ESTER 1 - BIBEL JAMITA NA DENGGAN

Ratu Wasti mangalo tu parenta ni Raja Ahasweros

¹ Songon on ma na tarjadi di hatiha ni si Ahasweros, i ma si Ahasweros na mangarajai saratus dua pulu pitu luat, mamungka sian India lopus tu Etiopia.

² Di hatiha i, i ma hatiha mamarenta Raja Ahasweros di habangsa harajaonnia di kota Susan.

³ Di taon patoluhon mamarenta Raja Ahasweros, dibaen ma horja godang di sude na marpangkat dohot pagawenia. Ro do tu horja i tentara ni Persia dohot tentara ni Media, songon i muse angka gubernur maradu na mora-mora na sian propinsi.

⁴ Onom bulan honokna raja i patidahon sinadongan ni bagas godangnia i dohot hajagaron maradu hagodangan ni harajaannia i.

⁵ Dung salpu i dibaen ia muse ma pesta mangulahi di sude rayat na di Susan, di na kayo bope na pogos. Saminggu lolotna mardalan horja i jana di alaman ni bagas godang ni raja ma ingananna.

⁶ Dihias ma alaman ni bagas godang i dohot tire na sian abit linen na rata langit dohot na bontar na nitambat dohot tali linen na halus jana disangkotkon di golang-golang perak na dibaen di angka tiang marmar. Di toruna i dibaen ma angka podom-podoman sian sere dohot perak di ginjang ni lante na dipajeges dohot marmar na bontar, hablur na rara, lampak ni mutiara na manyirlak dohot batu pirus na balau.

⁷ Diparade raja i do anggur marlobi-lobi na niparade di angka piala sere na marragam rupa.

⁸ Nada dibatasi anggur di angka tamu i jana nada adong na dipaksa minum. Na dung dilehen raja i do parenta tu angka pangoloi di bagas godang i, anso dioloi halahi ganop tamu i marguru tu hagiotna be.

⁹ Laing dibaen Ratu Wasti muse ma pesta di bagian dadaboru di bagasan bagas godang i.

¹⁰ Di ari papituhon minum-minum ma raja i marjop ni roha. Jadi gabe dipio ia ma si Mehuman, si Bista, si Harbona, si Bigta, si Abagta, si Zetar dohot si Karkas, i ma angka pangoloi na sai di adopan ni raja i.

¹¹ Disuru ia ma halahi maroban tu jolonia Ratu Wasti mamake jarunjung harajaon di ginjang ni uluna. Na jogi situtu antong ratu i, jana na giot patida-tidahon hajogionna i ma raja i tu angka na sangap-sangap dohot tu sude tamunia i.

¹² Tapi di na nipalalu ni angka pangoloi i parenta ni raja i tu Ratu Wasti, nada ra Ratu i ro. Jadi gabe sun ma muruk ni raja i.

¹³ Dihasomalkon raja i do laho mangido pandapot ni angka na malo taringot tu parsoalan uhum dohot aturan ni pangalaho. Jadi gabe dipiohon ia ma angka panuturina na umboto sanga aha sibaenon di pangalaho na songon i.

¹⁴ Anggo angka panuturi na jumotjot dipio raja i, i ma: Si Karsena, si Setar, si Admata, si Tarsis, si Meres, si Marsena dohot si Memukan. Halahi ma angka na sumurung sian Persia dohot Media na manjagit pangkat na gincat di harajaan i.

¹⁵ Didok raja i ma: “Aha ma sibaenon tu Ratu Wasti mangihutkon uhum, harana inda dioloi ia parenta ni Raja Ahasweros, na nipalalu ni angka pangoloi?”

¹⁶ Jadi didok si Memukan ma tu raja i dohot tu angka na sangap i, “Marhite pangalaho i, nada hum raja i be na dipalayas ni Ratu Wasti, tapi dohot do sude pagawe ni raja i, dohot sude bangso na adong di sude luat na nirajaan ni Raja Ahasweros.

¹⁷ Angke habotoan ma pangalaho ni Ratu i tu sude dadaboru jana toruk noma idaon ni halahi halaklahina be. Muda dicaritahon halak: Diparentahon Raja Ahasweros do anso ro Ratu Wasti mangadop tusia, tapi inda ra ia ro.

¹⁸ Jadi muda habegean tu angka dadaboru ni angka parpangkat na di Persia dohot Media pangalaho i, pasti paboa-boaon ni halahi ma tu halaklahina be. Patunda ni i, aloon ni dadaboru ma parenta ni halaklahina jana murlayas ma angka halaklahi.

¹⁹ Antong hara ni i, pangidoannami, anso dibaen raja i nian haputusan bahaso na so tola be Ratu Wasti ro mangadop tu raja i. Angkon dibaen ma haputusan i gabe undang-undang di Persia dohot Media, anso ulang tarumpat-umpat be mangulahi. Dung i, nilehen ma jabatan ni Ratu Wasti i tu dadaboru na asing na umburju sian i.

²⁰ Muda dung marserak haputusan ni raja i tu sandok harajaan na bolak i, pasangapon ni ganop dadaboru ma halaklahina, na kayo bope na miskin.”

²¹ Dijagit raja i do dohot angka na sangap-sangap i usul ni si Memukan i jadi manigor ma didalankon raja i.

²² Ditongoskon ia ma parenta tu sude luat ni harajaan i di hata dohot surat ni ganop luat i. Hata ni parenta i mandok angkon halaklahi do na pamimpin di bagasannia, jana mangkuling mangihutkon hata ni bangsona.