MASMUR 10 - BIBEL JAMITA NA DENGGANTangiang mangido hatigoran 1 Biasi songon i daoMu o Tuhan, jana martabuni Ho taran hami di hasusaan? 2 Mardongan jungkat halak na jahat i mamparkanciti na dangol; padiar ma hara ni hajahatanna gabe halahi manaon. 3 Halak na jahat manghatahon na nihalungunkon ni rohana, halak na lahap mamurai jana manulak Tuhan. 4 Nada parduli tu Tuhan anggo halak pardosa; hara ni jungkatna, dipikiri ia nada adong Debata. 5 Halak na jahat marlabo do sian sude karejona; nada diastui ia Tona Ni Tuhan, jana dipalayas ia sude alona. 6 Ning rohania di bagasan, “Karejongku nada adong sundatna, nada hona mara salolotna.” 7 Mamurai ia jana mangondam, sude hatania gok hagigian dohot hajahatan. 8-9 Martabuni ia di angka huta giot mamunu halak na so marsala. Songon singa paintehon di balik ni ramba na poso, mangaligi-ligi halak na so margogo. Diolat ia halak na dangol di inganan na buni, ditangkup lalu disarat ia sian i. 10 Dung i madabu ma na so margogo i lalu mate, pambaen ni hagogoon ni halak parlate. 11 Ning rohania, “Debata madung lupa, nada diparrohahon ia; jana nada idaonNia ro di salolotna.” 12 Jongjong ma Ho Tuhan, uhumi ma halak parjahat, ulang halupahon halak na marsak. 13 Biasi torus dilayasi halak na jahat i Debata, jana marpikir, nada ra Debata manguhumna? 14 Tapi ale Debata diida Ho do parkancitannami, jana tontu do tolonganMu hami. Halak na so margogo pasahatkon tu Ho dirina sudena, Ho do na mangurupi na so marama so marina. 15 Ponggolkon ma hakuasoon ni halak na jahat marroha, uhumi hajahatanna i anso jora. 16 Tuhan do raja ro di salolotna; angka bangso na so mananda Ia angkon mago sian tano na nilehenNia. 17 Tuhan, ditangihon Ho do tangiang ni halak na bile, jana dipagodang Ho do roha ni halahi be. 18 Ho do na manangihon jana mangurupi na so marama jana na diparkanciti, ulang adong be jolma di portibi na puluk manjahati tu halahi. |
Indonesian Bible Society
Indonesian Bible Society