ESTER 4 - BIBEL JAMITA NA DENGGAN

Mangido bantuan si Mordehai tu si Ester

¹ Dung tarbege tu si Mordehai salaho tu na masa i, disibakkon ia ma pakeannia jana dipake ia ma abit goni tanda ni arsak ni roha. Disaburkon ia ma abuan tu ulunia, lalu mardalani ma ia di kota i tangis gogo jana dangol.

² Maradian ma ia di jolo ni pintu horbangan ni bagas godang, harana diantahi do masuk halak na marpakean goni tusi.

³ Songon i muse di sandok propinsi, mangandungi ma angka halak Jahudi dung dipabotohon parenta ni raja i. Puaso ma halahi, tangis dohot mangangguk, jana bahat do sian halahi na mamake abit goni jana modom di ginjang ni abuan.

⁴ Di na ro angka bujing-bujing dohot angka pangoloi ni si Ester paboahon tusia na nibaen ni si Mordehai i, marsak sajo ma si Ester. Ditongos ia ma pakean di si Mordehai baen gonti ni abit goninia i nian, hape nada giot si Mordehai manjagitsa.

⁵ Dung i dipio si Ester ma si Hatah sada sian pangoloi na ditugaskon ni raja i laho mangoloi si Ester. Disuru ia ma si Hatah manyapai si Mordehai sanga aha do na masa jana hara ni aha umbaen na songon i tindakannia.

⁶ Jadi kehe ma si Hatah mandapotkon si Mordehai di tano lapang ni kota i di jolo ni pintu horbangan ni bagas godang.

⁷ Dicaritohon si Mordehai ma tusia sanga aha na nialamannia dohot sanga na sadia hepeng perak na nijanjihon ni si Haman sipamasuhon tu bagasan kas ni raja i, dung sude halak Jahudi hona pusa.

⁸ Laing dilehen si Mordehai ma tu si Hatah salinan ni surat ni raja i na dung diparuar di Susan jana na marisi parenta laho mamusa halak Jahudi. Disuru ia ma si Hatah laho mangalehen surat i tu si Ester dohot patorangkon pangalaho i tusia songon i muse anso kehe si Ester mangadop tu raja laho mangidohon ibo ni roha di bangsonia.

⁹ Jadi kehe ma si Hatah mandapotkon si Ester jana dipalalu ia ma tona ni si Mordehai i tusia.

¹⁰ Tapi disuru si Ester ma ia mangulahi mandapotkon si Mordehai maroban tona songon on,

¹¹ “Ganop halak na ro mangadop tu raja di alaman na di bagasan bagas godang i, halaklahi sanga dadaboru na so dipiohon, angkon mate hona uhum. Undang-undang do i jana sude halak mamungka sian panuturi ni raja lopus tu rayat na di angka propinsi, sude do umboto i. Hum sada sajo ma dalan anso malua sian undang-undang i, i ma muda disurduhon raja i tungkot serenia tu halakna i. Muda tarjadi songon i, malua ma iba. Tapi madung adong sabulan on na so dipiohon raja i au.”

¹² Jadi dipalalu si Hatah ma tona ni si Ester i tu si Mordehai.

¹³ Gabe ditongos si Mordehai ma sipaingot on tu si Ester, “Ulang diambang ho, na asing ho sian halak Jahudi na asing i, hum hara ni na tinggal ho di bagas godang!

¹⁴ Sanga na bia pe dalanna pasti maruli partolongan do halak Jahudi, anso malua halahi. Tapi anggo laing hohom do ho di bagasan pangalaho na songon on, ho sandiri pe mate do jana abis ma barita ni keluarga ni amangmu. Ise he umboto i, betak hara ni haporluan di angka hatiha na songon on do antong umbaen na hona pili ho gabe ratu!”

¹⁵ Jadi ditongos si Ester ma barita songon on tu si Mordehai,

¹⁶ “Palagut ma sude halak Jahudi na di Susan anso martangiang salaho tu au. Ulang ma hamu mangan tolu ari tolu borngin lolotna. Au sandiri pe dohot angka bujing-bujing na mangoloi au laing puaso do. Dung sidung i, mangadop ma au tu raja i, haru pe mangalanggar undang-undang do i. Muda angkon mate ma au hara ni i, padiar ma mate au tusi!”

¹⁷ Jadi kehe ma si Mordehai jana dipatulus ia ma sude na nitonahon ni si Ester i.