JEHESKIEL 10 - BIBEL JAMITA NA DENGGAN

Ditadingkon Hamuliaon ni Tuhan Bagas Na Badia

¹ Dung i manatap ma au tu na songon langit na di ginjang ni ulu ni angka kerub i, jana huida sada tudos songon habangsa na sian batu intan nilam.

² Dung i didok Debata ma tu halak na marpakean linen i, “Masuk ma ho tu antara ni angka roda na adong di toru ni kerub i, jana buat ma sanjomput banggar ni api. Dung i sarsarkon ma banggar i tu ginjang ni kota i.” Dung i huida ma ia masuk.

³ Di na masuk i ia, hatiha jongjong do angka kerub i sabola Selatan ni Bagas Na Badia. Adong ma santurpuk ombun manggohi alaman parbagasan i.

⁴ Dung i manaek ma hamuliaon ni Tuhan sian gincat ni kerub i jana kehe tu gincat ni pintu Bagas Na Badia, gabe gok ombun ma Bagas Na Badia i, jana alamanna pe sun disondangi hamuliaon ni Tuhan.

⁵ Tarbege ma pamakpak ni habong ni angka kerub i lopus tu alaman parduru i songon sora ni Debata Na Markuaso i.

⁶ Dung disuru Tuhan halak na marpakean linen i mambuat banggar ni api sian antara ni roda-roda na di toru ni angka kerub i, masuk ma ia jana jongjong di lambung ni sada sian roda i.

⁷ Jadi adong ma sada sian kerub i pamasukkon tanganna tu bagasan api na di tonga-tonga ni halahi i, dijomput ia ma sanga na piga banggar i, jana dilehen ma i tu halak na marpakean linen i. Dung dijagit ia, kehe ma ia.

⁸ Anggo huida adong do di toru ni habong ni ganop be sian kerub i sada tarsongon rumang ni tangan ni jolma.

^9-10 Huida muse adong do sada roda di lambung ni angka kerub i. Sarupa do roda na opat i, jana marlinang-linang do idaon songon batu intan na jeges. Adong muse ma sada be rodana na olat di tonga-tonga.

¹¹ Jadi songon i ma dalanna tarbaen angka kerub i kehe tu opat jurusan. Tarbaen halahi do kehe sanga na tu dia giot ni halahi nada pola marputar pamatang ni halahi.

¹² Sude pamatang ni halahi, tanggurungna, tanganna, habongna dohot angka roda-rodana i sap do dohot mata.

¹³ Hubege bahaso roda-roda i didokkon halingsungsung.

¹⁴ Adong do opat be bohi ni kerub i, na paasing-asing tompana. Bohi na parjolo, i ma tompa ni kerub, na paduahon tompa ni jolma, na patoluhon tompa ni singa, jana na paopatkon tompa ni rajawali.

¹⁵ Manaek ma angka kerub i tu gincat. I ma angka makhluk na huida na jolo di topi ni Batang aek Kebar.

¹⁶ Jana muda mardalan angka kerub i, rap mardalan ma dohot roda na di lambungna i, jana muda dipahembang angka kerub i habongna anso habang sian tano i, jana roda-roda i pe nada morot sian lambungna.

¹⁷ Muda so angka kerub i, roda-roda i pe gabe so, muda manaek kerub i tu gincat, roda i pe rap manaek dohot halahi; angke di roda i do tondi ni angka makhluk i.

¹⁸ Dung i kehe ma hamuliaon ni Tuhan sian ginjang ni pintu ni Bagas Na Badia i jana songgop di ginjang ni kerub i.

¹⁹ Huida dipaherbang angka kerub i ma habongna jana habang manadingkon tano, roda-rodana i pe laing dohot do. Dung i maradian ma halahi di lambung ni pintu horbangan ni Bagas Ni Tuhan sabola Habincaran, tapi anggo hamuliaon ni Debata ni Israel laing di ginjang ni halahi do.

²⁰ Taringot ma tu rohangku, i do kerub na huida na jolo na di toru ni Debata ni Israel, di topi ni Batang aek Kebar.

²¹ Opat be bohi ni kerub i, dua pasang habongna jana adong dope sada na tarsongon tangan ni jolma di toru ni angka habongna i.

²² Tompa ni halahi pe sarupa muse do dohot tompa ni kerub na huida di topi ni Batang aek Kebar. Tigor do halahi mardalan tu jolo.