JOB 31 - BIBEL JAMITA NA DENGGAN

¹ Marjanji do au mardongan sumpa na so ro be rohangku di bujing-bujing na poso muda huida.

² Aha dehe na nibaen ni Debata Na Markuaso tu hita? Bia dehe baenonNia mamalos pambaenan ni jolma?

³ Diparo Ia do parmaraan dohot hasusaan tu halak na mambaen hajahatan.

⁴ Diboto do sasude pangalahongku; dipamanat Ia do sandok langkangku.

⁵ Marsumpa do au na so unjung hubaen na so tama, na so jungada muse do au manipu tu halak.

⁶ Padiar ma di timbangan na somal au ditimbang Debata, gabe botoonNia ma au na so marsala.

⁷ Sugari rupani na manyimbil iba sian dalan na lidang, sanga na manarik tu rohaniba na rorang, betak mardais tanganku tu dosa,

⁸ sai gabe halak na asing ma marsaulihon na husabur, jana sai sisoada ma sude suha ni karejongku.

⁹ Sugari rupani na jungada por rohangku mida na nibuat ni hombar bagasku, jana martabuni au manungkirisa sian balik ni pintu,

¹⁰ sai gabe pardahan ni halak na asing ma parsereanku; sai modom di podoman ni halaklahi na asing ma jolmangku.

¹¹ Muda na tutu hubaen dosa na songon i, na patut ma au diuhumi.

¹² Songon api narako do dosa i mamusa, sandok sinadonganku abis ma ditutungisa.

¹³ Di na humolos naposongku hara ni na sala hubaen tu haknia, hutangihon do i jana hubaen na patut sian ias ni roha.

¹⁴ Muda nada songon i, bia ma hubaen mangadopi Debata? Aha ma alusniba muda ro Ia manguhumi iba?

¹⁵ Nada he laing Debata do na manompa au, dohot na manompa angka naposongku?

¹⁶ Inda jungada na so ra au manolong halak na bile, sanga padiarkon angka na mabalu mangolu di na mandele.

¹⁷ Inda unjung hupadiar tangkuraparon na so marama so marina, hape au sandiri tuk do panganonniba.

¹⁸ Sian na menek do halahi sai hupature-ture salolot mangolu au, ngolu ni halahi sai hupapade.

¹⁹ Muda tarpaida au halak na hurangan, na so tarbaen manobusi pakean hara ni hapogosan,

²⁰ wol na sian biri-biringku sandiri hubaen palaskonsa gabe dipuji ia ma iba sian sandok rohana.

²¹ Muda jungada ma hutipu na so marama, hara ni na marpos roha monang parkaro iba,

²² sai maponggol ma tanganku dua-duana, lopus taldus marsirang sian abara.

²³ Nada na ra iba mambaen songon i, angke uhuman ni Debata mambaen heput roha disi.

²⁴ Na so unjung do hupangasahon sinadonganku,

²⁵ sanga pe huanggarkon hamoraanku.

²⁶ Na so jungada do au marsomba mataniari na sihar marsinondang sanga bulan na rumondang.

²⁷ Nada unjung tartarik rohangku tusi, sanga pe huumma tanganku giot mamparsangapi.

²⁸ Dosa na songon i patut do simatehonon; angke Debata Na Markuaso i madung disoadahon.

²⁹ Na so jungada do au marjop ni roha hara ni musungku na sumusa; sanga marmoga-moga iba hara ni na marmara ia.

³⁰ Nada hutangiangkon anso mate alongki, nada unjung hubaen dosa sisongon i.

³¹ Diboto angka halak na markarejo tu au do, hutamu do di bagasku sanga ise sajo.

³² Ungkap do pintu ni bagasku di halak na mardalanan; nada jungada hupadiar halahi habornginan di dalan.

³³ Anggo halak na asing dibunihon do dosana, hape anggo au nada unjung songon i da.

³⁴ Nada huhabiari pandapot ni halak na bahat, jana nada parduli au di hata jungkat ni halak. Na so ra do au so di bagas, sanga so sajo, hara ni na mabiar dipalayas.

³⁵ Na so adong be ulaning sanga ise na ra umbege hataniba? Tahan do au marsumpa paboa na tutu do i sudena. Sai dialusi Debata Na Markuaso i ma jolo nian iba. Sugari disuratkon tuhas-tuhas ni musungku tu au anso tangkas sude di jolo ni matangku,

³⁶ jadi sian godang ni rohangku hubaen ma i di abarangku, jana songon tuku hujujung ma i di ulungku.

³⁷ Sanga aha na hubaen, paboaonku ma i tu Debata, jana gakgak ma au padorgak ulu di joloNa.

³⁸ Sugari tano na hujama i tano na hutangko, jana sian nampunana humani hupogo,

³⁹ sugari suhana i abis hupangan, jana hupadiar na manyuan i male-malean,

⁴⁰ sai ulang ma tubu singkoru dohot gandum di ladang i tapi sai tubu ma sihupi dohot ri disi.” Songon i ma hata ni si Job.