HARURUAR 27 - BIBEL JAMITA NA DENGGAN

Langgatan

¹ “Baen ma sada langgatan sian hayu akasia. Angkon marsogi opat do i baenonmu tohangna 2,2 meter jana unjurna 2,2 meter. Gincatna 1,3 meter.

² Baen ma martanduk di ganop suhi-suhina i. Angkon domu do gabe sada tanduk i dohot langgatan i jana nilampis dohot tumbaga do sudena i.

³ Baen ma huali inganan ni abuan, sonduk, talam, garpu dohot inganan ni api. Angkon sian tumbaga do baenon sude panjamaan on.

⁴ Baen ma sada karanjang sian tumbaga na nibayu jana baen muse ma sitiopan parobanan di suhi-suhi na opat i.

⁵ Baen ma karanjang i tu toru di topi ni langgatan i satonga ni gincat ni langgatan i.

⁶ Baen ma hayu porsan-porsan sian hayu akasia na nilampis dohot tumbaga,

⁷ jana surukkon ma tu golang-golang pamorsanan na di topi ni langgatan i ganop mamorsan langgatan i.

⁸ Sian papan do baenonmunu di bagasan marguru tu rancangan na Hupatuduhon tu ho di ginjang ni dolok i.”

Alaman ni Bandar Parmianan Ni Tuhan

⁹ “Maralaman do baenonmu humaliang Bandar ParmiananKi, na nihandang dohot tire sian abit linen na halus. Bagian na sabola Selatan i, 44 meter ginjangna,

¹⁰ na nipajongjong dohot dua pulu tiang tumbaga di ginjang ni dua pulu ojahan laing sian tumbaga rap dohot sangkotan dohot panguduti na sian perak.

¹¹ Laing songon i ma nibaen sian Utara.

¹² Anggo sabola Hasundutan, 22 meter ma ginjang ni tirena i rap dohot dua pulu tiang di ginjang ni dua pulu ojahanna.

¹³ Sabola Habincaran disi ma parpintuanna, 22 meter muse ma ginjang ni alamanna i.

^14-15 Di siamun dohot siambirang ni pintu i angkon adong do tirena 6,6 meter martolu tiang di ginjang ni tolu ojahan.

¹⁶ Tu pintuna i angkon adong do tire sambilan meter ginjangna sian abit linen na halus na nitonun dohot wol na rata langit, na bunga torung dohot na rara, jana na nisulaman. Na nipajongjong do tire i dohot opat tiang di ginjang ni opat ojahan.

¹⁷ Sude tiang na humaliang pintuna i na marsitiopan do i na sada tu na asing dibaen hait-kaitna sian perak i; angkon sian perak do baenon hait-kaitna i jana ojahanna sian tumbaga.

¹⁸ Handang ni alaman i humaliang, ginjangna 44 meter, tohangna 22 meter jana gincatna 2,2 meter. Sian abit linen na halus ma nibaen tirena i jana ojahanna sian tumbaga.

¹⁹ Sude panjamaan sipakeon di bagasan Bandar Parmianan, sude rancang ni Bandar Parmianan dohot handangna humaliang, sian tumbaga do baenon.”

Pangurus ni lampu

²⁰ “Suru ma halak Israel maroban miak zetun na dumenggan laho mangisi lampu na di bagasan Bandar ParmiananKi anso tarpagara ganop borngin.

²¹ Angkon pagaraon ni si Harun dohot dakdanaknia do lampu i. Di ruar ni tire panutup ni Poti Parjanjian i ma inganan ni lampu i. Di Bandar ParmiananKi, angkon torus do gara lampu sian potang ari lalu tu torang ari. Angkon dalankonon ni halak Israel dohot pomparanna do parenta on sapanjangna.”