JEREMIA 32 - BIBEL JAMITA NA DENGGAN

Manobusi tano si Jeremia

¹ Di taon pasampuluhon mamarenta si Zedekia raja ni Juda, i ma di taon pasalapan bolaskon dung mamarenta si Nebukadnesar raja ni Babel, mangkuling ma Tuhan tu au.

² Topet ma hatiha i dompak ro tentara ni raja Babel mangaroro Jerusalem. Ditahan Raja Zedekia ma au di alaman ni bagas godang ni raja i

³ hara ni na ditudu au pabotohon na nidok ni Tuhan songon on, “PadiaronKu do raja ni Babel manaluhon kota on.

⁴ Raja Zedekia pe nada malua, tapi dohot do ia pasahaton tu raja ni Babel. Mangadop ma ia tu raja i jana manghobari sandiri dohot ia.

⁵ Dung i obanonna ma si Zedekia tu Babel jana maringanan disi lopus Huuhumi ia. Haru pe diporangi ia halak Babel, nada manjadi karejonia i. Au Tuhan, madung mandok songon i.”

⁶ Didok Tuhan ma tu au

⁷ na giot ro si Hanameel anak ni udangku si Salum laho mangido anso hutobusi tanonia di Anatot na di Luat Benyamin. Angke au do antong koumnia na sumolkot na patut manobusi tano i.

⁸ Jadi tumbuk ma songon na nidok ni Tuhan, ro ma antong si Hanameel tu au di alaman ni panjagoon i jana didok ia ma anso hutobusi tanonia i. Hara ni i ma umbaen na pos rohangku paboa na tutu situtu do Tuhan mandok hata tu au.

⁹ Jadi hutobusi ma tano i sian si Hanameel, hutimbang ma hepeng disia: pitu bolas sikal perak argana.

¹⁰ Hupio ma angka saksi jana huteken ma di jolo ni halahi surat jual ni tano i, jana hubaen ma segelna jana hutimbang ma hepeng perak i dohot timbangan.

¹¹ Dung i hubuat ma suratna i na dung marsegel jana marisi angka surat dohot angka hatontuan. Hubuat muse ma salinan ni surat i na so marsegel,

¹² jana hulehen ma surat na dua i tu si Barukh anak ni si Neria pahompu ni si Mahseya. Hupasahat di jolo ni si Hanameel do i dohot angka saksi na maneken surat-surat i dohot di jolo ni angka halak na topet marjuguhan di alaman i.

¹³ Hudok ma di jolo ni halahi sude tu si Barukh,

¹⁴ “Diparentahon Tuhan Na Markuaso i, Debata ni Israel do anso buatonmu surat na dua i, bope aslina dohot salinanna i, jana pamasuhonmu tu sada hudon tano tako baen ingananna anso lolot tahan.

¹⁵ Didok Tuhan Na Markuaso i, Debata ni Israel, masa do muse di luat on na manggadis dohot manobusi bagas, tano dohot kobun anggur.”

Tangiang ni si Jeremia

¹⁶ Dung hulehen angka surat tobus i tu si Barukh, martangiang ma au,

¹⁷ “O ale Tuhan Debata, Ho do na manompa langit dohot tano marhite kuaso dohot hamaloanMu na godang i, nada adong sanga aha na maol di Ho.

¹⁸ Dipatuduhon Ho do holong ni rohaMu na manongtong tu halak na marribu-ribu, tapi diuhum Ho muse do halak hara ni dosa ni simatobangna. Debata na godang do Ho jana na gogo; Tuhan Na Markuaso i do goarMu.

¹⁹ Sumurung do angka sangkapMu jana hahomangan do angka pambaenanMu; diida Ho do sude pambaenan ni jolma, jana dibalos Ho do tu halahi hombar tu pambaenan ni halahi.

²⁰ Narobi dibaen Ho do angka tanda dohot hahomangan di Mesir, jana torus dibaen Ho songon i lopus tu sadari on di tonga-tonga ni bangso Israel dohot di tonga-tonga ni angka bangso, gabe tarbonggal goarMu di sude inganan.

²¹ Marhite kuaso dohot hagogoanMu na godang i diparuar Ho halak Israel sian Mesir. Dipatupa Ho do angka tanda dohot hahomangan maradu angka pangalaho na masa na mambaen musu tarsonggot.

²² Dilehen Ho tano na denggan jana na napu on tu halahi songon na nijanjihonMu tu ompu ni halahi.

²³ Tapi di na ro halahi tu luat on lalu mangarampassa, nada marpangoloion halahi tu angka parentaMu, jana nada mangihutkon pangajaranMu parngoluon ni halahi; sude na niparentahonMu tu halahi sada pe nada adong didalankon halahi. Hara ni i, gabe diparo Ho ma sude parmaraan on tu halahi.

