JOB 26 - BIBEL JAMITA NA DENGGAN

Si Job

^1-2 “Diambang ho ma lakna na dung malo ma ho mangalehen partolongan tu au on na gale boti na abis hagogoan!

³ Diambang ho ma lakna denggan sipaingot dohot pangajaran na nilehenmu tu au halak na bodo on!

⁴ Ise ma he na ra manangihon na nidokmi sude? Ise manuturi ho mandok hata songon i na lipe?”

Si Bildad

⁵ “Humitir be ma angka halak na di tanoman, aek pe disi dohot na manginganisa maradu marhitiran.

⁶ Di adopan ni Debata, talak do inganan ni na marmatean, nada martutup gabe tangkas diSia haidaan.

⁷ Dipahembang Debata do langit na di Utara, jana digantungkon Ia do portibi di inganan na soada.

⁸ Digohi Ia marlobi-lobi tu ombun i, hape laing nada sibak sanga matapor ombun i.

⁹ Ditabunihon Ia do rupa ni bulan tula, di balik ni ombun na nipahirbangNia.

¹⁰ Digombar Ia simaningko di sisik ni lautan, manyirang na torang sian hagolapan.

¹¹ Di na manggorahon Ia marsora na marsaringar, humutur ma angka tiang panungkol di langit.

¹² Talu do dibaen kuasoNia laut na bidang an dohot Rahab pe dibasbas Ia do marhite surung ni hamatean.

¹³ HosaNia do manyapu langit jabat maradu sihar; dibunu Ia do naga na giot maporus dohot tanganNia.

¹⁴ Tapi tanda ni kuasoNia ma i sudena; hum sora na lingo-lingoon do na lalu tu parbinegeanta. Na otik ma da na haastuan hita satontang tu Debata maradu hagodanganNia!”