1 SAMUEL 7 - BIBEL JAMITA NA DENGGAN

¹ Dung i dibuat halak Kiryat-Jearim ma Poti Parjanjian ni Tuhan i lalu dioban halahi tu bagas ni na margoar si Abinadab na tinggal di ginjang ni tor. Dung i dipapunjung halahi ma si Eleasar anak ni si Abinadab laho manjago Poti Parjanjian i.

Si Samuel mamarenta Israel

² Laing honok do Poti Parjanjian ni Tuhan i tinggal di Kiryat-Jearim, adong do hira-hira dua pulu taon. Songon i ma lolotna sai pio-pio halak Israel mangido tolong tu Tuhan.

³ Dung i didok si Samuel ma tu halak Israel, “Muda na giot marbalik ma hamu tu Tuhan jana marsomba tuSia sian sandok rohamunu, angkon ambungkononmunu do sude debata na asing dohot patung ni Dewi Astoret i. Pasahat hamu dirimunu sude tu Tuhan jana hum tuSia sajo ma hamu marsomba, jadi gabe paluaonNa ma hamu sian halak Pilistin.”

⁴ Jadi diparambungkon halak Israel ma angka patung ni Debata Baal dohot patung ni Dewi Astoret, jana hum tu Tuhan sajo noma halahi marsomba.

⁵ Dung salpu i didok si Samuel ma, “Palagut hamu ma sude bangso Israel di Mispa, anso martangiang au tu Tuhan salaho tu hamu.”

⁶ Jadi marlagut ma halahi sude di Mispa. Ditimbai halahi ma aek jana diparduruskon halahi ma i gabe songon haul tu Tuhan, jana dipaudut halahi tu na marpuaso tangging sadari i. Didok halahi ma, “Madung mardosa hami tu Tuhan.” (Di Mispa ma dipungka si Samuel pasidungkon angka parkaro parsalisian ni halak Israel.)

⁷ Di na tarboto tu halak Pilistin na dung marlagut halak Israel di Mispa, kehe ma raja ni halak Pilistin na lima i tusi dohot tentara ni halahi laho mamorangi halak Israel. Umbege pangalaho i gabe mabiar ma halak Israel.

⁸ Didok halahi ma tu si Samuel, “Ulang mantak ho na martangiang i tu Tuhan Debatanta anso dipalua Ia hita sian halak Pilistin.”

⁹ Jadi hara ni i, disambol si Samuel ma sada anak ni biri-biri lalu ditutung ia ma i himpal-himpal songon haul tu Tuhan. Dung i martangiang ma ia anso ditolong Tuhan halak Israel, jana tulus do antong tangiangnia i.

¹⁰ Di na manghaulkon haul na nitutung i si Samuel, mamungka ma halak Pilistin mangaroro; tapi laing topet ma disi mangaronggur Tuhan sian langit tu ginjang ni halahi. Gabe sarsar ma halahi marlojong so diboto be tondongonna.

¹¹ Haruar ma tentara ni Israel sian Mispa lalu mangkojar halak Pilistin i jabat do giot lalu tu Bet-Kar jana dibunui halahi ma i sapanjang dalan i.

¹² Dung i dibuat si Samuel ma sada batu, dipajongjong ia ma batu i di parbalohan ni Mispa dohot Sen. Didok ia ma, “Diurupi Tuhan do hita sapanjang pardalananta,” – jana digoari ia ma batu i “Eben-Haeser, Batu Pangurupion”.

¹³ Songon i ma pangalahona talu halak Pilistin jana nada dipatola Tuhan halahi masuk tu tano ni halak Israel. Salolot mangolu si Samuel, na so jungada do monang halak Pilistin maralohon halak Israel.

¹⁴ Sude kota na dung dibuat ni halak Pilistin, mamungka sian Ekron lalu tu Gat, dipaulak ma i tu Israel. Jadi gabe dapot Israel do sude mangulahi luat i. Jadi gabe mardame-dame ma ngolu ni halak Israel dohot halak Kanaan.

¹⁵ Salolot mangolu si Samuel mamarenta Israel,

¹⁶ ganop taon sai diliati si Samuel do tu Betel, Gilgal dohot Mispa. Jana dipasidung ia ma disi angka parkaro parsalisian.

¹⁷ Jana sai mulak do ia mangulahi tu Rama. Na gabe hakim ni halak Israel do ia disi jana dipajongjong ia muse sada langgatan di Tuhan.