²⁴ Madung dipajongjong halak Babel angka tembok humaliang ni kota on laho manghobuk dohot mangarampassa jana saonnari mangaroro ma halahi. Parporangan, tangkuraparon dohot nyae masa ma mambaen madabu kota on tu tangan ni halahi. Diida Ho do tulus sude sandok na nidokkonMu.

²⁵ Tapi haru songon i pe ale Tuhan Debata, Ho do na marsuru au manobusi tano on di jolo ni angka saksi, haru pe santongkin nari noma anso rampason ni halak Babel kota on.”

²⁶ Dung i didok Tuhan ma tu au,

²⁷ “Au do Tuhan Debata ni sude jolma. Nada adong na maol di Au.

²⁸ PadiaronKu do kota on madabu tu tangan ni si Nebukadnesar raja Babel i dohot paranganna. Taluhonon ni halahi noma kota on,

²⁹ jana surbuonna lopus abis. Mosok muse ma angka bagas na gabe boncir ni hamumurukKu, harana di ginjang ni tarupna i ma ditutungi halak dupa tu Baal dohot manduruskon anggur baen pelean tu angka debata.

³⁰ Sian mulana do dibaen halak Israel dohot Juda na so sonang rohangKu. Sai dipagilap-gilap halahi do muruk ni rohangKu marhite hajahatan ni parbuatan ni halahi.

³¹ Mamungka dipajongjong kota on, na dung sun do muruk ni rohangKu dibaen halak kota on. Na dung diputuskon humani do laho patimpaskon halahi,

³² hara ni sude hajahatan na nibaen ni halak Juda dohot halak Jerusalem rap dohot raja, pamimpin, malim dohot angka panurirang ni halahi.

³³ Madung ditadingkon halahi Au jana haru pe Huajar halahi marpupu, nada ditangihon halahi i jana nada ra mangastui.

³⁴ Mur hodar muse dope dibaen halahi bagas na dipajongjong baen inganan paribadatan tu Au, marhite na mamayakkon angka gana-ganaan na nihagigihon di inganan i.

³⁵ Dipambaeni halahi do angka langgatan tu Baal di Rura Hinom, jana dipelehon halahi angka dakdanak halaklahi dohot dadaboru ni halahi tu Debata Molok. Hape nian na so jungada do Husuru halahi patupahon na songon i, salang tubu di bagasan rohangKu pe nada jungada sisongon i paboa na giot baenon ni halahi parbuatan na songon i jorbutna dohot na mambaen halak Juda mardosa.”

Janji na mangalehen pos ni roha

³⁶ Didok Tuhan, Debata ni Israel ma tu au, “O Jeremia! Pandok ni halak Israel, na giot madabu ma kota on tu tangan ni raja ni Babel marhite parporangan, tangkuraparon dohot nyae masa. Saonnari, tangihon muse ma sanga aha na giot dokkononKu tu ho.

³⁷ PalagutonKu ma bangso on sian sude luat inganan parserahan ni halahi hara ni muruk ni rohangKu dohot rimasKu tu halahi. ObanonKu ma halahi mangulahi mulak tu inganan on jana Hubaen aman halahi maringanan di luat on.

³⁸ Gabe bangsongKu ma halahi, jana Au gabe Debata ni halahi.

³⁹ LehenonKu ma tu halahi sada sajo tujuan ni ngoluna: i ma, pasangapkon Au salolot-lolotna; na patongon na denggan do i tu halahi sandiri, dohot tu pomparan ni halahi.

⁴⁰ BaenonKu ma parjanjian na hot dohot halahi. Nada mantak Au mambaen na denggan tu halahi. BaenonKu ma halahi mabiar jana mamparsangapi Au sian sandok rohana anso ulang mandao halahi sian Au.

⁴¹ Sonang ma rohangKu mambaen na denggan tu halahi jana baenonKu halahi hot di luat on sapanjangna.

⁴² Songon dia pambaenKu parohon parmaraan tu bangso on, laing songon i muse giot lehenonKu sandok na denggan na dung Hujanjihon tu halahi.

⁴³ Manobusi kobun noma jolma di luat on, songon na nidokmunu: Inganan na gariang do tano on, jana nada diingani jolma dohot binatang; i ma na dung dilehen tu halak Kasdim.

⁴⁴ Manobusi kobun ma jolma dohot perak, tekenon do surat tobusna, marsegel, jana dipagomos angka saksi. Di tano Benyamin ma tarjadi na songon i, di angka huta na menek-menek humaliang Jerusalem di angka kota ni Juda, dohot di angka kota na di luat partoran, di luat na di rereng ni dolok, dohot di tano Negeb. PasuangonKu do pangalaho ni bangso on di luat on. Au Tuhan madung mandok songon i.”