1 SAMUEL 4 - BIBEL JAMITA NA DENGGAN

Poti Parjanjian dirampas halak Pilistin

¹ Di hatiha i marporang ma bangso Israel mangalo halak Pilistin. Jadi gabe maju ma tentara ni Israel tu galanggang parporangan; marbandar di lambung ni Eben-Haeser ma halahi, tapi anggo tentara ni Pilistin i marbandar di Afek.

² Dipajolo tentara ni Pilistin i ma mangaroro jana dung mur hebat parporangan i, talu ma tentara ni Israel jana mate ma hira-hira opat ribu halak di galanggang parporangan i.

³ Dung mulak angka tentara na malua i tu parbandaranna, didok angka pamimpin ni Israel ma, “Biasi ulaning dipadiar Tuhan talu hita dibaen halak Pilistin sadari on? Beta, tabuat ma Poti Parjanjian ni Tuhan sian Silo, jana taoban tuson, anso ra Tuhan mandongani hita dohot paluahon hita sian musu i.”

⁴ Jadi disuru halahi ma halak tu Silo laho mambuat Poti Parjanjian ni Tuhan i na mangwakili habangsa ni Tuhan Na Markuaso i. Anak ni si Eli na dua i ma, si Hofni dohot si Pinehas na mangudurkon Poti Parjanjian i.

⁵ Dung lalu Poti Parjanjian i di parbandaran i, marsurak ma halak Israel maradu gogo jabat humutur tano i.

⁶ Laing dibege halak Pilistin do sora ni na marsurak i gabe didok halahi ma, “Biasi ulaning marsurahi halak Ibrani i?” Tapi dung diboto halahi na dung lalu Poti Parjanjian ni Tuhan i di parbandaran ni halak Ibrani i,

⁷ gabe mabiar ma halahi jana didok halahi ma, “Adong ro Debata tu parbandaran ni halahi! Mago ma hita on! Na so unjung dope taalami na songon on!

⁸ Anggo on mago ma hita! Ise dope tarbaen paluahon hita sian Debata Na Gumogo i? Nada he Debata i do na mamunu halak Mesir di parhorsihan i najolo?

⁹ Papir hamu ma rohamunu, ale halak Pilistin! Marporang ma hamu, anggo inda, na giot gabe hatoban ni halak Ibrani i noma hamu, songon halahi najolo na gabe hatoban. Antong marporang ma hamu songon halaklahi!”

¹⁰ Dung i marporang ma halak Pilistin i marsitutu jana ditaluhon halahi ma halak Israel. Marlojong ma halahi tu bandarna be. Hataluan godang do i: tolu pulu ribu hona bunu tentara ni Israel.

¹¹ Dirampas musu i dope Poti Parjanjian ni Tuhan, jana anak ni si Eli na dua i, si Hofni dohot si Pinehas pe mate.

Marujung ngolu ni si Eli

¹² Marlojong ma sahalak Marga Benyamin sian galanggang parporangan i tu Silo jana laing di na sadari i do ia lalu disi. Jana songon tanda ni arsak ni roha, disibak-sibak ia pakeannia jana dibaen ia tano di ulunia.

¹³ Topet do juguk di karosi di topi dalan i si Eli matondo mangarsakkon haluaan ni Poti Parjanjian ni Tuhan i. Di na nibaritahon ni bayo i na dung talu Israel, mangangguhi ma gogo sude halak na di kota i.

¹⁴ Dibege si Eli do na mangandungi i, gabe disapai ia ma, “Aha dehe na gaor i?” Laing dilojong bayo sinangkinan ma tu si Eli laho paboahon barita arsak i.

¹⁵ Madung marumur sambilan pulu salapan taon si Eli jana dohonon mapitung ne ma ia.

¹⁶ Didok bayo i ma tu si Eli, “Na malua do au sian parporangan i jana na maporus do au tuson sadari on.” Disapai si Eli ma tusia, “Bia do baritana, amang?”

¹⁷ Dialusi sioban barita i ma, “Maporus do halak Israel sian halak Pilistin; bahat sajo do na mate! Anakmu na dua i pe, amang, si Hofni dohot si Pinehas, marujung do. Jana dirampas musu i do Poti Parjanjian ni Debata!”

¹⁸ Di na nibaritahon ni bayo i taringot tu Poti Parjanjian i, tinggang ma si Eli singgalak sian karosina i di lambung ni pintu horbangan i. Hara ni tobangnia boti mokmok gabe maponggol ma rungkungnia di na madabu i jana mate ma ia. Madung opat pulu taon honokna dipimpin ia Israel.

Marujung ma ngolu ni tinggal-tinggalan ni si Pinehas

¹⁹ Di hatiha i topet denggan pamatang ni parumaen ni si Eli, na nibuat ni si Pinehas, jana donok noma hatihana laho hipas. Di na nibegenia na dung hona rampas Poti Parjanjian ni Debata i, jana amangborunia dohot halaklahinia pe madung marujung ngoluna, ompot ma hancit songon na giot diapi dihilala ia, nada sadia honok antong hipas ma ia.

²⁰ Saotik nari noma anso marujung ia di na nidok ni angka dadaboru na manolong ia, “Sobar ma ho! Halaklahi do anakmon!” Haru songon i pe nada dialusi ia i, sanga diparate-atehon ia.

^21-22 Dibaen ia ma goar ni dakdanak i si Ikabod, angke didok ia, “Ma mago hasangapan ni Debata na marmulia i sian Israel,” – anggo maksudnia i ma paboa na dung dirampas musu do Poti Parjanjian i jana amangborunia dohot halaklahinia pe madung jumolo monding. Jadi hara ni i ma didok ia, “Madung mago hasangapan ni Debata na marmulia i sian Israel, angke madung hona rampas Poti Parjanjian ni Debata.”