2 SAMUEL 4 - BIBEL JAMITA NA DENGGAN

Hona bunu si Isboset

¹ Dung dibege anak ni si Saul, na dung mate di si Abner di Hebron, gabe mabiar ma ia, jana tarsongot ma sude halak Israel.

² Adong do dua halak pamimpin ni gerombolan ni anak ni si Saul, na margoar si Baana dohot si Rekhab, i ma anak ni si Rimon, halak Benyamin sian Beerot. (Masuk tu Benyamin do Beerot.)

³ Halak Beerot madung maporus tu Gitaim jana gabe halak pangaranto ma halahi disi lopus tu sadarion.

⁴ Adong do pahompu ni si Saul, i ma anak ni si Jonatan, na matimpang. Harana di na lalu barita taringot tu hamamate ni si Saul dohot si Jonatan sian kota Jisreel, diompa parorot i ma ia, jana marlojong tapi hara ni mopopna anakboru i, madabu ma dakdanak i jana gabe matimpang ma. Si Mefiboset do goar ni dakdanak i.

⁵ Kehe ma tentara na dua i, si Rekhab dohot si Baana tu bagas ni si Isboset jana lalu halahi disi tonga ari, di na topet modom arian si Isboset.

⁶ Mondok-ondok anakboru panjago ni bagas i hatiha mamiari gandum, lalu tarpodom. Jadi gabe tarbaen si Rekhab ma dohot si Baana sipsip masuk tu bagas i.

⁷ Manigor masuk ma halahi tu bilik podoman ni si Isboset na sinok modom i, lalu disusuk halahi lopus mate. Dilobong halahi ma uluna i jana dioban halahi kehe. Saborngin maningting ma halahi mardalan mamolus Rura Jordan.

⁸ Dung i dipasahat halahi ma ulu ni si Isboset i tu si Daud di Hebron mardongan hata, “On ma ulu ni si Isboset anak ni si Saul musu ni raja i na sai marpupu giot mamunu raja i. Sadari on ma dibaloskon Tuhan tu raja i pangalaho ni si Saul dohot pomparanna.”

⁹ Tapi dialusi si Daud ma, “Diboto Tuhan na mangolu i do, i ma na dung paluahon au sian sandok ragam ni parmaraan, bahaso na tutu do na giot sidokkononkon.

¹⁰ Dompak di Ziklag adong ma bayo na paboahon tu au taringot tu parmate ni si Saul. Diambang ia lakna na maroban barita na denggan ia. Tapi hutangkup ma ia jana hubunu. I ma upania hulehen songon balos ni barita na niobannia i.

¹¹ Umboratan dope uhuman na giot dabuhononku tu parjahat na mamunu halak na so marsala na topet modom di bagasna sandiri. Saonnari au manuntut pamaloson sian hamu hara ni pamunuon i, jana agohononku ma hamu sian sisik ni tano on!”

¹² Dung salpu i diparentahon si Daud ma tu parangannia anso dibunu si Rekhab dohot si Baana. Dung dibunu, digotap ma tangan dohot patna i jana digantungkon di lambung tobat na di Hebron. Tapi anggo ulu ni si Isboset i dibuat ma jana ditanom laing di kota i di bagasan kuburan ni si Abner.