JEREMIA 1 - BIBEL JAMITA NA DENGGAN

¹ On ma angka hata ni si Jeremia anak ni si Hilkia, sahalak sian malim di kota Anatot na di Luat Benyamin.

² Mangkuling ma Debata tu si Jeremia di taon patolu bolaskon dung mamarenta si Josia anak ni si Amon raja ni Juda.

³ Di pudi ni i manghobari dope Tuhan marpupu tusia, mamungka mangarajai si Joyakim anak ni si Josia lopus tu taon pasabolaskon mangarajai si Zedekia anak ni si Josia. Di bulan palimahon di bagasan taon i, dioban ma halak Jerusalem tu habuangan.

Pamioon tu si Jeremia

⁴ Didok Tuhan ma tu au,

⁵ “Dompak so Hujadihon ho di bortian ni inangmu, madung Hutanda ho, jana taran so sorang dope ho madung Huparbadiai ho, madung Hutodo do ho gabe panurirang tu angka bangso.”

⁶ Hualusi ma, “O Tuhan Debata, nada malo au manghobari angke maposotu dope au.”

⁷ Tapi dialusi Tuhan ma, “Ulang dokkon maposotu dope Au. Muda Husuru ho tu sada bangso, angkon kehe ho jana sandok na Husuru dokkononmu angkon palaluonmu do i tu halahi.

⁸ Ulang ho mabiar mida halahi, angke sai dongananKu do ho laho mangondihon ho. Au Tuhan, madung mandok songon i!”

⁹ Dung i disurduhon Tuhan ma tanganNia jana dijama Ia ma pamanganku lalu didok Ia, “Satutuna, madung Hubaen hatangKu tu bagasan pamanganmu.

¹⁰ Ingot ma, sadari on Hulehen di ho kuaso maradopkon angka bangso dohot angka harajaon, kuaso mangarumpakkon dohot mangaroncohon, laho manunggalingkon dohot mangabiskon, laho pajongjongkon dohot manyuan.”

Dua parnidaan

¹¹ Disapai Tuhan ma tu au, “Aha do na niidamu, ale Jeremia?” Hualusi ma, “Dangka ni hayu badam do Tuhan.”

¹² “Tutu do i,” ninna Tuhan, “angke madung marsadia Au patuluskon hatangKu.”

¹³ Dung i didok Tuhan ma paduanolihon tu au, “Aha dope na niidamu?” Alusku, “Adong huida hudon na gurgur na ro sian sabola Utara.”

¹⁴ Didok Tuhan ma, “Ro ma durus parmaraan sian Utara jana songgop ma i tu halak na di luat on sude.

¹⁵ Angke satutuna pioonKu ma sude angka bangso na di Utara anso ro halahi, ninna Tuhan, marroan ma halahi jana marsipajongjong tuku harajaanna be, di harbangan ni Jerusalem, halianganna ma tembok na i jana donok tu angka kota ni Juda.

¹⁶ UhumanKu ma bangsongKi patunda ni na mardosa halahi jana dihudukkon halahi Au. Dihaulkon halahi do antong haul tu angka debata na asing, jana dipambaeni halahi patung lalu disomba halahi.

¹⁷ On pe markobas ma ho, Jeremia! Kehe ma ho jana paboa ma tu halahi sandok na Huparentahon tu ho. Ulang ho mabiar mida halahi, anso ulang Hubaen ho mur mabiar muda maradopan dohot halahi.

¹⁸ Angke anggo Au, satutuna sadari on baenonKu ma ho gabe kota na marbenteng, gabe tiang bosi dohot gabe tembok tumbaga, mangalo sude raja-raja ni Juda dohot angka pegawaina, mangalo angka malim dohot rayat ni negara on.

¹⁹ Porangon ni halahi ma ho, tapi nada tartaluhonsa, angke dongananKu do ho laho mangondihon ho, songon i ma hata ni Tuhan.”