HARURUAR 37 - BIBEL JAMITA NA DENGGAN

Paulihon Poti Parjanjian

¹ Dipauli si Besaleel ma Poti Parjanjian sian hayu akasia, 110 sentimeter ginjangna, tohangna dohot gincatna 66 sentimeter.

² Di bagasan dohot sian ruar dilampis ia do dohot sere na polin jana marbingke sere dibaen ia.

³ Dibaen ia muse do opat golang-golangna sian sere inganan ni porsan-porsanna jana dibaen ia ma i di patna na opat i, dua golang sabariba.

⁴ Dibaen ia muse ma porsan-porsanna sian hayu akasia na nilampis dohot sere,

⁵ jana disurukkon ia ma i tu golang-golangna i angkup bariba.

⁶ Dung i dibaen ia ma langkopna sian sere na polin, 110 sentimeter ginjangna jana bidangna 66 sentimeter.

⁷ Dibaen ia muse ma dua kerub sian sere tuangan,

⁸ sada be ganop ujung ni tutup ni poti i. Songon i ma pambaennia di patung na dua i gabe sada dohot langkopna i.

⁹ Paadop-adop ma kerub na dua i, jana mangerbang ma habongna i manutupi langkop ni poti i.

Pauli meja inganan ni roti sihaulkonon tu Debata

¹⁰ Dipauli si Besaleel ma meja sian hayu akasia 88 sentimeter ginjangna, bidangna 44 sentimeter jana gincatna 66 sentimeter.

¹¹ Dilampis dohot sere na polin do meja i jana marbingke sere do dibaen ia humaliang.

¹² Dibaen ia muse ma pambibirina 7,5 sentimeter humaliang meja i. Dibaen do bingke ni pambibiranna i humaliang sian sere.

¹³ Dibaen ia ma opat golang-golang pamorsananna di suhi-suhina na opat i, di ginjang ni patna i.

¹⁴ Golang-golang panahan ni porsan-porsanna i di lambung ni pambibiranna i ma dibaen.

¹⁵ Hayu porsan-porsanna i sian hayu akasia do dibaen jana dilampis dohot sere.

¹⁶ Panjamaan ni meja i sian sere na polin do dibaen ia; angka pinggan, mangkuk, angka botol-botol dohot kendina sipakeon manghaulkon aek ni anggur.

Pauli parlampuan

¹⁷ Dibaen si Besaleel ma parlampuan sian sere na polin. Jongjonganna dohot sitiopanna sian sere tompoan dibaen ia. Angka bunga-bungana, lampusungna dohot lampakna songon na sada do i tu sitiopanna i.

¹⁸ Adong ma onom dangkana sian lambung, tolu be angkup bariba.

¹⁹ Ganop dangkana i adong ma dibaen tolu bunga songon hiasanna tar songon bunga ni bua pala marlampusung dohot marlampak.

²⁰ Di sitiopanna i adong ma opat hiasanna tar songon bunga ni bua pala na marlampusung dohot marlampak.

²¹ Di pangkal ni sude dangkana i, dibaen ma songon bunga na marlampusung.

²² Sude parlampuan i dohot angka lampusung maradu angka dangka-dangkana i sian sangkimpal sere tompoan do i dibaen.

²³ Dibaen ia ma di parlampuan i pitu lampu dohot gampit-gampit dohot talam, sian sere na polin do i sudena.

²⁴ Adong ma 35 kilo bahat ni sere na polin laho mambaen parlampuan i dohot angka panjamaanna i.

Pauli langgatan panutungan ni hamonyan

²⁵ Dibaen si Besaleel ma sada langgatan sian hayu akasia baen inganan panutungan ni hamonyan. Sogi opat do dibaen langgatan i, 45 sentimeter ginjangna dohot bidangna. Gincatna 90 sentimeter. Tanduk na opat na di suhi-suhina na opat i sada do i dohot langgatan i.

²⁶ Sabola sian ginjang, suhi-suhina na opat i dohot tandukna i dilampis do i dohot sere na polin jana dibaen ma bingkena humaliang laing sian sere,

²⁷ lalu dibaen ia ma dua golang-golang pamorsanna di toru ni bingkena i angkup bariba laho manahan porsan-porsanna i muda hatiha marobansa.

²⁸ Sian hayu akasia do dibaen ia porsan-porsanna i jana dilampis ia do i dohot sere.

Martanak miak upacara dohot hamonyan

²⁹ Ditanak si Besaleel muse ma miak upacara dohot pultak ni hamonyan na huskus, dicampur songon miak na huskus.