NAHUM 2 - BIBEL JAMITA NA DENGGAN

Hadadabu ni Ninive

¹ Ale Ninive, madung ro panyaroso, giot manyegohon ho! Jago ma angka benteng partahananmi! Denggan ma jago hamu angka dalan! Markobas ma hamu giot mangalo. (

² Satutuna do na giot pasuangon ni Tuhan hagodangan ni si Jakob songon hagodangan ni Israel, anso mulak songon najolo taran so dirampas angka musu.)

³ Tompa ni parince ni musu, rara, songon mudar dipake baju porangna, Na dung hobas do musu laho manangkup. Tudos tu api, manyirlak bosi ni karetana Panyihal-nyihalon sude kudona.

⁴ Maradu hipas angka kareta di dalan i tu jolo. Di galanggang marsikojaran halahi. Songon obor idaon gara-gara, marpacu maradu hipas humasiksak songon hilap.

⁵ Dipio angka ulubalang anso maju; Sangkot-sangkot pardalan ni halahi laho tu jolo. Mopop halahi marlojong tu tembok ni kota, manigor dipajongjong ma palangna.

⁶ Ma pola tarbuka pintu ni angka batang aek, jana sursar ma na di bagas godang sude!

⁷ Hona tangkup ma dadaboru ni raja i, jana dibukai pakeanna, mangangguk bingar jana tumatangis ma anak boru pangoloi, morong-orong halahi songon darapati jana hara ni na mandele, ditompuki ma andorana.

⁸ Mangambur be masarsar rayat ni Ninive songon aek na mabulak sian gadu-gadu na matolbak. Tarbege ma na marsurak, “Maradian! Maradian!” hape nada adong na ra ro mangulahi.

⁹ Rampasi sude sere dohot perakna! Harana nada marnaabis angka arta, marlobian do dison arta na jeges.

¹⁰ Gariang, hagariangon dohot parkancitan! Hancit ate-ate hara ni jorbutna. Humitir totna hara ni galena. Bohi i langan hara ni biarna.

¹¹ Ma di dia kota i saonnari, kota na tudos tu liang parasaran ni singa i, inganan ni angka anak ni singa dilehen mangan, inganan situjuon ni singa boru-boru dohot jantan, inganan ni anak ni singa sonang so haribo-riboan?

¹² Najolo disi hian ma singa manjomak soroanna, jana marsuragehon di boru-boruna dohot di anakna. Di gohi ia asarnia sibak-sibak ni juhut ni soroanna.

¹³ “Musumu do Au,” ninna Tuhan Na Markuaso i, “TutunganKu ma sude angka karetamu lopus abis. Marmatean ma angka tentaramu di bagasan parporangan, jana pambuatanKu ma sandok na nipambuatanmu sian halak na asing. Nada habegean be angka tuntutan ni suruanmu.”