2 SAMUEL 18 - BIBEL JAMITA NA DENGGAN

Talu si Absalom lalu mate

¹ Dipalagut Raja Daud ma sude parangannia, dibagi-bagi ia ma marturpuk-turpuk, adong na saribu halak jana adong na saratus halak. Dung i diangkat ia ma komandanna ganop turpuk.

² Dung i dipakehe ia ma halahi marporang di bagasan tolu rombongan; sarombongan be ma dipimpin si Joab, si Abisai anggi ni si Joab i dohot si Itai na sian Gat. Didok raja i ma tu tentarania i, “Au pe laing dohot do kehe rap dohot hamu.”

³ Tapi dialusi halahi ma, “Ulang, rajanami. Harana, sugari tarpaksa angkon marlojongi hami, sanga sugari mate rupani satonga sian hami, nada parduli musunta i disi, angke raja i do na nirohaan ni halahi. Sarupa do arga ni raja i dohot sampulu ribu sian hami on. Boti muse, gumonan do raja i manongos bantuan tu hami sian kota.”

⁴ Jadi didok raja i ma, “Antong denggan, marguru di hagiotmunu ma.” Dung i jongjong ma raja i di lambung ni pintu horbangan ni kota i, marbaris ma haruar sude tentara i di rombonganna be, adong na saribu jana adong marsaratus halak.

⁵ Dung i diparentahon raja i ma tu si Joab, si Abisai dohot tu si Itai, “Ulang hahua hamu si Absalom, na poso i, hara ni au.” Sude do tentara i mambege parenta ni si Daud i.

⁶ Dung i kehe ma tentara ni si Daud i mamorangi pasukan ni Israel, jana marporang ma halahi di harangan Efraim.

⁷ Talu ma pasukan ni Israel i dibaen parangan ni si Daud; godang sajo do hataluan i, dua pulu ribu halak na mate di na sadari i.

⁸ Mabidang ma parporangan di luat i sude jana umbahat do na mate tarsosak di harangan i ulang pado na mate di galanggang ni porang i.

⁹ Dompak mangalombut bagalnia si Absalom, ompot ma marsuo ia dohot parangan ni si Daud. Mamolus bagalnia i di toru ni hayu na godang, jana sangkot ma ulu ni si Absalom di sada dangka. Marlojong torus bagalnia i, gabe tinggal ma si Absalom disi laing gantung-gantung.

¹⁰ Adong ma sada sian parangan ni si Daud i marnida si Absalom na gantung-gantung i di hayu na godang i jana dipaboa ia ma tu si Joab, “Tuan, nangkin huida do si Absalom gantung-gantung di hayu na godang!”

¹¹ Dialusi si Joab ma, “Aha? Diida ho si Absalom? Biasi nada manigor dibunu ho? Sugari lehenonku do di ho sampulu hepeng perak dohot sada bobat.”

¹² Tapi dialusi bayo i ma, “Haru saribu pe hepeng perak dilehen di au, inda na ra au manghahua anak ni raja i. Sude do hami umbege na niparentahon ni raja i tu tuan i dohot tu si Abisai dohot si Itai, anso ulang adong na mambaen mabugang si Absalom, na poso i, hara ni raja i.

¹³ Jana sugari hubunu nangkin si Absalom torang do i tarboto tu raja i, – angke dibege raja i do sanga na aha pe – jana tuan i pe indangkan na ra mangampini au.”

¹⁴ “Tuk ma i,” ning si Joab. Dung i dibuat si Joab ma tolu hujur jana ditihamkon ia ma i tu andora ni si Absalom na mangolu dope di hatiha i jana gantung di hayu i.

¹⁵ Dung i ro ma sampulu halak parangan ni si Joab manggosa-gosa ia lalu mamunusa.

¹⁶ Dipalu si Joab ma sarune, jadi gabe maradian ma parangannia i manghojar pasukan ni Israel.

¹⁷ Dung i diangkat ma bangke ni si Absalom i jana diambungkon ma tu bagasan sumur na bagas di harangan i. Ditimbun halahi ma sumur i dohot batu lopus gincat. Maporus ma sude tentara ni Israel tu bagasna be.

