - BIBEL JAMITA NA DENGGAN

¹ Songon i ma dipasidung sudena langit dohot tano bope isina sudena.

² Di ari papituhon, dipasidung Debata ma karejoNia, lalu maradian ma Ia.

³ Dipasupasu jana diparbadiai Ia ma ari papituhon i, dibaen di ari i ma dipasidung Ia karejoNia na manompa i, gabe maradian ma Ia karejo.

⁴ On ma barita panompaon ni langit dohot tano on. Di hatiha na nitompa ni Tuhan Debata langit dohot tano on,

Porlak Eden

⁵ nada adong dope suan-suanan di tano on, jana nada adong dope same na martumbur, dibaen nada diparo Tuhan Debata dope udan boti jolma pe nada podo adong na giot mangkarejohon tano i.

⁶ Tapi adong ma ombun manyorop tu ginjang sian tano i, gabe dibornohi ma sandok tano on.

⁷ Dung i dibuat Tuhan Debata ma saotik tano i, jana dibaen Ia ma sada jolma sian tano i; jadi diombuskon Ia ma hosa hangoluan tu lubang ni igung ni jolma i, gabe mangolu ma jolma i.

⁸ Dung i dibaen Tuhan Debata muse ma kobun di Eden, di sabola Habincaran, jana tusi ma jolma na nitompaNia i dibaen Ia maringanan.

⁹ Dipartubuhon Debata ma disi sude ragam ni hayu na jeges-jeges, na marbatuhon parbatu na denggan panganon. Di parsitongaan ni kobun i tubu ma hayu na mangalehen ngolu, dohot hayu na mangalehen parbinotoan taringot tu na denggan dohot na jahat.

¹⁰ Adong ma sada batang aek na mamolus di Eden na mangaehi kobun i; di ruar ni Eden i marbagi opat ma batang aek i.

¹¹ Batang aek na parjolo, margoar Pison; i ma batang aek na mamolus manghaliangi tano Hawila. [

¹² Dapot do disi sere napolin dohot muse angka na huskus na jarang dapot dohot angka batu mutiha.]

¹³ Batang aek na paduahon margoar Gihon; i ma na mamolus humaliang tano Kus.

¹⁴ Batang aek na patoluhon margoar Tigris, i ma na mamolus di Habincaran ni Asur, jana batang aek na paopatkon margoar Efrat.

¹⁵ Dung i dibaen Tuhan Debata ma jolma i maringanan di Kobun Eden i laho mangkarejohon bope pature-turehon kobun i.

¹⁶ Didok Tuhan Debata ma tu jolma i, “Tola do panganonmu parbatu ni sude suan-suanan na di kobun on,

¹⁷ asing sian hayu na mangalehen parbinotoan taringot tu na denggan dohot na jahat. Nada tola panganonmu batuna i; muda dipangan ho i, mate ma ho laing di na sadari i.”

¹⁸ Dung i didok Tuhan Debata ma muse, “Nada denggan punjung jolma i mangolu. BaenonKu ma donganna na tumbuk mangurupisa.”

¹⁹ Jadi dibuat Ia ma tano jana ditompa Ia ma sude binatang na di darat dohot unggas na di awang-awang. Dung i dipasahat Ia ma i sudena tu jolma i anso diidasa sanga songon dia baenonna manggoari binatang-binatang i dohot angka unggas i. I ma mulana gabe margoar be angka binatang dohot angka unggas i.

²⁰ Songon i ma digoari jolma i angka unggas dohot angka binatang sudena; tapi sada pe nada adong sian i na tumbuk mangurupi jolma i.

²¹ Jadi dibaen Tuhan Debata ma jolma i tarpodom sinok sajo, jana di na modom jolma i, diendat Tuhan Debata ma sada rusuk sian pamatang ni jolma i, ditutupi Ia mangulahi dohot sibukna i.

²² Dibaen Tuhan Debata ma sahalak dadaboru sian rusuk i, dung i dioban Ia ma i tu jolma i,

²³ gabe ninna jolma i ma, “On ma da ibana na sahorong dohot au – holi-holi sian holi-holingku, jana sibuk sian sibukku. ‘Dadaboru’ do goarna, angke na nibuat sian halaklahi do ia.”

²⁴ Hara ni i ma umbaen na nitadingkon ni halaklahi amangna dohot inangna, jana gabe sada dohot dadaboruna, gabe sada ma halahi na dua.

²⁵ Marsaemara do halaklahi i dohot dadaboru i, tapi nada maila halahi.