MASMUR 139 - BIBEL JAMITA NA DENGGAN

Debata na umboto jana na pature-ture sasudena

¹ Ale Tuhan, disihiri Ho do au, jana ditanda Ho au.

² Diboto Ho do sude pambaenanku; sian na dao diboto Ho do pikiranku.

³ Diida Ho do au, sanga na karejo sanga na maradian; diboto Ho do sude na hubaen.

⁴ Salang dompak so mandok hata dope au, diboto Ho do sanga aha na giot dokkononku.

⁵ Dihuliangi Ho do au sian sude panjuru, jana diondingi Ho au dohot kuasoMu.

⁶ Na lobi bagas ma antong parbinotoan i di au, nada tartaja pikiranku.

⁷ Tu dia ma au kehe anso malua sian kuasoMu? Tu dia ma lojonganku anso dao sian joloMu?

⁸ Muda manaek au tu langit, disi do Ho, sugari modom au di hamatean, disi pe laing adong Ho.

⁹ Muda habang au salpu tu Habincaran sanga maringanan au di Hasundutan na dumao,

¹⁰ disi pe laing diurupi Ho do au, disi pe laing ditogu tanganMu do au.

¹¹ Muda hupangido anso digupgupi na golap au sanga na torang di na humaliang au gabe borngin,

¹² nada golap anggo di Ho hagolapan i, torang songon arian borngin i na torang dohot na golap nada adong di Ho imbar ni i.

¹³ Ho do na manompa sude bagian ni pamatangku. Digana Ho do au dibagasan bortian ni dainang.

¹⁴ Hupuji ma Ho, angke hahomangan situtu do na dibaenMu tu au, sude pambaenanMu hahomangan do jana patut gabe halongangan,

¹⁵ Dompak na dijadihon angka holi-holingku, jana jamot dipadomu-doMu di bagasan bortian ni dainang, di na mur magodang au di bagasan sihabunian i diboto Ho do au na disi.

¹⁶ Nada sorang dope au, madung diida Ho au, jana madung tarsurat ari-ari ni ngolungku di bagasan bukuMu, andorang so adong dope sanga aha.

¹⁷ Ale Debata na maol do pikiranMu, nada tarastui au jana bilanganna na bahat situtu!

¹⁸ Muda huetong bahatna, umbahat do sian horsik; muda tarsunggul au, laing Ho do hupikiri.

¹⁹ Sugari dipusa Ho ma nian halak parjahat, ale Debata, jana padao ma sian au angka siduruskon mudar!

²⁰ Dipardokkoni halahi do angka pangalaho na jahat taringot tu Ho, jana ditilakoi halahi goarMu.

²¹ Goyak sajo do rohangku mida halak na margoyak ni roha tu Ho, ale Tuhan, jana sego do rohangku mida na mangalo Ho.

²² Sun do goyak ni rohangku mida halahi, jana huetong musu do i.

²³ Tangkasi ma au ale Debata, jana dodo ma rohangku; uji ma au jana tandai ma pikiranku.

²⁴ Pareso ma betak na sala do dalan na hubolus, togu ma au di dalan na manongtong.