¹⁸ Taran di ngolu ni si Absalom dope, na dung dipajongjong ia humani do disia sandiri sada tugu di Rura Raja, angke nada adong anak halaklahi disia laho paudutkon pomparan disia. Dibaen ia ma goar ni tugu i mangihutkon goarnia sandiri, jana lalu tu sadari on laing na habotoan do tugu i, tugu ni si Absalom.

Dipabotohon tu si Daud, hamamate ni si Absalom

¹⁹ Dung i didok si Ahimaas anak ni si Zadok i ma tu si Joab, “Paloas ma au kehe marlojong mandapotkon raja i paboahon dohot maroban barita na denggan bahaso na dung dipalua Tuhan raja i sian musuna.”

²⁰ “Ulang,” ning si Joab, “di pudi ma i. Anggo sadari on nada tola dope ho maroban barita, harana madung mate anak ni raja i.”

²¹ Dung i didok si Joab ma tu sada halak sian naposonia, halak Sudan, “Kehe ma ho, paboa ma tu raja i sanga aha na niidamu.” Manungkap ma naposonia i lalu kehe marlojong.

²² Tapi disosak si Ahimaas ma tu si Joab, “Sanga aha pe na tarjadi laing paloas ma au dohot paboahon barita.” “Biasi mamaksa-maksa ho kehe, anakku?” ning si Joab manyapai. “Inda na adong upa sijagitonmu hara ni i.”

²³ “Sanga aha pe na tarjadi,” ning si Ahimaas mangulahi, “kehe do au.” “Antong anggo songon i, kehe ma ho,” ning si Joab. Jadi marlojong ma si Ahimaas paihut-ihut dalan manyalpui Rura Jordan, jana nada sadia honok, tarjoloi ia ma naposo halak Sudan sinangkin.

²⁴ Dompak juguk-juguk do si Daud di antara ni pintu horbangan na di bagasan dohot pintu horbangan parruar ni kota i. Manaek ma panjago i tu ginjang ni tembok jana jongjong ia di tarup ni pintu ni horbangan i. Di na manatap ia, diida ia ma ro sada halak na marlojong-lojong.

²⁵ Pio-pio ma panjago i tu toru, paboahonsa tu raja i, jana didok raja i ma, “Muda sada halak do na ro i, tontu barita na denggan do na niobannia i.” Jadi dung marayak lalu bayo i,

²⁶ diida panjago i muse ma sada halak nari, laing marlojong-lojong muse. Jadi pio-pio ma panjago i, “Ligi ma! Adong dope na asing ro tuson marlojong sahalak nari.” Dialusi raja i ma, “Aropku laing barita na denggan muse do na niobannia i.”

²⁷ Didok panjago i ma, “Si Ahimaas do na parjolo i. Huboto do sian parlojongnia i.” “Halak na burju do ia,” ning raja i, “tontu barita na denggan do na niobannia i.”

²⁸ Manggora ma si Ahimaas manabi raja i, dung i manungkap ma ia lalu mandok, “Nipuji ma Tuhan Debata ni raja i na dung pasahatkon tu raja i angka halak na mambaen paraloan tu tuanku!”

²⁹ Disapai raja i ma, “Horas do si Absalom na jeges i?” Dialusi si Ahimaas ma, “Rajanami! Nangkin di na disuru ni si Joab au, huida do hagaoran na godang, tapi nada huboto sanga aha na masa i.”

³⁰ “Jongjong ma ho sabola adu,” ning raja i; jadi kehe ma si Ahimaas tu lambung jana jongjong ma ia disi.

³¹ Dung i lalu ma naposo ni si Joab i, jana didok ia ma tu raja i, “Barita na denggan do na huoban di raja i! Di ari sadari on madung dilehen Tuhan di raja i hamonangan maradopkon halak na mambaen paraloan i.”

³² Disapai raja i ma tusia, “Horas do si Absalom na doli i?” Dung i dialusi naposo i ma, “Padiar ma, sude musu ni raja i, sude halak na mambaen paraloan tu raja i, sarupa do bagianna dohot anak na jeges i.”

³³ Umbege i, marsak sajo ma roha ni raja i, lalu manaek ma ia tu inganan na di ginjang ni pintu horbangan i tangis jana mangandungi ma ia, “Oi anakki! Anakku si Absalom i! Si Absalom anakki! Gumonan do au mate manggontihon anakki! Si Absalom anakki!”