JEHESKIEL 1 - BIBEL JAMITA NA DENGGAN

PARNIDAAN NA PARJOLO DIIDA SI JEHESKIEL TARINGOT TU Tuhan 1:1–7:27 Habangsa ni

¹ Di tanggal lima, bulan paopathon, taon patolupuluhon, hatiha rap au dohot angka halak buangan di topi ni Batang aek Kebar, mungkap ma langit jana maruli parnidaan ma au taringot tu Debata.

² Di tanggal lima bulan i, i ma taon palimahon dung dioban si Joyakin tu habuangan,

³ ro ma Tuhan mandok tu Malim Jeheskiel, anak ni si Busi di tano ni halak Kasdim di topi ni Batang aek Kebar, jana digohi kuaso ni Tuhan ma ia.

⁴ Hupadorgak ma jana huida halingsungsung na mangombus sian Utara. Ruar ma hilap na sumiksak sian sangkimpal ombun nalobi godang, jana gabe torang sajo ma langit na humaliang i dibaensa. Di bagasan hilap na mamincar-mincar i tarida ma na marsinondang songon tumbaga.

⁵ Laing ditonga-tonga ni halingsungsung i muse, huida ma na mangolu tarsongon jolma idaon,

⁶ tapi adong do opat be bohina jana dua pasang habongna.

⁷ Patna i tigor jana marlinang ma i songon sisilon ni lombu. Marlinang do pat ni halahi songon tumbaga na baru digosok.

⁸ Tamba ni bohina na opat i dohot habongna na dua pasang i, adong muse do songon tangan ni jolma di toru ni sude habongna i.

⁹ Mangerbang ma sapasang habongna i jana padais ma ujung ni habongna tu ujung ni habong ni donganna i, jadi gabe marsogi opat ma na marhabong na opat i. Muda manggulot, rap manggulot do halahi nada pola marbalik pamatangna.

¹⁰ Ganop mahluk na songon jolma i adong be opat bohina na paasing-asing: Tompa ni jolma di jolo, tompa ni singa sabola siamun, tompa ni lombu sabola siambirang jana tompa ni rajawali sian pudi.

¹¹ Mangerbang sapasang be habongna i adop ginjang gabe padais ma ujungna i tu ujung ni habong ni donganna na di lambungna i, jana habongna na sapasang nari i, martutup do di pamatangna i.

¹² Jadi tu opat jurusan ma saonnari mangadop mahluk i, jadi gabe tarbaen halahi do kehe sanga na tu dia giot ni halahi so pola mamutar pamatangna.

¹³ Di tonga-tonga ni mahluk i adong do sada idaon tarsongon sulu na gara manggulot-gulot nada mantak. Manggurasa-gurasa ma api i jana marpistihan ma hilap ni ronggur sian i.

¹⁴ Angka mahluk i sandiri pe mangguloti do pahae-pahulu songon hipas ni hilap.

¹⁵ Dompak na mamparrohahon i dope au, huida ma opat roda di tano, sada roda di lambung ni ganop mahluk i.

¹⁶ Sarupa do roda i jana marlinu do i songon batu intan jana adong be do sada rodana na asing di tonga-tongana i.

¹⁷ Jadi gabe tarbaen do roda i mardalan tu opat jurusan.

¹⁸ Sap do mata ni angka lingkaran ni roda i.

¹⁹ Muda mardalan angka mahluk i, roda i pe mardalan do di samping ni halahi; jana muda manaek angka mahluk i sian ginjang ni tano, roda-roda i pe dohot do manaek.

²⁰ Sanga na tu dia tondi i giot kehe, tusi ma halahi kehe, jana roda-roda i pe rap manaek dohot halahi; angke di bagasan roda-roda i do tondi ni mahluk i.

²¹ Muda mardalan angka mahluk i, mardalan ma roda i; muda so halahi, roda-roda i pe gabe so; angke di bagasan roda-roda i do tondi ni mahluk i.

²² Di ginjang ni angka ulu ni halahi adong tarsongon langit na marsinondang, marlinang songon na marbarutu.

²³ Di toru ni na songon langit i marsipahirbang habongna ma mahluk i adop donganna na di lambungna be tapi anggo habongna na sapasang nari i manutupi pamatangna.

²⁴ Muda habang halahi, hubege do pamakpak ni habongna i; songon sora ni laut do begeon, songon pardalan ni parangan na bahat situtu, songon sora ni Na Markuaso i. Muda maradian halahi habang, dilompit halahi ma habongna i,

²⁵ tapi laing tarbege do sora anggo sian ginjang ni na songon langit na di ginjang ni ulu ni halahi i.

²⁶ Di ginjang ni na songon langit i adong muse do sada tarsongon habangsa sian batu intan nilam, jana di ginjangna i juguk ma na songon jolma idaon.

²⁷ Marsinondang do idaon songon tumbaga na di bagasan api na gara-gara. Marnyanga-nyanga sinondangna i,

²⁸ jana marrupa-rupa songon halibutongan. I ma da hatiuran na marhillong na patuduhon haroro ni Tuhan.