MASMUR 125 - BIBEL JAMITA NA DENGGAN

Sonang do di linggoman ni Tuhan

¹ Sanga ise na porsaya tu Tuhan, i ma na songon Dolok Sion, na togu nada tarhutur, jana tohong nada targulotkon salolot-lolotna.

² Songon angka dolok na mangondingi Jerusalem, songon i ma pangondingi ni Tuhan di bangsoNa, saonnari ro di salolot-lolotna.

³ Nada sai torus markuaso anggo parjahat di tano ni angka halak na burju, anso ulang dohot muse na burju i mambaen na jahat.

⁴ Ale Tuhan baen ma na denggan tu halak na burju, tu halak parroha na bulus.

⁵ Tapi muda diuhum Ho halak na jahat, uhumi muse ma sanga ise na manyimbil sian dalanMu. Sai horas torkis ma bangsoMi!