BILANGAN 17 - BIBEL JAMITA NA DENGGAN

Tungkot ni si Harun

¹ Didok Tuhan ma tu si Musa,

² “Suru ma halak Israel mangalehen dua bolas tungkot tu ho, sian ganop pamimpin ni marga sada tungkot. Suratkon ma ganop goar ni pamimpin di tungkotna i,

³ dung i suratkon goar ni si Harun tu tungkot ni na mangwakili Marga Levi. Ganop pamimpin ni marga adong sada tungkot.

⁴ Oban ma tungkot i tu Bandar ParmiananKu payakkon di jolo ni Poti Parjanjian i. Disi ma inganan parsuoanKu dohot ho.

⁵ Martunas do muse tungkot ni halak na dung Hupili. Marhite on ma antahonKu holso ni angka jolma na sai torus marungut-ungut mangalo Au.”

⁶ Dipabolkas si Musa ma songon i tu halak Israel. Dung i dilehen ganop pamimpin ni halahi ma sada tungkot tu si Musa, sada tungkot sian ganop marga. Bahatna sude dua bolas, laing disi do tungkot ni si Harun.

⁷ Dung i dipayakkon si Musa ma sude tungkot i di jolo ni Poti Parjanjian na di bagasan Bandar Parmianan Ni Tuhan.

⁸ Ancogotna i, di na masuk si Musa tu Bandar Parmianan, diida ia tungkot ni si Harun na mangwakili Marga Levi madung martunas. Marbunga tungkot i jana mangerbang bungana, dung i batuna, batu ni katapang na malamun!

⁹ Dibuat si Musa ma sude tungkot i jana dipatidahon ia tu sude halak Israel. Diida halahi ma na masa i, dung i dibuat angka pamimpin i ma mulak tungkotna be.

¹⁰ Dung i didok Tuhan ma tu si Musa, “Payakkon ma mangulahi tungkot ni si Harun i di jolo ni Poti Parjanjian i. Angkon simpanon do tungkot i, gabe parningotan di halak Israel na sai ra mangalo i, bahaso angkon mate halahi muda sai dipupu halahi marungut-ungut.”

¹¹ Dipatulus si Musa ma sude na niparentahon ni Tuhan i.

¹² Dung i didok halak Israel ma tu si Musa, “Muda songon i do, marmara ma hami!

¹³ Muda angkon mate jolma na mandonohi Bandar Parmianan Ni Tuhan i, antong anggo songon i nada adong be arop ni roha di hita sude.”