DANIEL 8 - BIBEL JAMITA NA DENGGAN

Parnidaan ni si Daniel taringot tu biri-biri jantan dohot hambeng jantan

¹ Di taon patoluhon mamarenta Raja Belsasar, tarida ma tu au, si Daniel, sada parnidaan na asing sian parnidaan na parjolo.

² Di bagasan parnidaan i di propinsi Elam do au, di Susan, kota sabungan ni Persia. Jongjong au di lambung ni Batang aek Ulai,

³ jana tarida ma di topi ni batang aek i sada biri-biri jantan na martanduk dua na ginjang, guminjang na sada jana tanduk na parpudi tubu i do na guminjang.

⁴ Huida ma manombeng biri-biri jantan i adop Hasundutan, Utara dohot Selatan. Sada binatang pe nada adong na tahan mangadopi ia sanga na malua sian kuasonia. Roha-rohania sajo ma dibaen ia jana gabe ginjang rohania.

⁵ Jadi taran sapa-sapa au di bagasan rohangku taringot tu astuan ni i, tarida ma sada hambeng jantan marlojong-lojong ro sian sabola Hasundutan sian parnidaan na parjolo. Hara ni hipasna parlojongna i jabat nada dais patna i tu tano. Di holang-kolang ni matana na dua i adong ma sada tanduk na joljol.

⁶ Dipadonok hambeng jantan i ma tu biri-biri jantan sidua tanduk na huida di topi ni batang aek i, lalu didogo-dogo ia marsitutu.

⁷ Hupareso ma pandogo-dogonia tu biri-biri jantan i. Hara ni panggasa-gasania, ditombeng ia biri-biri jantan i jana ponggol dibaen ia tandukna na dua i. Nada adong geldok ni biri-biri jantan i laho mangalo. Madabu ma ia tu tano i lalu didege-dege jana sahalak pe nada adong na tarbaen mangurupisa.

⁸ Gabe ginjang ma roha ni hambeng jantan i. Tapi dung lalu ia tu puncu ni kuasonia maponggol ma tanduknia na godang i, jana di hatubuanna hian, tubu ma muse opat tanduk, hombar tu opat haroroan ni alogo sian langit.

⁹ Tubu ma sada tanduk na menek sian sada tanduk na opat i na mabidang kuasona adop Selatan, adop Habincaran dohot adop tano na denggan.

¹⁰ Gabe tuk ma gogo ni tanduk i laho mamorangi tentara ni banua ginjang, i ma angka bintang, jabat do didanggurkon ia deba tu tano lalu didege-dege ia.

¹¹ Mur dialo ia muse ma dohot Panglima ni tentara ni banua ginjang, diantak ia haul parhaulan siganop ari na dihaulkon tu Panglima i, jana dirupakkon ia ma bagas paribadatan tuSia.

¹² Gabe mamungka ma disi angka jolma mardosa jana nada be dihaulkon angka haul na ditontuhon i. Madung gabe disampakkon tu tano ibadat hatigoran. Manjadi do sude na nibaen ni tanduk i.

¹³ Dung i hubege ma sahalak surusuruan mandok tu donganna, “Sadia honok mardalan sude na tarida di bagasan parnidaan i? Intap ni andigan dosa godang i manggontihon haul si ganop ari? Olat ni sadia honok do marlaku parnidaan on, i ma haul si ganop ari, hajahatan na mangagohon, inganan na badia na dung dilehen tentara banua ginjang i didege-dege?”

¹⁴ Dung i ning ia ma tu au: “1.150 ari nari. Sai ma lolotna nada dihaulkon haul potang ari dohot haul manyogot. Dung salpu pe i anso mulak sumuang bagas paribadatan i.”

Dipatorang surusuruan Gabriel astuan ni parnidaan i

¹⁵ Di na huuji laho mamikir astuan ni parnidaan i, manigor jongjong ma di jolongku tarsongon sada halaklahi.

¹⁶ Hubege ma sora na pio-pio sian bariba ni Batang aek Ulai, mandok, “Gabriel, patorang ma tusia parnidaan i.”

¹⁷ Jadi ro ma ia tu inganan hajongjonganki, jana dompak ro ia tarsonggot ma au jana manungkap, dung i didok ia ma tu au, “Antusi ma, o anak ni jolma taringot tu ari parpudi do parnidaan on!”

¹⁸ Taran mangkatai ia, pingsan ma au. Tapi ditiop ia ma au jana ditogu ia jongjong mangulahi. Jadi didok ia ma,

¹⁹ “Paboaonku ma tu ho sanga aha na giot tarjadi muse hara ni hamumuruk ni Debata. Angke tudu-tudu tu hatiha na parpudi do parnidaanmi.

²⁰ Biri-biri jantan na niidami, na martanduk dua, i ma manggambarkon harajaan Media dohot Persia.

²¹ Hambeng jantan i, i ma manggambarkon harajaan Junani, jana tandukna na joljol i di holang-kolang ni matana na dua i, i ma rajana na parjolo.

²² Tanduk na opat na ruar dung maponggol tandukna na parjolo i, astuanna tarbagi opat ma harajaan Junani, tapi sada pe nada adong be songon gogo ni harajaan na parjolo i.

²³ Marayak marujung angka harajaan i, jana muda dung gok hajahatan ni angka na jahat, gabe ro ma sada raja sijogal roha, jana na malo paoto-otohon.

²⁴ Mur martamba ma hagogoonnia, tapi nada sagogo ni na parjolo i. Paroonnia ma hamamago na jorbut situtu, jana sai tulus do sanga aha na nibaennia. Bunuonnia ma angka halak na gogo dohot bangso ni Debata.

²⁵ Dibaen malo do ia manipu, sai tulus do angka sipaoto-otonia. Dihaginjangkon ia ma dirinia, jana nada pola jolo mangalehen sipaingot matehononnia ma bahat jolma. Salang Raja ni sandok raja pe dialo ia do. Tapi roncohonon do ia nada pola hara ni gogo ni jolma.

²⁶ Parnidaan taringot tu haul potang ari dohot manyogot i na dung dipatorang tu ho, situtu do i angkon masa. Tapi honok dope anso masa i; jadi tabunihonma jolo i.”

²⁷ Dung i gale ma hulala lalu marnyae ma au adong piga-piga ari. Dung i jongjong ma au jana hukarejohon angka karejongku di raja i. Tapi sai susa do rohangku mamikirkon angka parnidaan i jana nada tarastui au.