ESRA 1 - BIBEL JAMITA NA DENGGAN

Disuru si Kores halak Jahudi mulak tu tanona

¹ Di taon parjolo mamarenta si Kores, raja ni Persia, dipatulus Tuhan ma sanga aha na nijanjihonNia marhite Panurirang Jeremia. Disosoi Tuhan ma roha ni si Kores anso diharuarkon ia sada parenta sisisehononkon di sude harajaannia. Songon on ma hatana:

² “On ma parenta ni si Kores, raja ni Persia. Madung dibaen Tuhan, Debata Na Markuaso di banua ginjang au gabe raja di sandok portibi on, jana ditugaskon do au laho mambangun sada bagas diSia di Jerusalem na di tano Juda.

³ Sai dijagohon Debata ma hamu sude na gabe bangsoNia. Angkon mulak noma hamu tu Jerusalem jana bangunonmunu mangulahi Bagas Ni Tuhan, Debata ni Israel, Debata na disomba di Jerusalem.

⁴ Ampot adong sian bangsoNia di inganan habuangan on na mamorluhon bantuan anso tarbaensa mulak, angkon lehenon ni angka hombar bagasna do bantuan i. Angkon lehenon ni halahi do tusia perak dohot sere, balanjo di dalan maradu pahan-pahanan sibobanan songon i muse angka sihaulkonon baen tu Bagas Ni Tuhan di Jerusalem.”

⁵ Dung i markobas mulak ma angka kapala ripe na sian Marga Juda dohot Benyamin, angka malim dohot angka halak Levi maradu sude halak na nigorakkon ni Debata rohana dohot laho mambangun Bagas Ni Tuhan mangulahi.

⁶ Dohot do sude hombar bagas ni halahi mambantu marhite na mangalehen barang-barang, angka parkokas perak rupani, sere, balanjo di dalan, binatang boban, angka harto na asing dohot angka sihaulkonon di Bagas Ni Tuhan.

⁷ Diparuar si Kores ma angka mangkuk dohot sambong-sambong na nipake najolo di bagasan Bagas Ni Tuhan na di Jerusalem. Na dihaldung ni Raja Nebukadnesar do angka barang-barang i jana dibaen di bagasan kuil ni angka debatania sandiri.

⁸ Dipasahat si Kores ma angka barang-barang i tu si Mitredat, kapala bendahara ni harajaan i. Dung i dibaen si Mitredat ma daftar ni angka barang-barang i anso adong di si Sesbasar, gubernur ni Juda.

^9-10 Songon on ma daftarna i: Angka mangkuk sere sipakeon di upacara marhaul 30 Angka mangkuk perak sipakeon di upacara marhaul 1.000 Angka mangkuk na asing 29 Angka mangkuk sere na menek-menek 30 Angka mangkuk perak na menek-menek 410 Angka parkokas na asing 1.000

¹¹ Pungu ma sudena 5.400 mangkuk sere dohot perak dohot angka barang na asing. Dioban si Sesbasar ma i sudena di na marangkat ia dohot angka halak buangan na deba nari sian Babel tu Jerusalem.