HAMALIMON 21 - BIBEL JAMITA NA DENGGAN

Habadiaan ni angka malim

¹ Disuru Tuhan ma si Musa pabolkaskon parenta on tu angka malim sian pomparan ni si Harun, “Sada halak malim, nada tola paramunkon dirina hara ni na mandohoti adat mananom sisolkotnia,

² asing ma muda inangnia na mate i, sanga amangnia, sanga anaknia halaklahi,

³ sanga dadaboru, kahanggi halaklahi, sanga ibotonia na so marbagas dope na rap sabagas dohot ia.

⁴ Nada tola padiaronnia dirina sandiri gabe ramun hara ni parmate ni sisolkotnia sian tutur parbagason.

⁵ Sada halak malim nada tola cukuronnia sanga di dia pe di ulunia, nada tola pangkasonnia janggutnia sanga manggurati pamatangnia dohot barang na tajom laho paboahon na marsak ia.

⁶ Au do nampuna jana mamili ia, hara ni i nada tola palayasonnia goarKu. Ia do na pasahatkon sipanganon di Au, hara ni i angkon badia do ia.

⁷ Sada malim nada tola marbagas dohot dadaboru siboru jalang sanga mambuat dadaboru na so bujing-bujing be sanga na sirang, angke hapunjunganKu do nampuna malim.

⁸ Angkon okuon ni halak na bahat do bahaso hapunjunganKu do malim, angke ia do na pasahatkon haul sipanganon di Au. Au do Tuhan na badia, jana Au do pabadiahon bangsongKu.

⁹ Muda gabe siboru jalang do dadaboru ni sada malim, na palayas amangna do i, angkon mate tutungon do halakna i.

¹⁰ Malim Godang na dung tarpili do i di Debata mangkarejohon hamalimon. Di na mangangkat i dirasmihon do i marhite na mangusehon miak na badia tu ginjang uluna jana pamasuk pakean ni malim disia. Hara ni i nada tola padiaronnia obuknia nada nisuri sanga manyuakkon pakeannia laho paboahon marsaknia.

^11-12 Madung dipasahat ia tu Au, anso gabe Au nampuna ia, hara ni i nada tola ramun dirinia. Nada tola muse pahodaronnia Inganan Na Badia marhite na maninggalkon jana masuk ia tu bagas na adong disi bangke, haru pe bangke ni amangna sanga inangnia sandiri.

^13-14 Hum sada bujing-bujing sian margania sandiri do tola buatonnia jana nada tola buatonnia na marando sanga na dung disirangkon halak, sanga sada dadaboru siboru jalang hian.

¹⁵ Muda dibaen ia songon i, sude anaknia na badia hian, gabe ramun noma. Au do Tuhan jana na dung Hutodo do ia gabe Malim Godang.”

¹⁶ Diparentahon Tuhan i ma tu si Musa

¹⁷ mandok hata on tu si Harun, “Sian pomparanmu, muda adong na martihas pamatangna, nada tola pasahatkon haul sipanganon tu Au. Angkon songon i do tongtong lopus tu pudian ni ari.

¹⁸ Halak na pasahatkon haul, nada tola halak na martihas pamatangna, nada tola halak na mapitung, na pangpang, tihas di bohina sanga di pamatangna,

¹⁹ nada tola halak na lumpu tanganna, sanga na tengka patna.

²⁰ Nada tola halak na bungkuk sanga na pengpeng, nada tola halak na mahancit mata sanga mahancit kulitna, sanga nada tola halak na dung dipaias.

²¹ Sian angka pomparan ni si Harun angka halak na martihas pamatangna nada tola pasahatkon haul sipanganon di Au.

²² Tapi tola do panganonnia sian sipanganon na dung dipasahat, i sanga sian haul sipanganon na badia pe i sanga pe sian haul sipanganon na sun badia.

²³ Hara ni na adong tihas ni pamatangna gabe nada tola donok ia tu tire na badia, sanga mandonohi langgatan i. Nada tola ramun baenonna angka barang na dung gabe hapunjunganKi, angke Au do Tuhan jana Au do paasingkon barang-barang i.”

²⁴ Jadi i ma na nipabolkas ni si Musa tu si Harun, tu angka anak ni si Harun, dohot tu sude bangso Israel.