2 JUJUR TAON 9 - BIBEL JAMITA NA DENGGAN

Haroro ni Ratu Seba

¹ Tarbege ma tu Ratu ni tano Seba taringot tu hagodangan ni si Salomo. Jadi gabe ro ma ia tu Jerusalem laho manguji si Salomo dohot sapa-sapa na maol-maol. Bahat do angka na mangudurkon ia di na ro i, songon i unto na sorat marboban angka parmasak, batu intan, dohot sere bahat sajo. Dung marsuo dohot si Salomo, dibaen ia ma angka sapa-sapa na dapot dipikiri ia.

² Taralusi si Salomo do sude sapa-sapa i, umpe sada na mamaoltu disia.

³ Disaksihon Ratu i sandiri ma sanga na bia habisuhon ni si Salomo, jana longang do ia paida-ida bagas godang na nibangunna i.

⁴ Diida ia parsusun ni karejo ni angka pagawe ni bagas godang i, pakean saragamna maradu angka kamar inganan ni halahi; diida ia ma hidangan ni sipanganon, dohot pakean ni angka pangoloi na markobas di pesta i; laing diida ia muse ma angka haul na nihaulkon ni si Salomo di Bagas Ni Debata. Sudena ma i mambaen Ratu Ni Seba i gabe longang jana homang-homang.

⁵ Jadi didok ia ma tu Raja Salomo, “Tutu ma da antong sudena na hubege di tanonami salaho tu tuan i dohot habisuhon ni tuan i!

⁶ Hape dung ro au jana husaksihon sandiri dohot matangku sudena, baru pe anso porsaya au. Satutuna sude na hubege i nada adong dope satonga sian na huida saonnari. Hapengani dao dope gumodang habisuhon dohot sinadongan ni tuan i sian na dibaritahon tu au.

⁷ Maruntung situtu ma da angka pagawe na sai tongtong di lambung ni tuan i gabe bolas ia umbege sasude pangajaran na bisuk na sian tuan i!

⁸ Nipuji ma Tuhan, Debata ni tuan i! Di na niangkatNa tuan i gabe raja ni Israel, na patuduhon sanga songon dia sonang ni roha ni Tuhan i tu tuan i. Nada marnamantak Ia antong manghaholongi bangso Israel; i do umbaen na niangkatNia tuan i gabe raja ni halahi, anso tarhajongjongkon tuan i uhum dohot hatigoran.”

⁹ Dung i dipasahat Ratu Ni Seba i ma tu si Salomo angka silua na niobannia i, i ma sere lobi opat ribu kilogram bahatna dohot batu intan sanga na sadia bahat maradu angka parmasak. Nada jungada be dijagit si Salomo parmasak na songon i jegesna, songon na nilehen ni Ratu Seba i tusia. (

¹⁰ Angka halak ni Raja Hiram dohot halak ni Raja Salomo i pe maroban sere do sian Ofir di si Salomo, songon i muse batu intan dohot hayu cendana.

¹¹ Dipake si Salomo ma hayu i laho mambaen tangga ni Bagas Ni Tuhan dohot bagas godangnia, songon i muse mambaen hasapi dohot gambus di angka parmusik. Nada jungada dope adong na songon i di tano Juda.)

¹² Dilehen si Salomo ma tu Ratu ni tano Seba i sanga aha na nipangidonia, asing ni angka hadiah na somal dilehen si Salomo. Dung i mulak ma Ratu i tu tanonia rap dohot angka na mangudurkon ia.

Sinadongan ni Raja Salomo

¹³ Ganop taon manjagit do Raja Salomo dua pulu tolu ribu kilogram sere,

¹⁴ nada dohot dope i dietong angka pajak na sian saudagar dohot parboniaga. Angka raja-raja ni Arab maradu angka gubernur ni Israel mangalehen sere dohot perak tusia.

¹⁵ Dibaen si Salomo ma dua ratus parince na godang na dilampis sudena dohot sere tompoan bahatna hira-hira pitu kilogram.

¹⁶ Dibaen ia muse do tolu ratus parince na ummenek na dilampis be dohot sere tompoan hurang lobi tolu kilogram bahatna. Dibaen ia ma sude parince i di ruangan na margoar Bale Tombak Libanon.

¹⁷ Dibaen raja i dope sada karosi harajaan na godang dilampis gading dohot sere.

¹⁸ Adong onom anak ni tangga ni karosi i. Dilampis do sidege-degeanna i dohot sere jana gabe sada do i dohot karosi i. Martangan-tangan do karosi i jana angkup bariba adong patung ni singa.

¹⁹ Di ujung ni ganop anak ni tanggana i adong muse do patung ni singa di siamun siambirangna, dua bolas ma sudena. Nada unjung adong dope karosi na songon i sanga na di harajaan dia pe.

²⁰ Sude parkokas panginuman ni si Salomo sian sere do dibaen, jana sude parkokas na di “Bale Tombak Libanon” pe dibaen sian sere na polin do. Di zaman ni si Salomo, nada mararga anggo perak.

²¹ Bahat do kapal ni si Salomo na godang-godang na marlayar di laut bidang rap dohot angka kapal ni Raja Hiram. Sanoli tolu taon mulak do kapal i maroban sere, perak, gading, kerek dohot angka unggas merak.

²² Kumayo do Raja Salomo jana umbisuk sian raja sanga na di dia pe di tano on.

²³ Sude do halak marpor ni roha giot ro laho manangihon pangajaran na bisuk na nilehen ni Debata tusia.

²⁴ Sanga ise halak na ro, maroban silua do disi. Diparobani halahi ma barang-barang na sian perak, sere, pakean, sinjata, parmasak, kudo, bagal. Sai songon i ma sian taon tu taon.

²⁵ Adong muse do di Raja Salomo opat ribu bara ni kudo dohot karetania. Adong do dua bolas ribu kudo porangnia. Deba ma i dibaen di Jerusalem, jana na deba nari di angka kota parbandaran ni kareta porangnia.

²⁶ Markuaso do ia di sude raja na di luat na sian Batang aek Efrat lopus tu tano ni halak Pilistin dohot parbatasan ni Mesir.

²⁷ Di zaman ni si Salomo mamarenta, anggo perak di Jerusalem barang na somal do tarsongon batu rupani; jana marlobi-lobi do hayu sampinur Libanon songon hayu ara.

²⁸ Dipamasuk si Salomo do sian Mesir kudo dohot sian sandok luat na asing.

Dipapendek ma barita pamarentaon ni si Salomo

²⁹ Barita na asing salaho tu si Salomo sian mulana lopus tu ujung madung disuratkon i di bagasan Buku Sejarah Ni Panurirang Natan dohot di bagasan Buku Ramalan Ni si Ahia halak Silo i dohot di bagasan Buku Halumbaan Ni Panurirang Ido, na marisi muse barita ni pamarenta ni si Jerobeam raja ni Israel.

³⁰ Opat pulu taon honokna mamarenta si Salomo di sude Israel.

³¹ Dung i marujung ma ngolunia jana dikuburkon di Kota Ni si Daud. Jadi gabe raja ma anaknia si Rehabeam manggontihon ia.