JOB 40 - BIBEL JAMITA NA DENGGAN

^1-2 O ale Job, diadopi ho ma Au Debata Na Sun Markuaso; ra ma he ho talu sanga ra ma he ho manggaga?”

Si Job

^3-4 Dung i dialusi si Job ma, “Songon halak na oto do au manghobari da Tuhan. Aha ma he alus na tarlehen iba? Nada adong da sanga aha na giot sihobaranniba.

⁵ Mabahattu ma i na hupajojor i.”

⁶ Dung i didok Tuhan dope tu si Job sian bade mangulahi.

Tuhan

⁷ “Adopi bo Au songon halaklahi, jana alusi ma dison sude na Husapai.

⁸ Na giot aloonmu ma he hatigoranKu, jana patigoronmu ma dirimu di na pasalahon Au?

⁹ Gogo ma he ho songon Au? Tarbaen ma he mangaronggur soramu songon sorangKu?

¹⁰ Pajeges ma dirimu mamake hagodangan dohot hajagaron, jana pake ma hatongaman dohot hamuliaan.

¹¹ Tatap ma sanga ise halahi na ginjang marroha; palalu ma muruk ni rohamu jana baen ma halahi maila.

¹² Olo, tatap ma da halak na sombong, patunduk ma! Ropukkon ma halak na jahat di ingananna.

¹³ Tanom ma halahi sudena di bagasan abuan; rahuti ma halahi di inganan hamatean.

¹⁴ Jadi gabe Au ma parjolo na mangoku paboa na monang ho mangasahon gogomu.

¹⁵ Pamanat ma jolo Behemot, kudo Nil raksasa i; laing songon ho, i pe na Hutompa do da i. Angka ruput do sipanganonna, songon lombu na biasa.

¹⁶ Tapi pamanat ma jolo hagogoan na adong di pamatangna dohot pamuntial ni angka dagingna!

¹⁷ Dipatingkal ia ihurnia songon dia hayu aras, juhut ni hae-haena i tohong jana karas.

¹⁸ Holi-holina i pir sai songon tumbaga, patna i togu songon batangan ni baja.

¹⁹ Sian sude na Hutompa; ummasing do i. Hum na manompasa sajo ma i na tuk patundukkonsa!

²⁰ Di angka tor inganan ni binatang harangan margiri marjop ni roha, disi tubu angka rumput na gabe sipanganonnia.

²¹ Modom-modom di toru ni antatada ia martabuni di antara ni galoga ia di rawa-rawa.

²² Dilinggomi halinu ni tada-tada i ma ia. Bona ni ampolu na di topi batang aek parsilaunganannia.

²³ Nada ia mabiar haru pe sun dorasna Batang aek Jordan laing songon na somal do ia haru pe aek lalu tu bohina.

²⁴ Ise ma he na puluk mambulang bohinia, lalu manangkupsa mambaen jorgong di muncungna?