HAMALIMON 1 - BIBEL JAMITA NA DENGGAN

Haul situtungon

¹ Dipio Tuhan ma si Musa masuk tu Bandar Parmianan Ni Tuhan jana dilehen ma angka aturan tusia,

² sipatuluson ni halak Israel muda marhaul halahi. Muda dipasahat sada halak pahan-pahanan gabe haul situtungon, tola do sombahononna lombu, biri-biri sanga hambengnia.

³ Muda giot sombahononnia sada lombu, angkon lombu jantan na so martihas. Dipasahat ma lombu i di pintu Bandar Parmianan Ni Tuhan, anso tumbuk roha ni Tuhan i tu halakna i.

⁴ Dung i payakkonon ni halahi ma tanganna tu ginjang ni ulu ni pahan-pahanan i, gabe jagiton ni Tuhan i ma silehen-lehenna i gabe haul hasesaan ni dosa ni halahi.

⁵ Dung i angkon di pintu ni Bandar Parmianan i do disambol lombu i. Mudar ni lombu i, pasahaton ni angka malim sian pomparan ni si Harun ma i tu Tuhan, lalu dipispiskon tu opat-opat topi ni langgatan na donok tu pintu ni Bandar Parmianan i.

⁶ Dung i bobahan ni halahi ma pahan-pahanan i lalu dilapa.

⁷ Susunon ni angka malim i ma soban tu ginjang ni langgatan i, lalu ditutung.

⁸ Di ginjang ni api i ma payakkonon ni halahi juhut na dung nilapa i, bope uluna dohot tabo-tabona.

⁹ Angkon basuon ni halahi do butuha dohot pat pudi ni pahan-pahanan i, dung i markarejo ma malim manutung sude haul sipanganon i pajop roha ni Tuhan.

¹⁰ Muda biri-biri sanga hambeng do na giot sombahonon i angkon jantan na so martihas.

¹¹ Sambolon ni halahi ma pahan-pahanan i di topi ni langgatan sabola sian Utara, dung i pispiskonon ni malim ma mudar ni pahan-pahanan i tu na opat topi ni langgatan i.

¹² Dung dilapa halahi pahan-pahanan i, malim na markarejo i ma pamasuk sude na nilapa i, dohot do uluna dohot tabo-tabona tu api.

¹³ Dung i basuon ni halahi ma butuha dohot pat pudi ni pahan-pahanan i, jadi sombahonon ni malim i ma haul i tu Tuhan, lalu ditutung sude di ginjang ni langgatan. Uap ni haul sipanganon i ma pajop roha ni Tuhan.

¹⁴ Muda unggas do na nisombahon i gabe haul situtungon, angkon unggas hatutu do sanga darapati.

¹⁵ Obanon ni malim i ma unggas i tu langgatan i, lalu dipulos rungkungna, uluna i ditutung di ginjang langgatan i. Mudarna angkon dipispiskon tu topi ni langgatan i.

¹⁶ Bururan dohot isina angkon diharuarkon lalu diambungkon tu topi sabola sian Habincaran inganan payahan ni abuan.

¹⁷ Dung i ditiop ma unggas i di pangkal ni habongna i laho manyuakkon andorana, tapi nada tola torus taldus habongna i. Dung i ditutung ma unggas i dipayakkon tu hayu na gara di ginjang ni langgatan i. Uap ni haul sipanganon i ma pajop roha ni Tuhan.