BILANGAN 19 - BIBEL JAMITA NA DENGGAN

Abuan ni lombu na rara na nitutung

¹ Diparentahon Tuhan ma tu si Musa dohot tu si Harun

² laho mangalehen angka paraturan on tu bangso Israel. Buat ma sada lombu na rara na so martihas jana na so jungada dope maroban boban.

³ Lehen ma i tu si Eleasar. Obanon ma lombu i tu balian ni parbandaran i jana disambol ma i di jolo ni si Eleasar.

⁴ Dung i buaton ni si Eleasar ma saotik mudar ni lombu i jana pispiskononnia pitu noli adop Bandar ParmiananKu.

⁵ Sude lombu i dohot bobakna, juhutna, mudar dohot isi ni butuhana angkon tutungon di jolo ni malim i.

⁶ Dung i buaton ni malim i ma saotik hayu ares dohot sarranting duhut hisop dohot sada tali na rara jana didanggurkon ia ma i tu bagasan api.

⁷ Dung i basuonnia ma pakeannia, jana disiram ia pamatangnia dohot aek, disi pe anso tola masuk ia tu parbandaran, lopus tu andospotang etongon do ia halak na ramun.

⁸ Halak na manutung lombu i pe angkon dibasu ia pakeannia jana disiram ia pamatangnia dohot aek, ia pe ramun do lopus tu na lusut mataniari.

⁹ Dung i angkon sahalak na dung nietong ias mangihutkon ugamo do papunguhon abu ni lombu i jana dibaen tu inganan na dung ias mangihutkon ugamo, na adong di balian ni parbandaran i. Disi ma abu i simpanon anso adong pakeon ni halak Israel di na pasingkopkon aek di hatiha haiason. Upacara on dibaen gabe hasesaan ni dosa.

¹⁰ Halak na palagutkon abuan ni lombu i, angkon dibasu ia pakeannia, tapi lalu tu andospotang laing etongon do ia na ramun. Marlaku do aturan on ro di salolotna, bope di halak Israel bope di halak na leban na maringanan ditonga-tonga ni halahi.

Manjama bangke

¹¹ Sanga ise na manjama bangke, ramun do ia pitu ari honokna.

¹² Di ari patoluhon dohot di ari papituhon angkon patupaon ni halahi mangias diri dohot aek na dung nitontuhon, disi pe anso ias ia mangihutkon ugamo. Tapi muda nada dipaias ia pamatangnia di ari patoluhon dohot di ari papituhon i, laing tongtong do ia ramun.

¹³ Sanga ise na manjama bangke jana nada dipaias ia pamatangnia, i ma halak na ramun, angke aek na dung ditontuhon i nada disiramkon dope tusia. Na paramunkon Bandar Parmianan Ni Tuhan do ia, hara ni i nada etongon be ia halak ni Debata.

¹⁴ Muda adong halak na mate di bagasan sada bandar, sanga ise sajo na adong di bandar i hatiha parmatena i bope sanga ise na masuk tu bagasan bandar i, gabe ramun do salolot pitu ari.

¹⁵ Muda adong ceret sanga hudon na so martutup di bagasan bandar i, i pe gabe ramun do.

¹⁶ Muda adong manjama bangke ni jolma na dibunu sanga na mate di ladang songon parmate na somal, sanga muda adong manjama kuburan sanga holi-holi ni na mate gabe ramun do pitu ari honokna.

¹⁷ Laho paias dirina sian na ramun i, angkon buatonnia saotik abu ni lombu na rara na dung ditutung gabe hasesaan ni dosa, dipamasuk ma abu i tu sada hudon, dung i ditamba dohot aek.

¹⁸ Di bagasan pangalaho na parjolo, i ma halak na mate di bagasan bandar, angkon sada halak na dung ias mangihutkon ugamo do mambuat sarranting duhut hisop, dipamasuk tu aek lalu mamispis bandar i, sandok na adong di bagasan, rap dohot halak na adong disi. Di bagasan pangalaho na paduahon, i ma sahalak na manjama bangke, kuburan sanga pe holi-holi ni na mate angkon sahalak na ias mangihutkon ugamo do mamispisi halak na ramun i.

¹⁹ Di ari patoluhon dohot papituhon, halak na dung ias mangihutkon ugamo i angkon mamispisi halak na ramun i. Di ari papituhon tuk ma pangalaho haiason ni halakna i. Dung i basuonnia ma pakeannia lalu maridi. Ias ma halahi lopus tu na lusut mataniari.

²⁰ Sanga ise na ramun hape nada dibaen ia upacara haiason i, disi tongtong do ia ramun dibaen nada disiram dope ia dohot aek na mardomu tusi. Madung diramuni ia Bandar Parmianan Ni Tuhan jana nada etongon be ia sahalak sian bangso ni Debata.

²¹ Tongtong do angkon patulusonmunu aturan on ro di salolotna. Halak na mamispiskon aek i pe angkon dibaen ia pakeannia. Sanga ise na manjama aek i, tongtong do ramun ia, lalu tu andospotang.

²² Sanga aha na nijama ni halak na ramun i gabe ramun muse, dohot halak na asing na manjamasa gabe ramun muse lalu tu andospotang.