JOB 16 - BIBEL JAMITA NA DENGGANSi Job 1-2 Jotjot do hubege pandapot na songon on; “Hum na pahancitkon do apo-apomon. 3 Andigan pe he antahonmu hata na rumar on? Aha dehe na manyosoi rohamu mangalehen alus? 4 Sugari sura hamu au, jana au hamu, au pe laing malo do pajojor na nidokmunu. Husabur tu hamu hata na gara; mopeng-openg ma nibaen uluniba. 5 Hupapir rohamunu dohot hata na denggan angka hatangku mambaen roha haapoan. 6 Muda iba mandok hata, nada marguna jana muda hohom pe iba, na hancitniba nada ummaha. 7 Debata do mambaen abis gogo iba, disintakkon do sude isi ni bagasniba. 8 Dialo jana ditangkup Ia do au. Saonnari marniang mandamos do pamatangku, jana i ma tandana di halak na bahat na tutu au pardosa na jahat. 9 Hara ni goyak ni rohaNa, pamatangniba jubak-jabik dibaen Debata; di santak ni murukNa manaili Ia tu iba. 10 Maradu ngangang pamangan ni halak mangincahi au; marrongom mambalbal au jana ditampeleng dohot hurumku. 11 Dipasahat Debata do iba tu tangan ni na so hasaya; didabu muse tu tangan ni na so marguna. 12 Sonang humani do ngolungku so adong susa hape ompot ma Debata mangalo manyaroso iba. Dijomak Ia ma tangkuhuk lalu disampakkon Ia au; dibaen Ia ma au panomboan ni jurukNia. 13 Nada jabat adong ibo ni rohana torus manembak Ia tu au, lopus gabe use isi ni butuhangku. 14 PangaroroNia songon ulubalang marporang, diparkanciti Ia iba so maralang-alang. 15 Mamake abit goni ma au tanda ni hamarsahan, jana juguk di abuan hara ni hataluan. 16 Marrarai bohingku hara ni na tangis; marbosoli lampak ni matangku marlombaman, 17 hape nada au mangasa hagogoan; tangkas do na bulus pangidoanku maradopkon Tuhan. 18 O tano, ulang ma tabunihon angka na sala na masa tu au. Ulang ma pahohom piopiongku na mangido hatigoran. 19 Huboto do anggo pangidoanku di banua ginjang do; saksihononNia ma, anggo au na so mardosa do. 20 Diincahi jana dipartatai angka dongan iba; lalu tangis ma au mangido tolong tu Debata. 21 Iale, sugari nian Debata sandiri ma mangampini di joloNia; songon halak na rade mangondihon ale-alena. 22 Nada sadia be angka taon ni ngolungku na tinggal i, kehe noma au santongkin nari jana nada mulak mangulahi. |
Indonesian Bible Society
Indonesian Bible Society